ၸွမ်သိုၵ်းလူင် မိၼ်းဢွင်ႇလၢႆႇ၊ ၸွမ်သိုၵ်းလူင် ၵေႃႉၵဝ်ႇ တၢၼ်းသူၺ်ႇလႄႈ ၽူႈၼမ်းပျီႇတူႉၸိတ်ႉပဢူဝ်း ဢူးဢွင်ႇ ၶမ်းထီႇ (PNO) ႁူပ်ႉထူပ်းဢုပ်ႇၵၼ် တီႈၼေႇပျီႇတေႃႇ ဝႃႈၼႆ။

ဝၼ်းတီႈ 28/11/2018 ၽူႈၼမ်းၸုမ်းပျီႇတူႉၸိတ်ႉပဢူဝ်းဢူးဢွင်ႇၶမ်းထီႇ တင်းၽူႈၵွၼ်းသိုၵ်းသုင်သုတ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇ ႁူပ်ႉဢုပ်ႇၵၼ် ႁွင်ႈပယိၼ်ႉၼွင်ႇ ၼေႇပျီႇတေႃႇ။ လိူဝ်ၼၼ်ႉ ယူႇတီႈလုမ်းၽူႈၵွၼ်း သိုၵ်းသုင်သုတ်းမၢၼ်ႈ ပၢႆဢွၵ်ႇလိၵ်ႈပိုၼ် ၽၢဝ်ႇ ၵဵဝ်ႇလူၺ်း ၵၢၼ်မုၼ်းလႅင်းၶိုၼ်ႈယႂ်ႇ ၼႂ်းပိုၼ်ႉတီႈ ဝႃႈၼႆ။

ၶုၼ်ႇဢွင်ႇၵျေႃႇ ၵေႃႉပဵၼ်လုၵ်ႈၸၢႆး ၶုၼ်ႇဢွင်ႇၶမ်းထီႇ လၢတ်ႈတီႈသိုဝ်ႇၶၢဝ်ႇ 7 Day ဝႃႈ “ ပူၼ်ႉမႃး 3-4 ဝၼ်းၼၼ်ႉ ပေႃႈႁဝ်းၶႃႈ ႁွတ်ႈၽႅဝ်ၵႂႃႇတီႈၼေႇပျီႇတေႃႇ လႆႈႁူပ်ႉၵၼ် တင်း ၸွမ်သိုၵ်းလူင် တၢၼ်းသူၺ်ႇ။ ယူႇတီႈ မၼ်းလၢတ်ႈဝႃႈ တွၼ်ႈတႃႇတေမုၼ်းလႅင်းၼၼ်ႉ ႁႂ်ႈၶတ်းၸႂ် ၵၢၼ်သွၼ်ႁဵၼ်း ပၢႆးပၺ်ၺႃ၊ တွၼ်ႈတႃႇတေၶတ်းၸႂ်ႁဵတ်းၵၢၼ် ပၢႆးပၺ် ၺႃၸိုင် လူဝ်ႇလႆႈမီးငိုၼ်းၵွင်ၵၢင်ဝႆႉ လွင်ႈၼႆႉ ပဵၼ်ဢၼ်လမ်ႇလွင်ႈဢၼ်ၼိုင်ႈ။ သင်ဝႃႈ ပၢႆးပၺ်ၺႃ ၶိုၼ်ႈယႂ်ႇၵၢၼ် ပၢႆးမၢၵ်ႈမီးၵေႃႈၶိုၼ်ႈယႂ်ႇ။ ပေႃးပၢႆးမၢၵ်ႈမီးၶိုၼ်ႈယႂ်ႇၵွၼ်ႇ ၸင်ႇတေၸၢင်ႈၸွႆႈထႅမ်လႆႈ ၾၢႆႇတူင်ႇဝူင်း၊ ပၢႆးယူႇလီ။ တွၼ်ႈတႃႇ ၼႂ်းပိုၼ်ႉတီႈပေႃးတေၶိုၼ်ႈယႂ်ႇၼၼ်ႉ ႁႂ်ႈမီးၵၢၼ်ႁဵၼ်းပၢႆးပၺ်ၺႃလီလီ။ ႁႂ်ႈမီး ၾၢႆႇမေႃယႃ၊ ၾၢႆႇပၢႆးၸၢၵ်ႈ (ဢိၼ်ႊၵျိၼ်ႊၼီႊယိူဝ်ႊ) ၸိူဝ်းၼႆႉၼမ်ၼမ်” ဝႃႈၼႆ။

ၸွမ်သိုၵ်းလူင် မိၼ်းဢွင်ႇလၢႆႇ လၢတ်ႈဝႃႈ “ တေႃႈလဵဝ် ၼႂ်းၼႃႈတီႈပဢူဝ်းၵေႃႈ ပဵၼ်ၼႃႈလိၼ်ၵတ်းယဵၼ်ၼိမ်သဝ်း ယဝ်ႉ ၸူမ်းၸွမ်းတႄႉတႄႉ။ ၼႂ်းပိုၼ်ႉတီႈၵတ်းယဵၼ် ၼိမ်သဝ်းယဝ်ႉသေဢမ်ႇၵႃး တွၼ်ႈတႃႇ တေ မုၼ်းလႅင်းၶိုၼ်ႈ ယႂ်ႇၼၼ်ႉ လူဝ်ႇလႆႈၵမ်ႉၸွႆႈၵၼ်သေ ႁဵတ်းသၢင်ႈၵႂႃႇ။ ၼႂ်းပိုၼ်ႉတီႈၼၼ်ႉ လူဝ်ႇလႆႈမီး လုၵ်ႈႁဵၼ်း ၵိူတ်ႇၶိုၼ်ႈမႃး ၼမ် ၼမ် ႁႂ်ႈပေႃးလႆႈမီးၵူၼ်းႁူႉမေႃပၺ်ၺႃၼမ်ၼမ်”ဝႃႈၼႆ။

မိူဝ်ႈပီပူၼ်ႉ ႁူဝ်ၼႃႈ ပျီႇတူႉၸိတ်ႉ ၸုမ်းပဢူဝ်း ဢူးဢွင်ႇၶမ်းထီႇ မိူဝ်းႁွတ်ႈၽႅဝ်တီႈၼေႇပျီႇတေႃႇၼၼ်ႉၵေႃႈ လႆႈ ႁူပ်ႉထူပ်း ၸွမ်သိုၵ်းလူင် တၢၼ်းသူၺ်ႇ၊ ၸွမ်သိုၵ်းလူင် မွင်ႇဢေးလႄႈ ၸွမ်ၸိုင်ႈၵဝ်ႇ တဵင်းၸဵင်ႇ။ ၽွင်းၶၢဝ်းၼႂ်း ဝႃႇသႃ ပူၼ်ႉမႃးၼႆႉသမ်ႉ ၽူႈၵွၼ်းသိုၵ်းမၢၼ်ႈသုင်သုတ်း မိၼ်းဢွင်ႇလၢႆႇတင်း ၸွမ်းသိုၵ်းလူင်ၸူဝ်းဝိၼ်းမႃး ႁူပ်ႉ ဢူးဢွင်ႇၶမ်းထီႇ တီႈဝဵင်းၵျွၵ်ႉတလူင်း မိူင်းတႆးပွတ်းၸၢၼ်း။

ၶုၼ်ႇဢွင်ႇၶမ်းထီႇ ႁူဝ်ၼႃႈ ၸုမ်းပဢူဝ်း PNO ၼႆႉ ဢဝ်လွင်ႈငမ်းယဵၼ်ၸွမ်းလူင်ပွင်ၸိုင်ႈသိုၵ်းမၢၼ်ႈ မိူဝ်ႈပီ 1991။ ယွၼ်ႉဝႃႈ တင်းသွင်ၾၢႆႇမီးလွင်ႈၵပ်းသိုပ်ႇၶဝ်ႈဢွၵ်ႇၵၼ် မိုတ်ႈၵိုဝ်းလီသေ မိူဝ်ႈဝၼ်းတီႈ 14 လိူၼ်ၼႆႉ တီႈဝဵင်း တူၼ်ႈတီး ၸတ်းႁဵတ်းပၢင်ၵမ်ႉထႅမ် တပ်ႉသိုၵ်းလူင်ပွင်ၸိုင်ႈမၢၼ်ႈၼၼ်ႉ ယူႇတီႈၸၢဝ်းပဢူဝ်း ၶဝ်ႈႁူမ်ႈၵမ်ႉထႅမ်ၸွႆႈ တင်းၼမ်။