ဢိင်ၼိူဝ်သိုၵ်းၸၢဝ်းၶိူဝ်း ၸုမ်းယိပ်းၵွင်ႈၵၢင်ႇ ၼင်ႇၵၼ် ပိုတ်ႇပၢင်တိုၵ်းတေႃႇၵၼ်သေ ၵူၼ်းဝၢၼ်ႈၼႂ်းဢိူင်ႇၼႃးမၢၵ်ႇ ၶေႃ 795 ၵေႃႉ ဢွၼ်ၵၼ်ပၢႆႈသိုၵ်း မႃးမီးဝႆႉၼႂ်း ဝဵင်းသီႇပေႃႉ ဝႃႈၼႆ။
ႁူဝ်လိူၼ်ၻီႊသႅမ်ႊၿိူဝ်ႊၼႆႉမႃး ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼင်ႇၵၼ် ပဵၼ်ပၢင်တိုၵ်း ၵၼ် တၢင်းဢိူင်ႇၼႃးမၢၵ်ႇၶေႃ ၼႂ်းၵႄႈဝၢၼ်ႈတူၼ်ႈၵႅင်း လႄႈ ဝၢၼ်ႈၶၢႆးႁဵဝ်း ၾၢႆႇတူၵ်းတၢင်းၵႃးၼမ်ႉလၼ်ႈ ၸႄႈဝဵင်း သီႇပႃႉ ၸိုင်ႈတႆးပွတ်းႁွင်ႇ။ ၵူၼ်းဝၢၼ်ႈၸၢၼ်း၊ ၼႂ်းလူင်၊ ဝၢၼ်ႈၼႃး၊ ဝၢၼ်ႈၶုမ်ႇ၊ ဝၢၼ်ႈၵျွင်းလႄႈ ၵွင်းဝဵင်း ၸိူဝ်းၼႆႉ ဢွၼ်ၵၼ်ပၢႆႈၽေးသိုၵ်း ဢွၵ်ႇမႃးသွၼ်ႈဝႆႉတီႈဝတ်ႉၶၢႆးႁဵဝ်း၊ ဝတ်ႉဝၢၼ်ႈၸၢၼ်းလႄႈ ဝတ်ႉဝၢၼ်ႈၸၢၼ်း(ပူႇတႃႇ) ၸိူဝ်းၼႆႉ။
ၸၢႆးထိၼ်ႇဢွင်ႇ ၵူၼ်းပၢႆႈၽေးသိုၵ်း ဢၼ်ပၢႆႈမႃးတီႈ ဝတ်ႉဝိႁၢရ်ၶၢႆးႁဵဝ်း လၢတ်ႈတီႈၽူႈတွႆႇႁွၵ်ႈဝႃႈ “ ၶူဝ်းလၢႆး တင်း ၶူဝ်းၶဵဝ်ယဝ်ႉ ဢၼ်ပတ်ႉၵၼ်။ မိူဝ်ႈဝၼ်းတီႈ 1 ယၢမ်းၵၢင်ၶမ်ႈ 7 မူင်း ပဵၼ်ပၢင်တိုၵ်းၵၼ် ၵူၼ်းဝၢၼ်ႈဢွၼ်ၵၼ် ပၢႆႈၵႂႃႇ သွၼ်ႈဝႆႉတီႈဝတ်ႉတင်းၶိုၼ်း။ လင်ၼၼ်ႉ သဵင်ၵွင်ႈယဵၼ်ၵႂႃႇတင်းၶိုၼ်းသေ ထိုင်မႃး ဝၼ်းတီႈ 2 ယၢမ်းၵၢင်ၼႂ် ပၢင် တိုၵ်းတႄႇပဵၼ်ထႅင်ႈ ၵူၼ်းဝၢၼ်ႈဢွၼ်ၵၼ်ပၢႆႈဢွၵ်ႇမႃးထႅင်ႈတီႈဝတ်ႉ။ ယၢမ်းဝၢႆးဝၼ်း 3 မူင်း ပၢင်တိုၵ်းပဵၼ်ထႅင်ႈ။ မိူဝ်ႈၼႆႉ ဝၼ်းတီႈ 3/12/2018 ၵၢင်ၼႂ်ၼႆႉသမ်ႉ ပဵၼ်တၢင်းဝၢၼ်ႈၸၢၼ်းထႅင်ႈ သဵင်ၵွင်ႈတိုၵ်ႉလင်ယူႇ” ဝႃႈၼႆ။
ၵူၼ်းဝၢၼ်ႈပၢႆႈမႃးယူႇ တီႈဝတ်ႉၶၢႆးႁဵဝ်း၊ ဝတ်ႉဝၢၼ်ႈၸၢၼ်းလႄႈ ဝတ်ႉဝၢၼ်ႈၸၢၼ်း (ပူႇတႃႇ) ၸဵမ်ၸိူဝ်းၼႆႉ။ ၵူၼ်းပၢႆႈ ၽေးသိုၵ်း ဢၼ်သွၼ်ႈဝႆႉတီႈဝတ်ႉဝိႁၢရ်ၶၢႆးႁဵဝ်း ပဵၼ်ၵူၼ်းဝၢၼ်ႈၶၢႆးႁဵဝ်း လင် ႁိူၼ်း 85 လင်၊ ၸၢႆး 192 ၵေႃႉ၊ ယိင်း 188 ၵေႃႉ ႁူမ်ႈၵၼ် 380 ၵေႃႉ။ တီႈဝတ်ႉဝၢၼ်ႈၸၢၼ်းသမ်ႉ ပဵၼ်ၵူၼ်းဝၢၼ်ႈ ဝၢၼ်ႈၸၢၼ်း၊ ဝၢၼ်ႈၼႃး၊ ၵွင်းဝဵင်း၊ ဝၢၼ်ႈၶုမ်ႇ၊ ဝၢၼ်ႈၵျွင်းလႄႈ ဝၢၼ်ႈၼႂ်းလူင် လင်ႁိူၼ်း 101 လင်၊ ၸၢႆး 173 ၵေႃႉ၊ ယိင်း 226 ၵေႃႉ ႁူမ်ႈၵၼ် 399 ၵေႃႉ။ လိူဝ်ၼၼ်ႉ တီႈဝၢၼ်ႈၸၢၼ်း (ပူႇတႃႇ) သမ်ႉ လင်းႁိူၼ်း 4 လင်၊ ၸၢႆး 6 ၵေႃႉ၊ ယိင်း 10 ၵေႃႉ ႁူမ်ႈၵၼ် 16 ၵေႃႉ ဝႃႈၼႆ။
တၢင်းပွတ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉၼႆႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈ၊ SSPP လႄႈ သိုၵ်း RCSS တူင်ႉၼိုင်ၵႂႃႇမႃးယူႇတႃႇသေႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ