တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ၸုမ်းယိပ်းၵွင်ႈၵၢင်ႇ ဢၼ်ၵိုတ်းတိုၵ်း ၸုမ်းၼိုင်ႈ ႁူမ်ႈၵၼ် ႁေႃႈလိုပ်ႈၶၢႆႉၵူၼ်း ဝၢၼ်ႈ ဢၼ်ယူႇသဝ်း ၼႂ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

သိုၵ်းလူင်ပွင်ၸိုင်ႈမၢၼ်ႈ တင်း ၸုမ်းယိပ်းၵွင်ႈၵၢင်ႇၸုမ်းၼိုင်ႈ ႁူမ်ႈၵၼ် ႁေႃႈလိုပ်ႈၵူၼ်းဝၢၼ်ႈ ၼႂ်းဢိူင်ႇၼႃးမွၼ် ဝၢၼ်ႈပၢင်ပီႉ၊ ဝၢၼ်ႈမူတ်ႉလႄႈ ဝၢၼ်ႈပွၵ်ႉၵျွင်း ၸိူဝ်းၼႆႉ ၶၢႆႉဝၢၼ်ႈ ဝႃႈၼႆ။

ၸၢႆးၵမ်ႇ ၵူၼ်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ တပ်ႉမတေႃႇမၢၼ်ႈ တင်း PNLO ႁူမ်ႈၵၼ် ႁေႃႈလိုပ်ႈ ဝၢၼ်ႈ ဢွၼ်ႇ ဝၢၼ်ႈဢိတ်း ၸိူဝ်းၼၼ်ႉ ႁႂ်ႈမႃးၶွၼ်ႈတုမ်တီႈလဵဝ်ၵၼ်။ ဢၼ်ၶဝ် ႁႂ်ႈမႃးၶွၼ်ႈတီႈလဵဝ်ၵၼ်တႄႉ ပဵၼ်ဝၢၼ်ႈ လင်ႁိူၼ်း ဢေႇၶႃႈ။ ဝၢၼ်ႈဢၼ်ၶဝ်ၸႂ်ႉၶၢႆႉၼၼ်ႉ မိူၼ်တင်းဝႃႈ ႁႂ်ႈယူႇပႃႈတႂ်ႈၶဝ်ၵုမ်းၵမ်” ဝႃႈၼႆ။

ၵူၼ်းပိုၼ်ႉတီႈလၢတ်ႈဝႃႈ “ လွင်ႈဢၼ်ၸႂ်ႉၶၢႆႉဝၢၼ်ႈၼႆႉ မိူဝ်ႈဝၼ်းတီႈ 30 လိူၼ်ၼူဝ်ႊဝႅမ်ႊၿိူဝ်ႊၼၼ်ႉ ၶဝ်သွင်ၸုမ်း ႁွင်ႉၵူၼ်းဝၢၼ်ႈႁဵတ်းပၢင်ၵုမ်။ ၶဝ်ဝႃႈ တေပၼ်ၶၢဝ်းတၢင်း 2 ဝၼ်း ႁႂ်ႈၶၢႆႉယဝ်ႉ”ဝႃႈၼႆ။

ၸၢႆးၼွင်ႉ ၽူႈတႅၼ်းသၽႃးၸႄႈမိူင်း ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈဢၼ်ဝႃႈ ၸႂ်ႉၵူၼ်းဝၢၼ်ႈ ၶၢႆႉၼၼ်ႉ လႆႈငိၼ်းယူႇ။ ၵူၺ်းၵႃႈ ႁဝ်းၶႃႈ ဢမ်ႇလႆႈႁူႉၶေႃႈမုလ်းတႅတ်ႈတေႃးလီ။ သင်ဝႃႈ ၶဝ်ၸႂ်ႉၵူၼ်းဝၢၼ်ႈၶၢႆႉၸိူင်ႉ ၼႆ ၵူၼ်းဝၢၼ်ႈတႄႉ ႁူႉဝႃႈႁူပ်ႉလွင်ႈယၢပ်ႇၽိုတ်ႇၶႃႈယဝ်ႉ” ဝႃႈၼႆ။

ယူႇတီႈႁွင်ႈၵၢၼ်ပိုၼ်ၽၢဝ်ႇ PNLO/ PNLA ဢွၵ်ႇဝႆႉလိၵ်ႈပိုၼ်ၽၢဝ်ႇဝႃႈ “ ဢၼ်ႁွင်ႈၵၢၼ်ပိုၼ်ၽၢဝ်ႇ RCSS/SSA တီႈဝႅပ်ႊသၢႆႊ TaiFreedom ဢွၵ်ႇၶၢဝ်ႇဝႆႉဝႃႈ လိုပ်ႈႁေႃႈၵူၼ်းမိူင်းဢၼ်ဝႃႈၼၼ်ႉ မၼ်းဢမ်ႇၸႂ်ႈၶၢဝ်ႇထုၵ်ႇမႅၼ်ႈ” ဝႃႈၼႆ။

တူၼ်းႁူတ်ႈထုင်ႉလွႆပၢင်ပီႉၼၼ်ႉ ၾၢႆႇတပ်ႉလူင်ပွင်ၸိုင်ႈမၢၼ်ႈလၢတ်ႈတီႈၵူၼ်းဝၢၼ်ႈဝႃႈ ႁႂ်ႈမီး 2 ဝၢၼ်ႈၵူၺ်း ဝၢၼ်ႈ ပၢင်ပီႉ တင်း ဝၢၼ်ႈမႂ်ႇ ဝႃႈၼႆ။

PNLO တင်း RCSS ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼင်ႇၵၼ်။ မိူဝ်ႈ ပီ 2014 ၼၼ်ႉ 2 တပ်ႉသိုၵ်းၼႆႉ လႆႈပဵၼ်ပၼ်ႁႃ လွင်ႈၼႃႈတီႈၵၼ်။ ယူႇတီႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ RCSS တင်း ၶုၼ်ႇမိၼ်ႉထုၼ်း ႁူဝ်ၼႃႈ PNLO လႆႈႁူပ်ႉဢုပ်ႇ ၵႄႈလိတ်ႈပၼ်ႁႃၵၼ် ယဝ်ႉတူဝ်ႈၵႂႃႇယဝ်ႉၵမ်းၼိုင်ႈ။ ထိုင်မႃး မွၵ်ႈ ၵၢင်ပီၼႆႉမႃး 2 တပ်ႉသိုၵ်း ၶိုၼ်းပဵၼ်ပၼ်ႁႃလွင်ႈၼႃႈတီႈၵၼ်မႃးထႅင်ႈ ဝႃႈၼႆ။