ၸုမ်းတူင်ႉၼိုင်တူင်ႇဝူင်းၵူၼ်း ၼမ်ႉၶမ်း 6 ၸုမ်း တႅမ်ႈလိၵ်ႈထိုင် ၸွမ်ၸိုင်ႈမိူင်းႁူမ်ႈတုမ် ႁႂ်ႈၵိုတ်းႁူင်းၸၢၵ်ႈႁဵတ်းၸေႈ ဢၼ်တႄႇပၼ်ႇၵၢၼ် ႁိမ်းၾင်ႇၼမ်ႉမၢဝ်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။

ဝၼ်းတီႈ 20/11/2018 ၸုမ်းတူင်ႉၼိုင်တူင်ႇဝူင်းၵူၼ်း ၼႂ်းၼမ်ႉၶမ်း 6 ၸုမ်း ဢွၼ်ၵၼ် တႅမ်ႈလိၵ်ႈသၢၼ်ၶတ်း လွင်ႈ ႁူင်းၸၢၵ်ႈႁဵတ်းၸေႈ တီႈၸွမ်ၸိုင်ႈလႄႈ သၽႃး။ ၼႂ်းလိူၼ်ၼူဝ်ႊဝႅမ်ႊၿိူဝ်ႊၼႆႉၵူၺ်း လႆႈတၢင်ႇလိၵ်ႈၸူး တီႈၽူႈ ၵွၼ်း ၸႄႈတွၼ်ႈမူႇၸေႊထႅင်ႈမိူၼ်ၵၼ် ဝႃႈၼႆ။

သြႃႇၸၢႆးဢွင်ႇဝုၼ်း ႁူဝ်ပဝ်ႈၾၢႆႇၵႅတ်ႇၵင်ႈၶူဝ်းၶွင်လႄႈ လွင်ႈတီႈၵိုၵ်းပိုၼ်း ၸႄႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈ ဝႃႈ “ တီႈတႄႉမၼ်း ႁွင်ႈ ၵၢၼ်ၾၢႆႇသဵၼ်ႈတႃႈသၢႆတၢင်း ၶွင်လူင်ပွင်ၸိုင်ႈ ႁၢမ်ႈႁႄႉဝႆႉၸဵမ်လႂ်ယဝ်ႉ။ တီႈၶူဝ်ၼမ်ႉမၢဝ်း ၼႆႉ တၢင်းၼိူဝ်ၶူဝ် 1 လၵ်း။ တၢင်းတႂ်ႈၶူဝ် 3 လၵ်း တေဢမ်ႇလႆႈၵေႃႇသၢင်ႈႁူင်းၸၢၵ်ႈသင်။ ယူႇတီႈႁူင်းၸၢၵ်ႈႁဵတ်း ၸေႈ ၼႆႉ ၶဝ်ဢမ်ႇႁဵတ်း ၸွမ်း။ မိူဝ်ႈပီပူၼ်ႉမႃးၼၼ်ႉ ၶဝ်ဢမ်ႇလၢတ်ႈသင် ပၼ်ၾၢင်ႉသတိၵူၼ်းမိူင်းသင်ၶဝ်ၵေႃႇ သၢင်ႈ ႁဵတ်းႁူင်းၸၢၵ်ႈမႃး။ ယူႇတီႈၵူၼ်းမိူင်း လႆႈတႅမ်ႈလိၵ်ႈသၢၼ်ၶတ်း ပၼ်ၾၢင်ႉၶဝ်ဝႆႉသေ ၶဝ်ၵေႃႈဝႃႈ ၶဝ်တေ ၸၢမ်းတူၺ်းၵူၺ်း။ ၵဵဝ်ႇလူၺ်ႈ လွင်ႈၼႆႉ မိူဝ်ႈပီပူၼ်ႉ ယူႇတီႈၽူႈမီးပုၼ်ႈၽွၼ်းလႄႈ လူင်ပွင်ၸိုင်ႈမိူင်းႁူမ်ႈတုမ် လႆႈ တႅမ်ႈ လိၵ်ႈသူင်ႇပၼ်ႁူင်းၸၢၵ်ႈ ႁဵတ်းၸေႈယဝ်ႉ။ ၵူၺ်းၵႃႈ ၶဝ်ဢမ်ႇႁဵတ်းၸွမ်း ၶဝ်ဢမ်ႇပၼ်ၾၢင်ႉလၢတ်ႈၵူၼ်းမိူင်း သင် ၶဝ်ၸၢမ်းတူၺ်းဢၼ်ဝႃႈ ၼၼ်ႉ ဢမ်ႇၸႂ်ႈ ၶဝ်မႃးသၢင်ႈႁဵတ်းႁူင်းၸၢၵ်ႈၵမ်းလဵဝ်” ဝႃႈၼႆ။

သိုပ်ႇလၢတ်ႈဝႃႈ သင်ဝႃႈၶဝ်သၢင်ႈႁူင်းၸၢၵ်ႈႁဵတ်းၸေႈၼႆႉမႃးယဝ်ႉၸိုင် ၼမ်ႉဢၼ်ၶဝ်တေပွႆႇဢွၵ်ႇတီႈႁူင်းၸၢၵ်ႈ ၶဝ်ၼၼ်ႉ တေပဵၼ်ၼမ်ႉမီးၵွင်ႉသေ လႆၶဝ်ႈၼႂ်းၼမ်ႉမၢဝ်း။ ၵမ်းၼႆႉ ၼႂ်းၼမ်ႉမၢဝ်း တေဢမ်ႇလီ။ ယဝ်ႉၵေႃႈ တေ တုမ်ႉတိူဝ်ႉလွင်ႈပၢႆးယူႇလီၵူၼ်းမိူင်း။ တုမ်ႉတိူဝ်ႉၾိင်ႈတိုၼ်းပဵၼ်။ ယွၼ်ႉၼၼ်လႄႈ ႁဝ်းၶႃႈ ၵူၼ်းမိူင်း တေလႆႈႁပ်ႉ ၽွၼ်းပၢင်ႈၽေးႁုၵ်းႁၢႆႉ။ သဵၼ်ႈတၢင်းၵေႃႈတေလူႉ။ ၵူၼ်းမိူင်းၵေႃႈ ဢမ်ႇႁၼ်လီၸွမ်း ႁဝ်းၶႃႈ လႆႈသၢၼ်ၶတ်းမႃး ၵူႈၵမ်းၵမ်းယဝ်ႉ လွင်ႈၶဝ်တေႁဵတ်းႁူင်းၸၢၵ်ႈၸေႈၼႆႉ” ဝႃႈၼႆ။

ႁူင်းၸၢၵ်ႈႁဵတ်းၸေႈၼႆႉ ပဵၼ်ၶွင်ပျီႇတူႉၸိတ်ႉလွႆလွမ်ႉ သႂ်ႇၸိုဝ်ႈဝႃႈ (မြန်မြားဦး ကုမ္မဏီ) ၼႆသေ ၵေႃႇသၢင်ႈႁဵတ်းမႃး မိူဝ်ႈပီ 2017 ၼႂ်းၵႄႈၶူဝ်ၼမ်ႉမၢဝ်း ဢၼ်မႂ်ႇလႄႈ ၶူဝ်ၵဝ်ႇ ၼႂ်းဢိူင်ႇႁိၼ်လူင် ဝၢၼ်ႈႁၢၼ်ၵၢမ်း ဝႃႈၼႆ။

ၸၢႆးဢၢႆႈ ၵူၼ်းၼမ်ႉၶမ်း လၢတ်ႈဝႃႈ“ ႁူင်းၸၢၵ်ႈၼႆႉ လုၵ်ႉတၢင်းမိူင်းၶႄႇသေ ၶၢႆႉၶဝ်ႈမႃးႁဵတ်း။ ယွၼ်ႉ ၶဝ်ႁဵတ်းတၢင်း မိူင်းၶႄႇလႄႈ မၼ်းတုမ်ႉတိူဝ်ႉသၽႃဝၾိင်ႈတိုၼ်းပဵၼ်သေ လူင်ပွင်ၸိုင်ႈမိူင်းၶႄႇ လႆႈလိုပ်ႈပႅတ်ႈ ဢမ်ႇပၼ်ႁဵတ်း။ တေႃႈလဵဝ်သမ်ႉ ၶဝ်ႈမႃးတင်ႈႁူင်းၸၢၵ်ႈတၢင်းမိူင်းတႆးႁဝ်းၼႆ သင်ဝႃႈ လူင်ပွင်ၸိုင်ႈမိူင်းႁဝ်း ဢမ်ႇၸွႆႈထႅမ်ၼႆ ႁဝ်းၶႃႈ ၵူၼ်းမိူင်းၼမ်ႉၶမ်းတေထူပ်းလွင်ႈယၢပ်ႇၽိုတ်ႇတႄႉတႄႉ။ ႁူင်းၸၢၵ်ႈႁဵတ်းၸေႈ ဢၼ်မႃးတင်ႈ ၼႂ်းဝဵင်းၼမ်ႉၶမ်း ႁဝ်းၶႃႈၼႆႉ ပဵၼ်ႁူင်းၸၢၵ်ႈဢွၼ်တၢင်းပိူၼ်ႈ။ တီႈမူႇၸေႊတႄႉၵေႃႈ မီးၼမ်။ တီႈမူႇၸေႊၵေႃႈ ၵူၼ်းမိူင်းလႆႈ ၶၢမ်ႇ တၢမ်ႇၵၼ်မႃး မီးတင်းၼမ်။ ႁဝ်းၶႃႈၵူၼ်းမိူင်း တေႁူမ်ႈၵၼ်သေ သၢၼ်ၶတ်းၵႂႃႇထႅင်ႈ လွင်ႈႁူင်းၸၢၵ်ႈႁဵတ်း ၸေႈၼႆႉ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းၼမ်ႉၶမ်း ဢွၼ်ၵၼ်သၢၼ်ၶတ်း တၢင်ႇလိၵ်ႈၸူးလၢႆလၢႆတီႈ ယွၼ်ႉဝႃႈ မၼ်းတေတုမ်ႉ တိူဝ်ႉသၽႃဝၾိင်ႈတိုၼ်းပဵၼ် မိူဝ်ႈပီ 2017 လိူၼ်ၼူဝ်ႊဝႅမ်ႊၿိူဝ်ႊၼၼ်ႉ ၵူၼ်းမိူင်းတႅမ်ႈလိၵ်ႈသူင်ႇပၼ် တီႈၽူႈၵွၼ်း ၸႄႈဝဵင်းၼမ်ႉၶမ်းမႃးယဝ်ႉ ၵမ်းၼိုင်ႈ။ မိူဝ်ႈပီ 2018 လိူၼ်မၢတ်ႊၶျ်ၼၼ်ႉၵေႃႈ လႆႈသူင်ႇပၼ် လူင်ပွင်ၸိုင်ႈမိူင်းတႆး မႃးယဝ်ႉၵမ်းၼိုင်ႈ။ 2018 လိူၼ်မေႊသမ်ႉ လႆႈသူင်ႇပၼ်တီႈလုမ်းၸွမ်ၸိုင်ႈမိူင်းႁူမ်ႈတုမ်ၵမ်းၼိုင်ႈ။ ၼႂ်းလိူၼ်ၼႆႉ သမ်ႉ သူင်ႇထိုင် ၽူႈၵွၼ်းၸႄႈတွၼ်ႈ၊ ၸွမ်ၸိုင်ႈလႄႈ သၽႃး ထႅင်ႈၵမ်းၼိုင်ႈ ပဵၼ်ၵမ်းထူၼ်ႈ 5 ယဝ်ႉ ဝႃႈၼႆ။