ၼႂ်းၸႄႈဝဵင်းၼမ်ႉတူႈ ၵူၼ်းဝၢၼ်ႈပၢင်ၵုတ်ႇ တင်း ဝၢၼ်ႈပၢင်သေႃႉ 200 ပၢႆ ၸိူဝ်းပၢႆႈၽေးသိုၵ်း မႃးသွၼ်ႈဝႆႉတီႈ ဝၢၼ်ႈဝတ်ႉဝိႁၢရ်မၢၼ်ႈၸၢမ် ၼၼ်ႉ ၶိုၼ်းဢွၼ်ၵၼ်ပွၵ်ႈၶိုၼ်းယေးၽႂ်သေတႃႉတိုၵ်ႉၵူဝ်ၽေးသိုၵ်းယူႇ ဝႃႈၼႆ။
ဝၼ်းတီႈ 30/11/2018 ၵူၼ်းဝၢၼ်ႈပၢင်ၵုတ်ႇ 141 ၵေႃႉ၊ ၵူၼ်းဝၢၼ်ႈပၢင်သေႃႉ 65 ၵေႃႉ ႁူမ်ႈတင်းမူတ်း 206 ၵေႃႉ ဢၼ် မႃး သွၼ်ႈဝႆႉတီႈ ဝတ်ႉဝိႁၢရ်လူင်ဝၢၼ်ႈၸၢမ် ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇၼၼ်ႉ ၶိုၼ်းဢွၼ်ၵၼ်ပွၵ်ႈႁိူၼ်း ၽႂ် သေတႃႉ တိုၵ်ႉငိၼ်းၶၢဝ်ႇသိုၵ်း ၸၢဝ်းၶိူဝ်း၊ သိုၵ်းလူင်ပွင်ၸိုင်ႈ ၵႆႉလတ်းၵႂႃႇ လတ်းမႃးယူႇလႄႈ မႆႈၸႂ်လွင်ႈႁူမ်ႇ လူမ်ႈဝႃႈ ၼႆ။
လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၵေႃၵမ်ၵၢၼ် ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်း 200 ပၢႆ ဢၼ်ပၢႆႈမႃးသွၼ်ႈဝႆႉတီႈ ဝတ်ႉမၢၼ်ႈၸၢမ်ၼၼ်ႉ ၶိုၼ်းဢွၼ်ၵၼ်ပွၵ်ႈမူတ်းယဝ်ႉ တီႈဝတ်ႉ တႄႉဢမ်ႇၵိုတ်းၽႂ်ယဝ်ႉ။ တေဝႃႈ ၼႂ်းပိုၼ်ႉတီႈယဵၼ်ၼိမ်ဝႆႉယဝ်ႉႁႃႉ ဢၼ်ဝႃႈၼၼ်ႉတႄႉၵေႃႈ ပႆႇၼိမ်ၼင်ႇၵဝ်ႇ တင်းၵူဝ်တင်းပွၵ်ႈယဝ်ႉ။ ၵူၼ်းဝၢၼ်ႈတႄႉ ႁူႉဝႃႈၵူဝ်ၵၼ်ၶႃႈဢေႃႈ မွင်းဝႃႈသဵင်ၵွင်ႈလၼ် ၵူၺ်း ပေႃးၼႅတ်ႈ ဢွၼ် ၵၼ်ပၢႆႈယဝ်ႉ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉမၢၼ်ႈၸၢမ်သမ်ႉ ၵူၼ်းပၢင်ၵုတ်ႇ လင်ႁိူၼ်း 39 လင်၊ ၸၢႆး 55 ၵေႃႉ၊ ယိင်း 86 ၵေႃႉ။ ၵူၼ်းဝၢၼ်ႈပၢင်သေႃႉ လင်ႁိူၼ်း 21 လင်၊ ၸၢႆး 25 ၵေႃႉ၊ ယိင်း 40 ၵေႃႉ ႁူမ်ႈၵၼ် တင်း 206 ၵေႃႉ။
ပၢင်တိုၵ်းၼႆႉ ယွၼ်ႉသိုၵ်း RCSS တင်း သိုၵ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ် ႁိမ်းဝၢၼ်ႈပၢင်ၵုတ်ႇ တင်း ဝၢၼ်ႈ ပၢင်သေႃႉ တႄႇဢဝ် ဝၼ်းတီႈ 26-27 လိူၼ်ၼူဝ်ႊဝႅမ်ႊၿိူဝ်ႊ 2018 ၼႆႉမႃး။ သိုၵ်းလူင်ပွင်ၸိုင်ႈမၢၼ်ႈတႄႉ လဵပ်ႈၵႂႃႇ လဵပ်ႈမႃးသေပႂ်ႉတူၺ်းၵူၺ်း ဝႃႈၼႆ။
