သိုၵ်း RCSS တင်း သိုၵ်း SSPP ယိုဝ်းၵၼ်လႄႈ ၵူၼ်းဝၢၼ်ႈပႅၼ်ႇဝႅၼ်ႈ မိူင်းၵိုင် 200 ပၢႆ ဢွၼ်ၵၼ်လႆႈပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉမၢၵ်ႇၶီႈၼူၵ်ႉ(ဝတ်ႉထမ်မဝိႁႃရ) တေႃႇထိုင် ယၢမ်းလဵဝ်ပႆၸၢင်ႈပွၵ်ႈ ဝႃႈၼႆ။
ဝၼ်းတီႈ 30/11/2018 ယၢမ်းၵၢင်ၼႂ် သိုၵ်းတႆး RCSS တင်း SSPP ပဵၼ်တၢင်းတိုၵ်းၵၼ် တီႈႁိမ်းဝၢၼ်ႈပႅၼ်ႇဝႅၼ်ႈ ဢိူင်ႇႁူဝ်ၶၢႆး ၵူၼ်းဝၢၼ်ႈပႅၼ်ႇဝႅၼ်ႈ မွၵ်ႈ 250 ၵေႃႉ လႆႈဢွၼ်ၵၼ်ပၢႆႈမႃးသွၼ်ႈဝႆႉတီႈဝတ်ႉမၢၵ်ႇၶီႈၼူၵ်ႉ(ဝတ်ႉထမ် မဝိႁႃရ) ၼႂ်းဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ တေႃႇထိုင် ယၢမ်းလဵဝ်ပႆႇ ပဵၼ် ပွၵ်ႈႁိူၼ်း ယွၼ်ႉငဝ်းလၢႆးၼႂ်းပိုၼ်ႉတီႈပႆႇၼိမ် ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်တီႈဝတ်ႉမၢၵ်ႇၶီႇၼူၵ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢမ်ႇတၼ်းလႆႈၶူဝ်း လဵင်းသင်ၶႃႈ။ လႆႈငိၼ်းသဵင်ၵွင်ႈတႅၵ်ႇၵေႃႈ ႁဝ်းၶႃႈ ဢွၼ်ၵၼ်ပၢႆႈဢွၵ်ႇမႃးၵမ်းလဵဝ်ၶႃႈယဝ်ႉ။ ဢၼ်ပဵၼ်ပၢင်တိုၵ်း ၵၼ်တႄႉ သိုၵ်းၶူဝ်းၶဵဝ် တင်း ၶူဝ်းလၢႆးၶႃႈ။ ႁဝ်းၶႃႈ ၵူဝ်မၢၵ်ႇလူင်တူၵ်းသႂ်ႇသေ ၼႅတ်ႈဢွၼ်ၵၼ်ပၢႆႈဢွၵ်ႇမႃး။ လႆႈ ငိၼ်းဝႃႈ တေႃႈလဵဝ်ၼႆ သိုၵ်းၶူဝ်းလၢႆးယူႇၼႂ်းဝၢၼ်ႈ။ သိုၵ်းၶူဝ်းၶဵဝ်သမ်ႉ တူင်ႉၼိုင်ယူႇဝႆႉ ၼွၵ်ႈဝၢၼ်ႈႁဵတ်းၼႆ” ဝႃႈၼႆ။
မိူဝ်ႈလဵဝ် ပဵၼ်ၽွင်းၵူၼ်းဝၢၼ်ႈ လူဝ်ႇဢဝ်ၶဝ်ႈၼႆသေ ယွၼ်ႉသိုၵ်းၸၢဝ်းၶိူဝ်းၼင်ႇၵၼ် ပဵၼ်ပၢင်တိုၵ်းတေႃႇၵၼ်လႄႈ ၵူၼ်းဝၢၼ်ႈလႆႈပွႆႇၽႃႈပႅတ်ႈတူင်ႈႁႆႈလွၵ်းၼႃးသေ ဢွၼ်ၵၼ်မႃးမူၵ်းသွၼ်ႈဝႆႉ တီႈဝတ်ႉမၢၵ်ႇၶီႇၼူၵ်ႉ ယွၼ်ႉငဝ်း လၢႆးၼႂ်းပိုၼ်ႉတီႈပႆႇယဵၼ် ဝႃႈၼႆ။
ၸဝ်ႈတူၼ်ၶူး ဢၵ်ႉၵသေၼ ၵျွင်းလွႆလႅင် မိူင်းၵိုင် ၽူႈပွင်ၵၢၼ်သင်ၶၼႃယၵ ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇ ႁွၵ်ႈဝႃႈ “ မိူဝ်ႈၽုၵ်ႈ ႁဝ်းၶႃႈ ၸုမ်းသင်ၶၸဝ်ႈ မိူင်းၵိုင်၊ ၵူၼ်းမိူင်း၊ ၽူႈတႅၼ်းလႄႈ ႁွင်ႈၵၢၼ်လူင်ပွင်ၸိုင်ႈ တေဢွၼ် ၵၼ်ၵႂႃႇသူႇၸႂ်း ၸွႆႈၶဝ်ႈၼမ်ႉတၢင်းၵိၼ်လႄႈ ၶူဝ်းၼုင်ႈတင်းဝႆ” ဝႃႈၼႆ။
ပူၼ်ႉမႃးလိူၼ်ၵျုၼ်ႊ ဝၼ်းတီႈ 15 ပီ 2018 ၼႆႉ သိုၵ်းတႆး 2 ၸုမ်း RCSS/SSA လႄႈ SSPP/SSA လႆႈထဵင် မေႃးၵၼ် သေ လႆႈယိုဝ်းၵၼ် တီႈတႃႈၼမ်ႉ ဝၢၼ်ႈပႅၼ်ႇဝႅၼ်ႈ ဢိူင်ႇႁူဝ်ၶၢႆး ၸႄႈဝဵင်းမိူင်းၵိုင်။ မိူဝ်ႈၼၼ်ႉ သိုၵ်း RCSS/SSA လူႉ တၢႆ 1 ၵေႃႉ၊ ၸဝ်ႈသၢင်ႇဢွၼ်ႇ ၵျွင်းပႅၼ်ႇဝႅၼ်ႈ မၢတ်ႇၸဵပ်းလိူဝ်ႁႅင်း။ ၽွင်းၼၼ်ႉၵေႃႈ ၸုမ်းသင်ၶ ၸဝ်ႈတူင်ႇဝဵင်းမိူင်း ၵိုင် ဢွၵ်ႇလိၵ်ႈမဵတ်ႉတႃႇထိုင် သိုၵ်းတႆး 2 ၸုမ်း ယႃႇႁႂ်ႈလႆႈယိုဝ်းၵၼ်ၼႆၵမ်းၼိုင်ႈယဝ်ႉ။ ၵူၺ်းၵႃႈ ပၼ်ႁႃဢမ်ႇယဝ်ႉ တူဝ်ႈၵႂႃႇသေ ပၢင်တိုၵ်းၵေႃႈမီးမႃး ၵူႈဝၼ်း။
