ပျီႇတူႉၸိတ်ႉမဵဝ်ႉမ ၼမ်ႉၶမ်း ဢၼ်ၵႂႃႇပၵ်းသဝ်းႁဵတ်းၵၢၼ်ပၢႆးမၢၵ်ႈမီး တၢင်းထုင်ႉသၢမ်ၸဵင်ႇၶမ်း ၵျိင်းသၢၼ်းၵျေႃႉ ဝဵင်းပၢင်ႇသၢႆး ၸႄႈဝဵင်းမူႇၸေႊၼၼ်ႉ ၺႃးၸုမ်းယိပ်းၵွင်ႈၵၢင်ႇ ၸုမ်းၼိုင်ႈၶဝ်ႈယိုဝ်းလႄႈ ၵူၼ်းၸုမ်းပျီႇတူႉ ၸိတ်ႉ တၢႆ 3 ၵေႃႉ မၢတ်ႇ 2 ၵေႃႉ။
ဝၼ်းတီႈ 02/12/2018 ယၢမ်းၵၢင်ၶမ်ႈ 9 မူင်းပၢႆ ပျီႇတူႉၸိတ်ႉမဵဝ်ႉမၼမ်ႉၶမ်း ဢၼ်တူၵ်းပုၼ်ႈၽွၼ်း ပႂ်ႉယၢမ်း တီႈ လၢၼ်ႇၵိတ်ႉ ႁူဝ်ၼွင် လႅၼ်ၶႅၼ်ႈ တႆး – ၶႄႇ ဝၢၼ်ႈၵျိင်းသၢၼ်းၵျေႃႉ ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်း ႁွင်ႇၼၼ်ႉ ၺႃးၸုမ်းယိပ်း ၵွင်ႈၵၢင်ႇ ဢမ်ႇႁူႉၾၢႆႇ မူၵ်းယိုဝ်းသေ လႆႈလူႉတၢႆထင်တီႈ 3 ၵေႃႉ မၢတ်ႇၸဵပ်း 2 ၵေႃႉ။
ဢူးတွင်းထုၼ်း ၸုမ်းၸွႆႈထႅမ် ၵရူႉၼႃႇ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ မႃးထိုင်တီႈၼႆႈ မီးမွၵ်ႈ 10 မူင်း ၶိုင်ႈယဝ်ႉ။ ဢၼ်ၺႃးယိုဝ်းတၢႆတႄႉ ပဵၼ်ပျီႇတူႉၸိတ်ႉမဵဝ်ႉမၼမ်ႉၶမ်း ဢၼ်ပႂ်ႉယၢမ်းတီႈၵဵတ်ႉၼၼ်ႉ။ 3 ၵေႃႉ လူႉတၢႆ။ လိူဝ်ထႅင်ႈ 2 ၵေႃႉတႄႉ လႆႈမၢတ်ႇၸဵပ်း တႃႇၶဝ် 2 ၵေႃႉၼႆႉတႄႉ ဢဝ်ၵႂႃႇသူင်ႇၶိုၼ်ႈႁူင်းယႃမူႇၸေႊယဝ်ႉ ဢမ်ႇပေႃး ထိုင်တီႈလႆႈမႆႈၸႂ်” ဝႃႈၼႆ။
ဢွင်ႈတီႈဢၼ်ပျီႇတူႉၸိတ်ႉမဵဝ်ႉမ ၺႃးယိုဝ်းၼၼ်ႉ မၼ်းပဵၼ်တီႈလိၼ်ၶႅၼ်ႈ (ဝဵင်းပၢင်ႇသၢႆး) တႆး – ၶႄႇ (ဝဵင်းဝၼ်း တဵင်ႈ) ပဵၼ်တီႈရူတ်ႉၵႃး တၢင်ႇၶူဝ်းၵုၼ်ႇၶဝ်ႈဢွၵ်ႇ တီႈၼိုင်ႈ။
ယဝ်ႉၵေႃႈ တီႈၼၼ်ႈ မၼ်းပဵၼ်တီႈ ငဝ်ႈလုမ်းပျီႇတူႉၸိတ်ႉယူႇၵေႃႈၸႂ်ႈ ပဵၼ်တီႈၵိုတ်းၵႃး ဝႆႉၵႃးတၢင်ႇၵုၼ်ႇၵေႃႈၸႂ်ႈ၊ ပဵၼ်တီႈၵဵပ်းၶူဝ်းၶွင် ဝႆႉၶူဝ်းၶွင်ၵေႃႈၸႂ်ႈ။ ယွၼ်ႉၼၼ် ပျီႇတူႉၸိတ်ႉသမ်ႉ ပဵၼ်ၵေႃႉဢဝ်ႁူမ်ႇလူမ်ႈ ၾၢႆႇတပ်ႉသိုၵ်း လူင် ပွင်ၸိုင်ႈမၢၼ်ႈသမ်ႉ ပႂ်ႉၵဵပ်းၶွၼ်ႇ။ ၼႂ်းထုင်ႉမူႇၸေႊ ပၢင်ႇသၢႆး မီးၸုမ်းပျီႇတူႉၸိတ်ႉ လၢႆလၢႆၸုမ်း ၸုမ်းပျီႇတူႉၸိတ်ႉ မဵဝ်ႉမ၊ ပၢၼ်းသေး၊ လူင်ထၢင်၊ မိူင်းပေႃႈ၊ သႅင်ၵႅဝ်ႈ ၸဵမ်ၸိူဝ်းၼႆႉ။
ပူၼ်ႉမႃး မိူဝ်ႈလိူၼ်မၢတ်ႊၶျ် ပီၼႆႉ သိုၵ်းတဢၢင်း TNLA ၶဝ်ႈယိုဝ်း တႃႈႁိူဝ်း ၼွင်ယၢင်း ၸႄႈဝဵင်းမူႇၸေႊ ယၢမ်း ၵၢင်ၼႂ် မွၵ်ႈ 4 မူင်းၼၼ်ႉ ပလိၵ်ႈ၊ ပျီႇတူႉၸိတ်ႉလႄႈ ၵူၼ်းမိူင်း လႆႈလူႉတၢႆ 20 ၵေႃႉ မၢတ်ႇၸဵပ်း 26 ၵေႃႉ ဝႃႈၼႆ။
