ၸုမ်းၵပ်းသၢၼ်လွင်ႈၼၢင်းယိင်းတႆး SWAN ဢွၵ်ႇၽိုၼ်ႁၢႆးငၢၼ်း ၵၢၼ်တူင်ႉၼိုင် ၶၢဝ်းတၢင်း 16 ဝၼ်း ၼႂ်းဝၼ်း ထူၼ်ႈ 5 ၼႆႉ တူၵ်ႇတၵ်ႉလွင်ႈမၢႆမီႈ ၾိင်ႈမိူင်း ၸိူဝ်းၸႅၵ်ႇၽႄတေႃႇၼၢင်းယိင်းၼၼ်ႉ ႁႂ်ႈမူၼ်ႉမႄး ဢမ်ႇၼၼ် ပူတ်းထွၼ်ပႅတ်ႈ။
ဝၼ်းတီႈ 29/11/2018 ၸုမ်းၵပ်းသၢၼ်လွင်ႈၼၢင်းယိင်းတႆး “SWAN” ဢွၵ်ႇလိၵ်ႈပိုၼ်ၽၢဝ်ႇ လွင်ႈတူင်ႉၼိုင် ၶၢဝ်း တၢင်း 16 ဝၼ်း မိူဝ်ႈၼႆႉသမ်ႉ ဢွၵ်ႇလွင်ႈတၢင်း ဢၼ်ဝႃႈ “ၾိင်ႈမိူင်းၸိူဝ်းဢၼ်ၸႅၵ်ႇတေႃႇၼၢင်းယိင်း” လႄႈ ၶေႃႈ တုၵ်းယွၼ်း/ တၢင်းၶႆႈၸႂ်သမ်ႉ “ႁႂ်ႈတမ်းဝၢင်း လၢႆးၸိူင်းလႄႈ ၶပ်ႉမၢႆတႃႇမူၼ်ႉမႄး/ ပူတ်းထွၼ် လွင်ႈၾိင်ႈၵမ် ၾိင်ႈ ထုင်း” ဝႃႈၼႆ။
ၼၢင်းၶမ်းဢွၼ်ႇ ၾၢႆႇၵဵပ်းႁွမ်လႄႈ ပိုၼ်ၽႄႈၶေႃႈမုလ်း ၸုမ်းၵပ်းသၢၼ်လွင်ႈၼၢင်းယိင်းတႆး လၢတ်ႈတီႈၽူႈတွႆႇႁွၵ်ႈ ဝႃႈ“ ဢၼ်ႁဝ်းၶႃႈ ၶႂ်ႈတုၵ်းယွၼ်းတႄႉ ၶႂ်ႈႁႂ်ႈမူၼ်ႉမႄးလွင်ႈတိုဝ်းၵမ်ႁဵတ်းသၢင်ႈ ၸွမ်းလွင်ႈယုမ်ႇယမ်ၾိင်ႈထုင်း ဢၼ် မီးလွင်ႈၸႅၵ်ႇယႅၵ်ႈၼၢင်းယိင်းၼၼ်ႉသေ ႁႂ်ႈမီးလွၵ်းလၢႆးၽႅၼ်ၵၢၼ်ဢၼ်ၸႅင်ႈလႅင်းၼၼ်ႉၶႃႈ” ဝႃႈၼႆ။
မၢႆမီႈၾိင်ႈမိူင်းၶေႃႈလႂ် ၼႃႈလိၵ်ႈလႂ် ဢၼ်ၸုမ်းၼၢင်းယိင်းတႆးၶႂ်ႈမူၼ်ႉမႄး ဢၼ်ဝႃႈၼၼ်ႉတႄႉ ဢမ်ႇတူၵ်ႇလၢတ်ႈဝႆႉ တႅၵ်ႇလႅင်း။
ယူႇတီႈၸုမ်းၵပ်းသၢၼ်လွင်ႈၼၢင်းယိင်းတႆး “သွၼ်း” ဢွၵ်ႇလိၵ်ႈပိုၼ်ၽၢဝ်ႇ မၵ်းမၢႆၵၢၼ်တူင်ႉၼိုင် ၶၢဝ်းတၢင်း 16 ဝၼ်း။ ၵၢၼ်ပိုၼ်ၽၢဝ်ႇ တႄႇမႃးၼႂ်းဝၼ်းတီႈ 25 လိူၼ်ၼူဝ်ႊဝႅမ်ႊ ၿိူဝ်ႊ 2018 တေႃႇထိုင် လိူၼ်ၻီႊသႅမ်ႊၿိူဝ်ႊ ဝၼ်း တီႈ 10 ။ ယိူင်းဢၢၼ်းတႄႉ တႃႇလွင်ႈႁူမ်ႇလူမ်ႈလႄႈ လွင်းငမ်းယဵၼ် ၵူၼ်းမိူင်း ဢိၵ်ႇၼၢင်းယိင်းၸိူဝ်းယူႇ ဝၢၼ်ႈၼွၵ်ႈ ၼႃးပၢင်ႇ ဢၼ်လႆႈႁပ်ႉၽွၼ်းႁၢႆႉၸႃႉ ၵဵဝ်ႇၵပ်းပၼ်ႁႃ ဢၼ်ပဵၼ်ယူႇ ၼႂ်းပိုၼ်ႉတီႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ