သင်ၶၸဝ်ႈလႄႈ ၵူၼ်းၼုမ်ႇၽူႈသူၼ်ၸႂ်ႁၵ်ႉလိၵ်ႈလၢႆးႁူမ်ႈၵၼ်ၶူင်သၢင်ႈႁဵတ်းဢွၵ်ႇ Tai dictionary တႃႇႁႂ်ႈၸႂ်ႉတိုဝ်းလႆႈၼိူဝ်ဢွၼ်ႊလၢႆႊ Online လႄႈ ၶိုတ်းၸၼ်ႉလုမ်ႈၾႃႉ။
ၼႂ်းပီ 2018 ၼႆႉ သင်ၶၸဝ်ႈဢၼ်ႁဵၼ်းယူႇတီႈၸၼ်ႉၸွမ်မိူင်းထႆး၊ မိူင်းဢိၼ်ႊၻီႊယိူဝ်ႊ၊ ဝဵင်းလိူဝ်ႇ၊ တႃႈၵုင်ႈလႄႈၵူၼ်း ၼုမ်ႇၸိူဝ်းဢၼ်ႁဵၼ်းယူႇၼႂ်းၸၼ်ႉၸွမ်ၸိူဝ်းၼႆႉ ႁူမ်ႈၵၼ်ၶူင်သၢင်ႈႁဵတ်းဢွၵ်ႇ Tai dictionary တႃႇၸႂ်ႉၼႂ်းၶွမ်းလႄႈ ၼႂ်းၾူၼ်း ၼိူဝ်ဢွၼ်ႊလၢႆႊ Online ပိူဝ်ႈႁႂ်ႈၶဝ်ႈၸႂ်ႉငၢႆႈလႆႈၶိုတ်းၵၢပ်ႈ ပၢၼ်ၼႆယဝ်ႉ။
ၸဝ်ႈၶူးဢိတ်ႉသရိယ ဝတ်ႉမႁႃႇဝၼ်ႇ ဝဵင်းမူႇၸေႊ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ်ႁဝ်းၶႃႈ ႁူမ်ႈၵၼ်ၶိုင်သၢင်ႈႁဵတ်းဢွၵ်ႇၼႆႉ ပိူဝ်ႈႁႂ်ႈပီႈၼွင်ႉႁဝ်းၶႃႈ ဢမ်ႇမေႃလိၵ်ႈပိူၼ်ႈၵေႃႈႁႂ်ႈၸၢင်ႈ ၵႂႃႇလႆႈၵူႈမိူင်းမိူင်း၊ႁႂ်ႈၵူၼ်းၸိူဝ်း ဢမ်ႇမေႃလိၵ်ႈတႆးၵေႃႈ ႁႂ်ႈၸၢင်ႈႁဵၼ်းဢဝ်လိၵ်ႈတႆးၵႂၢမ်းတႆး၊ မိူဝ်းၼႃႈမႃးၼႆႉ ႁဝ်းၶႃႈမီးယိူင်းဢၢၼ်းတႃႇႁဵတ်းဢွၵ်ႇ Translate to English, Thai, Chinese ၸိူဝ်းၼႆႉပႃးၶႃႈဢေႃႈ ၵူၺ်းၵႃႈႁဝ်းၶႃႈတႄႉ ၶႂ်ႈႁဵတ်းၵူၺ်းႁႅင်းငိုၼ်းႁဝ်းၶႃႈသမ်ႉဢမ်ႇမီး ၊ လုမ်းႁဝ်းၵေႃႈပႆႇမီး ၵွပ်ႈၼၼ်လႄႈ ၽူႈမီးၼမ်ႉၸႂ်လီႁဝ်းၶႃႈၵေႃႉလႂ်ၶႂ်ႈၵမ်ႉထႅမ်ၼႆၵေႃႈယိၼ်းၸူမ်းတႄႉၶႃႈဢေႃႈ ” ဝႃႈၼႆ။
ယၢမ်းလဵဝ်တူဝ်လိၵ်ႈ/ၶေႃႈၵႂၢမ်းတႆးတၢင်ႇဝႆႉၼိူဝ်ဝႅပ်ႊသၢႆႊ www.taidictionary.com ဝႆႉ 33458 တူဝ်၊ ၶေႃႈၵႂၢမ်းတႆးပိၼ်ႇထႆး၊ဢိင်းၵလဵတ်ႈၵေႃႈမီးၼပ်ႉမိုၼ်ႇယဝ်ႉဝႃႈၼႆ။
ၸုမ်းၶူင်သၢင်ႈႁဵတ်းဢွၵ်ႇ Tai dictionary ၼႆႉ ၸဝ်ႈၶူးဢိတ်ႉသရိယ ဢွၼ်ဢူၺ်းၵေႃႉ သင်ၶၸဝ်ႈ ဢၼ်ႁဵၼ်းယူႇတီႈ ၸၼ်ႉၸွမ်ၼွၵ်ႈမိူင်း ၼႂ်းမိူင်းလႄႈ ၵူၼ်းၼုမ်ႇတႆးၸိူဝ်းဢၼ် ႁဵၼ်းဝႆႉယူႇၼွၵ်ႈမိူင်း ၼႂ်းမိူင်း၊ ဢိၵ်ႇၽူႈယႂ်ႇၵူၼ်းလူင်လၢႆၸဝ်ႈလၢႆၵေႃႉ ပၼ်တၢင်းၶႆႈၸႂ်သေ ႁူမ်ႈၵၼ်ၵေႃႇတင်ႈ ၶိုၼ်ႈမိူဝ်ႈ ဝၼ်းတီႈ 20/3/2014 ယိူင်းဢၢၼ်း ပိူဝ်ႈႁႂ်ႈလိၵ်ႈတႆးၶိုၼ်ႈယႂ်ႇၶိုတ်းၸၼ်ႉလုမ်ႈၾႃႉ ၊ ႁႂ်ႈၵူၼ်းမိူင်းတႆးႁဝ်းမီး dictionary တႆးၼိူဝ် Online Internet သေၸႂ်ႉၸိူင်ႉၼင်ႇ ပိူၼ်ႈၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ