ၵေႃႇမတီႈႁူင်းႁဵၼ်း တူင်ႇၵူၼ်းတႆး လၢႆးၶႃႈ လူင်းၵူတ်ႇထတ်း တႃႇသိုဝ်ႉတီႈလိၼ် 14 ဢေႊၶိူဝ်ႊ ဝၢင်းၽႅၼ်ၵေႃႇသၢင်ႈ ႁူင်းႁဵၼ်း လႄႈ ယိုၼ်ႈမိုဝ်းတႃႇႁပ်ႉၸွႆႈတၢၼ်း ၼႂ်းၵၢၼ်ၵေႃႇသၢင်ႈ ဝႃႈၼႆ။

ဝၼ်းတီႈ 02/12/2018 ၵေႃႇမတီႇႁူင်းႁဵၼ်းတူင်ႇၵူၼ်းတႆး ဢွၼ်ၵၼ်လူင်းပိုၼ်ႉတီႈၵူတ်ႇထတ်း တီႈလိၼ်ၶွင် ၽူႈ တႅၼ်းသၽႃးၵူၼ်းမိူင်းၵေႃႉၵဝ်ႇ လုင်းၸၢႆးမူၼ်း ဢၼ်မီးဝႆႉတီႈပွၵ်ႉ 4 ၾၢႆႇၸၢၼ်းလၢႆးၶႃး ၸပ်းၾင်ႇၼမ်ႉတွင်း ၸႄႈ ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တင်းမူတ်း တေသိုဝ်ႉတႃႇ 14 ဢေႊၶိူဝ်ႊ/ ၼိုင်ႈဢေႊၶိူဝ်ႊ လႂ် 10 သႅၼ်ပျႃး တေႃႈလဵဝ် ယၢပ်ႇၽိုတ်ႇလွင်ႈငိုၼ်း တႃႇတေသိုဝ်ႉတီႈလိၼ် ဝႃႈၼႆ။

ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ (1) ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈ လိၼ်ၼၼ်ႉ တင်းမူတ်း 14 ဢေႊၶိူဝ်ႊ တႃႇ 4 ဢေႊၶိူဝ်ႊၼၼ်ႉ ၼႃးႁိူၼ်းလုင်းၸၢႆးမူၼ်း လူႇတၢၼ်းပၼ်။ ဢၼ်ႁဝ်း ၶႃႈလူဝ်ႇသိုဝ်ႉသမ်ႉ တႃႇ 10 ဢေႊၶိူဝ်ႊ။ ၼိုင်ႈဢေႊၶိူဝ်ႊလႂ်သမ်ႉ 10 သႅၼ်ပျႃး။ မိူဝ်ႈဝၼ်းတီႈ 2 လိူၼ်ၼႆႉ ႁဝ်းၶႃႈ လႆႈပၼ်ဝႆႉ 20 သႅၼ်ပျႃးၵူၺ်း။ ၵိုတ်းထႅင်ႈ 80 သႅၼ်ပျႃး။ ယဝ်ႉၵေႃႈ ပေႃးႁဝ်းၶႃႈသိုဝ်ႉယဝ်ႉၸိုင် လူဝ်ႇလႆႈလွမ်ႉႁူဝ်ႉ ႁဵတ်းႁူဝ်ႉထႅင်ႈၼႆ တင်းမူတ်း တေတူၵ်းထႅင်ႈ မွၵ်ႈ 30 – 40 သႅၼ်ပျႃး ၵႃႈၼႆႉ။ တင်းမူတ်း ဢၼ်ႁဝ်းၶႃႈ လူဝ်ႇတႄႉ မွၵ်ႈ 150 သႅၼ်ပျႃးၵႃႈၼႆႉယဝ်ႉ။ ဢၼ်ၼႆႉ တွၼ်ႈတႃႇလွင်ႈသိုဝ်ႉတီႈလိၼ်။ တွၼ်ႈတႃႇတေၵေႃႇသၢင်ႈႁဵတ်း ႁူင်းႁဵၼ်းပႆႇ ပႃး” ဝႃႈၼႆ။

သိုပ်ႇလၢတ်ႈဝႃႈ “ ယိူင်းဢၢၼ်း ဢၼ်ႁဝ်းၶႃႈ တေႁဵတ်းႁူင်းႁဵၼ်းတူင်ႇၵူၼ်းတႆး တီႈလၢႆးၶႃႈၼႆႉ ပေႃးႁဝ်းၶႃႈ မီးတီႈ လိၼ်ယဝ်ႉ ႁဝ်းတေႁဵတ်းႁူင်းၵေႃႇၵၢႆႇ၊ ယဝ်ႉၵေႃႈ တေပိုတ်ႇပၢင်သွၼ်ပၼ်ၵူၼ်းၼုမ်ႇ။ ထႅင်ႈလွင်ႈၼိုင်ႈ တီႈၼႆႈ ၼႆႉ တႃႇတေပိုတ်ႇသွၼ်ပၼ် လိၵ်ႈတႆး – လိၵ်ႈဢင်းၵိတ်း ပၼ်လုၵ်ႈဢွၼ်ႇ ဝၢၼ်ႈၼွၵ်ႈၼႃးပၢင်ႇႁဝ်း ဢၼ်ဢမ်ႇလႆႈသွၼ် လိၵ်ႈ ႁဵၼ်းလိၵ်ႈသင်ၼၼ်ႉ ႁႂ်ႈၸၢင်ႈလႆႈမႃးႁဵၼ်းသွၼ်ဢဝ်။ လိူဝ်ၼၼ်ႉ ယိူင်းဢၢၼ်းဝႆႉထႅင်ႈလၢႆလွင်ႈ လၢႆတၢင်း တႃႇ ပူၵ်းပွင် လုၵ်ႈဢွၼ်ႇတႆးႁဝ်းၶႃႈ။ ဢွၼ်တၢင်းသုတ်းတႄႉ ႁဝ်းၶႃႈ တေသိုဝ်ႉတီႈလိၼ်ဝႆႉ” ဝႃႈၼႆ။

ပေႃးထိုင်မႃး ဝၼ်းတီႈ 5 လိူၼ်ၼႆႉၸိုင် ယူႇတီႈၵေႃႇမတီႇ ႁူင်းႁဵၼ်းတူင်ႇၵူၼ်းတႆး တင်း ၾၢႆႇတႅၵ်ႈတီႈလိၼ် တေ လူင်းတႅၵ်ႈတီႈလိၼ် ႁႂ်ႈၶဝ်ႈပဵၼ်တၢင်းၵၢၼ်ၵႂႃႇ ဝႃႈၼႆ။

ၸၢႆးၵျေႃႇၸေႇယ လၢတ်ႈဝႃႈ “ ႁဝ်းၶႃႈ ယွၼ်းလူႇၶၢမ်ႇ ၽူႈမီးၼမ်ႉၸႂ်ၸေႇတၼႃႇ တီႈၸမ်ၵႆ ၵူႈၵေႃႉၶႃႈ သင်ဝႃႈ ပီႈၼွင်ႉၽူႈမီးၼမ်ႉၸႂ်ၸေႇတၼႃႇ ၶႂ်ႈၵမ်ႉထႅမ် လူႇတၢၼ်းမႃး/ တွင်ႈထၢမ် လၢႆးႁူဝ်ယွႆႈမၼ်း ၵပ်းသိုပ်ႇမႃးလႆႈ တီႈ မၢႆၾူၼ်းၶႃႈႁဝ်း 094-28310 035, 097-65310035 ၼႆႉၵေႃႈလႆႈ” ဝႃႈၼႆ။