ၽူႈတႅၼ်းသၽႃးၵူၼ်းမိူင်း ၸႄႈဝဵင်းသီႇပေႃႉ ၸၢႆးတၢၼ်ႉၸိၼ်ႇ တၢင်တူဝ်ၵူၼ်းမိူင်း ၵူၼ်းဝၢၼ်ႈတႃႈလူင် ၸႄႈဝဵင်း သီႇပေႃႉ ယိုၼ်ႈလိၵ်ႈ/ တၢင်ႇလိၵ်ႈထိုင် ဢူးဝိၼ်းမျိၼ်ႉ ၸွမ်ၸိုင်ႈမိူင်းႁူမ်ႈတုမ် တီႈၼေႇပျီႇတေႃႇ တုၵ်းယွၼ်းႁႂ်ႈၵိုတ်း ပႅတ်ႈ ၶူင်းၵၢၼ်သၢင်ႈၾၢႆ ၼႂ်းၼမ်ႉတူႈ ယွၼ်ႉဝႃႈ တေတုမ်ႉတိူဝ်ႉၵူၼ်းဝၢၼ်ႈ ၵူၼ်းသူၼ် ဝႃႈၼႆ။

ၸၢႆးထမ်းဢၢႆး ၽူႈပွင်ၵၢၼ် ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၼႂ်းၸိုင်ႈတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁဝ်း ၶႃႈ ၵူၼ်းဝၢၼ်ႈတႃႈလူင် ႁဵတ်းလိၵ်ႈသေ ယိုၼ်ႈတီႈ ၸွမ်ၸိုင်ႈ ဢူးဝိၼ်းမျိၼ်ႉၵမ်းသိုဝ်ႈၶႃႈယဝ်ႉ။ ႁႂ်ႈၵိုတ်းပႅတ်ႈၶူင်း ၵၢၼ်သၢင်ႈၾၢႆၼႂ်းၼမ်ႉတူႈ(ဢထႅတ်ႉယေးယႂႃႇ) ၾၢႆတွၼ်ႈ ၼိူဝ် ၼွၵ်ႈလိူဝ်ၼၼ်ႉ ႁဝ်းၶႃႈ ဢမ်ႇၶႂ်ႈ လႆႈသင်ၶႃႈ။ ဢၼ် ၶဝ်သၢင်ႈၾၢႆတွၼ်ႈၼိူဝ်ၼႆႉ ယွၼ်ႉပိူဝ်ႈ ဢမ်ႇမီးၵၢၼ်လူင်ႉလႅင်းၼႄၵူၼ်းမိူင်း။ ထႅင်ႈလွင်ႈ ၼိုင်ႈ ၵေႃႈ ႁဝ်းၶႃႈ ၵူၼ်း မိူင်း ဢမ်ႇၶႂ်ႈၶၢႆႉယၢၼ်တီႈယူႇႁဝ်းၶႃႈ။ ႁဝ်းၶႃႈ လႆႈပိုင်ႈဢိင်ၼမ်ႉလိၼ်ႁိၼ်ၽႃမႃး ယူႇၸွမ်းမၼ်း၊ ပျေႃႇၸွမ်းမၼ်း မၼ်းပၼ်ၼိူဝ်ႉလိူတ်ႈသၢႆၸႂ်ႁဝ်းၶႃႈ ႁဵတ်းႁႂ်ႈႁဝ်းၶႃႈ ၵူၼ်းမိူင်း ႁႃၵိၼ်ငၢႆႈ” ဝႃႈၼႆ။

လိၵ်ႈၼႆႉ ၸၢႆးတၢၼ်းၸိၼ်ႇ ၽူႈတႅၼ်းပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ ယိုၼ်ႈထိုင် ၸွမ်ၸိုင်ႈဢူးဝိၼ်းမျိၼ်ႉ ဝၼ်းတီႈ 03/12/2018။

ၵဵဝ်ႇလူၺ်ႈလွင်ႈၾၢႆၼမ်ႉတူႈတွၼ်ႈၼိူဝ်ၼႆႉ ယူႇတီႈၵူၼ်းဝၢၼ်ႈတႃႈလူင် လႆႈဢွၼ်ၵၼ်သၢၼ်ၶတ်း၊ ဢွၵ်ႇလိၵ်ႈပိုၼ် ၽၢဝ်ႇ၊ တုၵ်းယွၼ်းထိုင် ၽွင်းလူင်ၾၢႆႇ ႁႅင်းၾႆးၾႃႉလႄႈ ႁႅင်းထၢတ်ႈ ၸိူဝ်းၼႆႉၵေႃႈ မီးမႃးလၢႆပွၵ်ႈယဝ်ႉ ဢမ်ႇႁၼ် ၾၢႆႇလူင်ပွင်ၸိုင်ႈ တုမ်ႉတွပ်ႇလၢတ်ႈသင်မႃး။

မိူဝ်ႈဝၼ်းတီႈ 3/9/2018 ၼၼ်ႉၵေႃႈ ၸၢႆးၸိုၼ်ႈသႂ် (ၸၢႆးတၢၼ်ႉၸိၼ်ႇ) ၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် ၸႄႈ ဝဵင်းသီႇပေႃႉ လႆႈဢဝ်တၢင်း မႆႈဢူၵ်းမႆႈၸႂ်ပီႈၼွင်ႉၵူၼ်းမိူင်းပိုတ်ႇလၢတ်ႈၼႂ်းသၽႃး၊ တိုၵ်းသူၼ်း တုၵ်းယွၼ်းႁႂ်ႈ ၵိုတ်းယိုတ်း ပႅတ်ႈၾၢႆယေးယႂႃႇ တွၼ်ႈၼိူဝ် ၵွပ်ႈဝႃႈမီးလွင်ႈတုမ်ႉတိူဝ်ႉတူင်ႇဝူင်းၵူၼ်းလႄႈ ၾိင်ႈတိုၼ်းသၽႃဝ ပႃး ၸဵမ် လွင်ႈၾၢႆၸၢင်ႈတႅၵ်ႇၼၼ်ႉ ၵႂႃႇယဝ်ႉၵမ်းၼိုင်ႈ။

ၵဵဝ်ႇလူၺ်ႈလွင်ႈၼႆႉ ၵႅမ်ၽွင်းလူင်ၾၢႆႇၾႆးၾႃႉ ၻွၵ်ႊၻိူဝ်ႊဢူးထုၼ်းၼၢႆႇ တွပ်ႇၶိုၼ်း ၼႂ်းသၽႃး မိူဝ်ႈဝၼ်းတီႈ 06/09/ 2018 ဝႃႈ တေသိုပ်ႇႁဵတ်းသၢင်ႈၾၢႆၵႂႃႇ။ ၵၢၼ်သၢင်ႈၾၢႆၼၼ်ႉ တေၵႅတ်ႇၵင်ႈ ပၼ်ၽေးသၽႃဝ ၼမ်ႉၼွင်း၊ ဢၼ်တေ ထူမ်ႈႁိမ်းႁွမ်း သၢပ်ႇမႄႈၼမ်ႉၵဵဝ် (ဢေႇ ရႃႇဝတီႇ) တွၼ်ႈတၢင်းတႂ်ႈၸိူဝ်း ၼၼ်ႉပႃးဝႃႈၼႆ။ လွင်ႈၼႆႉမိူဝ်ႈဝၼ်းတီႈ 11/9/2018 ၼႆႉ ၼႂ်းသၽႃးၵေႃႈ ၵမ်ႉထႅမ်ပၼ်သဵင် တႃႇၽိူမ်ႉထႅမ် ငိုၼ်းတွင်း ၵႃႈၸႂ်ႉၸၢႆႇတႃႇၶူင်းၵၢၼ်ၾၢႆထႅင်ႈ။

ၾၢႆယေးယႂႃႇတွၼ်ႈၼိူဝ် တိုၵ်ႉသိုပ်ႇသၢင်ႈဝႆႉယူႇၼိူဝ်မႄႈၼမ်ႉတူႈ ၼႂ်းၸႄႈတွၼ်ႈၵျွၵ်ႉမႄးၸိုင်ႈတႆး ပွတ်းႁွင်ႇ။ ဢၢင်ႇ ၵဵပ်းၼမ်ႉ ဢၼ်ၽႅၼ်ႁၢင်ႈႁႅၼ်းဝႆႉၼၼ်ႉတၢင်းယၢဝ်း တေယိုင်ႈထိုင် 60 ၵီႊလူဝ်ႊမီႊတိူဝ်ႊပၢႆ လႄႈတေ လုပ်ႇထူမ်ႈ ပႅတ်ႈ ဝၢၼ်ႈတႃႈလူင် ဢၼ်မီးႁူဝ်ၵူၼ်း 653 ၵေႃႉ၊ တီႈလိၼ် ၽုၵ်ႇမၢၵ်ႇ ၸွၵ်းမၢၵ်ႇဝၢၼ် 637 ဢေႊၶိူဝ်ႊ၊ တီႈလိၼ် ၼႃး 140 ဢေႊၶိူဝ်ႊ၊ သူၼ်ႁႆႈတင်းၼမ် တင်းလၢႆပႃးၸဵမ်ဝတ်ႉ/ ၵျွင်း၊ ၵွင်းမူး၊ ႁူင်းႁဵၼ်း ၸိူဝ်းၼႆႉတင်းမူတ်း။