ၼၢင်းယိင်း ၵဝ်းလီ(ၵူဝ်ႊလီႊယိူဝ်ႊ) ဢၼ်မႃးဢႅဝ်ႇယဵမ်ႈ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ လႆႈၸူမ် ၼမ်ႉတူႈၵႂႃႇ မိူဝ်ႈႁၢင်လိူၼ်ၼူဝ်ႊဝႅမ်ႊၿိူဝ်ႊၼၼ်ႉ တေႃႇထိုင်ယၢမ်းလဵဝ် ႁႃပႆႇထူပ်းႁၼ် သင်ၽႂ် ၵေႃႉလႂ် ထူပ်းႁၼ်ၸိုင် တေတွၼ်ႈပၼ်သူးငိုၼ်း 5 ႁဵင်ၻေႃႊလိူဝ်ႊ(USA) ဝႃႈၼႆ။
ၼၢင်းယိင်း ၵဝ်းလီ ၸိုဝ်ႈႁွင်ႉ Miss Houng Young Heo ဢႃယု 45 ပီ လူင်းလဵၼ်ႈၼမ်ႉ ၼႂ်းၼမ်ႉတူႈ ၸႄႈဝဵင်းသီႇ ပေႃႉ ၸိုင်ႈတႆးပွတ်းႁွင်ႇ မိူဝ်ႈဝၼ်းတီႈ 23/11/2018 ၼၼ်ႉသေ ႁၢႆၵႂႃႇ တေႃႇထိုင်ဝၼ်းတီႈ 04/12/2018 ၶၢင်းတၢင်း 11 ဝၼ်း ပႆႇႁၼ်တူဝ် ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းပိုၼ်ၽၢဝ်ႇဝႃႈ သင် ၽႂ် ထူပ်းႁၼ် တူဝ်ၼၢင်းၵူဝ်ႊလီႊယိူဝ်ႊၼၼ်ႉၸိုင် တေတွၼ်ႈသူးငိုၼ်းပၼ် 5000 ၻေႃႊလိူဝ်ႊ။ တေႃႈလဵဝ် ၵူၼ်း ဝၢၼ်ႈ ၸိူဝ်းယူႇၸွမ်းႁိမ်းႁွမ်းၼမ်ႉတူႈတႄႉ ဢွၼ်ၵၼ်ႁႃယူႇ။ ၸဝ်ႈၼႃႈတီႈၶဝ်ၵေႃႈ တင်ႈတႄႇ မၼ်းၼၢင်းၸူမ် ႁၢႆ ၵႂႃႇၼႂ်းၼမ်ႉတူႈၼၼ်ႉ ၶဝ်ၵေႃႈ ဢွၼ်ၵၼ်ႁႃယူႇ တေႃႇထိုင်ယၢမ်းလဵဝ် ပႆႇႁၼ်” ဝႃႈၼႆ။
မိူဝ်ႈဝၼ်းတီႈ 1 လိူၼ်ၼႆႉ လႆႈထူပ်းႁၼ်တူဝ်တၢႆ ၵေႃႉၼိုင်ႈ တၢင်းၾၢႆႇႁွင်ႇဝၼ်းဢွၵ်ႇ သီႇပေႃႉ ယၢၼ်ၵႆဝဵင်း 12 လၵ်း ၼၼ်ႉ လႆႈၼမ်းၵႂႃႇၵူတ်ႇထတ်းတူၺ်း DNA တီႈႁူင်းယႃဝဵင်းလိူဝ်ႇသေ လႆႈႁူႉဝႃႈ ဢမ်ႇၸႂ်ႈပဵၼ်ၽူႈယိင်း Miss Houng Young Heo ပဵၼ်ၽူႈၸၢႆး တၢႆမႃးႁိုင် 3 လိူၼ်ပၢႆယဝ်ႉ ဝႃႈၼႆ။
ၼၢင်းယိင်း ၵဝ်းလီ ဢၼ်ႁၢႆၸူမ်ၼမ်ႉ ၼႂ်းၼမ်ႉတူႈၵႂႃႇၼႆႉ မၼ်းၼၢင်းပဵၼ်ၾၢႆႇဢိၼ်ႊၵျိၼ်ႊၼီႊယိူဝ်ႊ ႁွင်ႈၵၢၼ်ၾၢႆႇ မႄးၶိူင်ႈဝိၼ် ၵေႃႉၼိုင်ႈ ဝႃႈၼႆ။
မိူဝ်ႈဝၼ်းတီႈ 23/11/2018 ၼၼ်ႉ ၼၢင်း Miss Houng Young Heo တင်း ၵူၼ်းၼွၵ်ႈမိူင်း 5 ၵေႃႉ လူင်းလဵၼ်ႈ ၼမ်ႉတူႈ ၸွမ်းၵၼ်သေ မၼ်းၼၢင်းလႆႈလႆလွင်ႈၸွမ်းၼမ်ႉတူႈၵႂႃႇ တေႃႇထိုင်ယၢမ်းလဵဝ် ပႆႇႁၼ်တူဝ် ဝႃႈၼႆ။
