ပေႃႈမႄႈပီႈၼွင်ႉၸိူဝ်ႉၶိူဝ်းမႆႈၸႂ်ၸွမ်း ၵူၼ်းၼုမ်ႇ 6 ၵေႃႉ ဢၼ်ၺႃးၸုမ်းယိပ်းၵွင်ႈၵၢင်ႇ တီႉၺွပ်းႁွင်ႉၵႂႃႇ။ တုၵ်းယွၼ်း ႁႂ်ႈပွႆႇပၼ်တူဝ်ၶိုၼ်း ၽႂ်းၽႂ်း ဝႃႈၼႆ။
ဝၼ်းတီႈ 26/11/2018 ယၢမ်းၵၢင်ၶမ်ႈ မွၵ်ႈ 7 မူင်း ၵူၼ်းၼုမ်ႇ 6 ၵေႃႉ ၽွင်းတိုၵ်ႉၼင်ႈၵိၼ် တၢင်းၵိၼ် တီႈႁၢၼ်ႉၶၢႆ ၼမ်ႉၼဵင်ႈ တီႈ ပွၵ်ႉ 5 ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇၼၼ်ႉ ၺႃးၸုမ်းယိပ်းၵွင်ႈၵၢင်ႇ ၸုမ်းၼိုင်ႈ ၼုင်ႈၶူဝ်း ၵူၼ်းမိူင်း ၶီႇၵႃးမႃး 3 လမ်းသေ တီႉၺွပ်းႁွင်ႉၶိုၼ်ႈၵႃးၵႂႃႇ တေႃႇထိုင် ယၢမ်းလဵဝ် ပႆႇပွႆႇတူဝ်မႃးၶိုၼ်း။
ၵူၼ်းမိူင်း ၵူတ်ႉၶၢႆၵေႃႉၼိုင်ႈ ဢမ်ႇၶႂ်ႈဢွၵ်ႇၸိုဝ်ႈ လၢတ်ႈတီႈသိုဝ်ႇၶၢဝ်ႇ 7 day ဝႃႈ “ လုၵ်ႈဢွၼ်ႇ ဢၼ်ၶဝ်တီႉၵႂႃႇၼၼ်ႉ တေမီးဢႃယု မွၵ်ႈ 20 ပီၵႃႈၼႆႉၵူၺ်း။ ပေႃႈမႄႈၶဝ်တႄႉ ပဵၼ်ဢၼ်မႆႈၸႂ် ယွၼ်ႉၼၼ်လႄႈ တုၵ်းယွၼ်းထိုင် ၽူႈမီး ပုၼ်ႈၽွၼ်း ႁႂ်ႈၸွႆႈထႅမ်ပၼ် ႁႂ်ႈၸဵဝ်း လႆႈလွတ်ႈဢွၵ်ႇမႃးသေၵမ်း” ဝႃႈၼႆ။
ၼႂ်းၸႄႈဝဵင်းၵူတ်ႉၶၢႆၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးယူႇတႃႇသေႇ မိူၼ်ၼင်ႇ တပ်ႉသိုၵ်းလူင်ပွင်ၸိုင်ႈ မၢၼ်ႈ၊ သိုၵ်းၶၢင်၊ သိုၵ်းတဢၢင်း၊ သိုၵ်းၵဝ်ႈၵၢင်ႉ(ၵူဝ်းၵၢင်ႉ) ၸဵမ်ၸိူဝ်းၼႆႉ။
ၼႂ်းၸႄႈဝဵင်းၵူတ်ႉၶၢႆၼႆႉ ၵူၼ်းမိူင်းၵႆႉၺႃး ၸုမ်းယိပ်းၵွင်ႈၵၢင်ႇ တီႉၺွပ်းႁွင်ႉတူဝ်ၵႂႃႇ မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2018 သိုၵ်းတဢၢင်းတီႉၺွပ်းၵႂႃႇသေ ၸင်ႇပွႆႇတူဝ်မႃးၶိုၼ်း ၵူၼ်းမိူင်း 8 ၵေႃႉ ဝႃႈၼႆ။
