တွၼ်ႈတႃႇမၢႆတွင်း ပီမႂ်ႇတႆး 2113 ၼီႈၼႆသေ ၵေႃလိၵ်ႈလၢႆး လႃႈသဵဝ်ႈ ၸတ်းပၢင်ၶႅင်ႇမၢၵ်ႇၼင် တႃႇၶၢဝ်းတၢင်း 14 ဝၼ်း ဝႃႈၼႆ။
ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းလႃႈသဵဝ်ႈ ဢွၼ်ႁူဝ်ၸတ်းႁဵတ်း ပၢင်လဵၼ်ႈမၢၵ်ႇၼင် တႃႇမၢႆတွင်း ပီမႂ်ႇတႆး 2113 ၼီႈ တီႈပၢင်ႇလဵၼ်ႈႁႅင်းမိူင်းႁူမ်ႈတုမ် ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တႄႇဢဝ် ဝၼ်းတီႈ 24/11/2018 ထိုင် 07/12/2018 ပီၼႆႉ ၸုမ်းလဵၼ်ႈၶႅင်ႇမၢၵ်ႇၼင် တင်းမူတ်း မီး 12 ၸုမ်း ဝႃႈၼႆ။
လုင်းၸၢႆးၶမ်းမၢတ်ႈ ၽူႈၼမ်းၼႃႈပၢင်ၶႅင်ႇပိတ်ႉမၢၵ်ႇၼင် လၢတ်ႈတီႈၽူႈတွႆႇႁွၵ်ႈဝႃႈ “ ပီမႂ်ႇတႆးႁဝ်းမီးဝႆႉဝႃႈ ပႂ်ႉၸဵင်၊ ၵိၼ်ၸဵင်၊ လဵၼ်ႈၸဵင်၊ ပႂ်ႉၸဵင်လႄႈ ပၢႆႈၸဵင်။ ပၢင်ပိတ်ႉမၢၵ်ႇၼင်ၼႆႉ ဢမ်ႇၸႂ်ႈပဵၼ်ၶွင်တႆး ႁဝ်းသေတႃႉ ၵေႃႈမၼ်း ပဵၼ်တၢင်းလဵၼ်ႈၵမ်ႇၽႃႇ ၼင်ႇႁိုဝ် တႆးႁဝ်းပေႃးတေလႆႈၶိုတ်းလုမ်ႈၾႃႉၼၼ်ႉ ႁဝ်းၶႃႈ ယိူင်းဢၢၼ်း သေၸင်ႇလႆႈ သူၼ်းတုမ် ၵူၼ်းၼုမ်ႇႁဝ်းၶႃႈ မႃးလဵၼ်ႈၶႅင်ႇၵၼ်”ဝႃႈၼႆ။
ပၢင်လဵၼ်ႈမၢၵ်ႇၼင်ၼႆႉ တင်းမူတ်း မီး 12 ၸုမ်းၶဝ်ႈၶႅင်ႇၵၼ် ပဵၼ်ၸုမ်းပီႈၼွင်ႉၼမ်ႉၶမ်း၊ သႅၼ်ဝီ၊ လႃႈသဵဝ်ႈ၊ သီႇပေႃႉ၊ ၵျွၵ်ႉမႄး၊ ဝၢၼ်ႈႁႆး၊ သႅင်ၵႅဝ်ႉ၊ ပႃႇၵိူဝ်၊ မိူင်းပၢႆး ဢိၵ်ႇထႅင်ႈ လၢႆလၢႆၸုမ်း ၸိူဝ်းၼႆႉ။
လုင်းၸၢႆးၶမ်းမၢတ်ႈ “ ၵူၼ်းႁဝ်းၶႃႈၼႆႉ လွင်ႈယူႇလီ ပဵၼ်ထီႉၼိုင်ႈ ပေႃးႁဝ်းၶႃႈ မႃးတူၺ်း ၼႂ်းတႆးႁဝ်း တင်းတၢင်ႇ ၸၢဝ်းၶိူဝ်းၼႆ တႆးႁဝ်းၶႃႈၼႆႉ လွင်ႈယူႇလီ မၼ်းတူၵ်းတႅမ်ႇလိူဝ်ပိူၼ်ႈ။ ၵွပ်ႈၼႆလႄႈ ပၢႆးလဵၼ်ႈႁႅင်းၼႆႉ မၼ်းတေဢဝ် ႁဝ်း ယူႇလီသေဢမ်ႇၵႃး မၼ်းတေပိၵ်ႉသဵၼ်ႈတၢင်းၵႂႃႇႁူင်းယႃ၊ ပိၵ်ႉသဵၼ်ႈတၢင်းၵႂႃႇၸွမ်းယႃႈမဝ်းၵမ် ၸဵမ်ၸိူဝ်းၼႆႉ” ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈ မၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇ ႁွၵ်ႈ ဝႃႈ “ ပၢင်လဵၼ်ႈမၢၵ်ႇၼင်ၼႆႉ တွၼ်ႈတႃႇ ႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈသေ လႆႈၸတ်းႁဵတ်းပၢင်ၶေႉၶႅင်ႇ လဵၼ်ႈမၢၵ်ႇၼင်မႃး။ မိူဝ်ႈပီ ပူၼ်ႉၵေႃႈ ႁဝ်းၶႃႈလႆႈၸတ်းႁဵတ်းမႃးယူႇၶႃႈ။ ပီၼႆႉ လၢႆဝဵင်းမႃးၶဝ်ႈႁူမ်ႈၶႅင်ႇၵၼ် ပဵၼ်ဢၼ် ၸူမ်းၸွမ်းတႄႉတႄႉ။ လွင်ႈၵၢၼ်ႁုၼ်ႈမုၼ်းၶိုၼ်ႈယႂ်ႇ တႃႇၵူၼ်းမိူင်းႁဝ်းၶႃႈ ႁႂ်ႈမီးဢဵၼ်မီးႁႅင်း ယူႇလီမူၼ်ႈ သိူဝ်းၵႂႃႇ ၼၼ်ႉၵေႃႈ တေလႆႈၶပ်းၶိုင်ၾၢႆႇၼိုင်ႈတၢင်းၼိုင်ႈ မၼ်းပဵၼ်ၵၢၼ်ႁဝ်းၶႃႈ ၽူႈတႅၼ်း။ မိူဝ်ႈပီၵၢႆၵေႃႈ ႁဝ်းၶႃႈ ၸတ်း ႁဵတ်းမႃးယဝ်ႉၵမ်းၼိုင်ႈ ဢိင်ၼိူဝ်လွင်ႈႁူဝ်ၶေႃႈ သၢၼ်ၶတ်းယႃႈမဝ်းၵမ်သေ ၸတ်းႁဵတ်းမႃး။ ၼင်ႇႁိုဝ် ၵူၼ်းၼုမ်ႇ ႁဝ်း ပေႃးတေယၢၼ်ၵႆ ယႃႈမဝ်းၵမ်” ဝႃႈၼႆ။
ပၢင်ၶေႉၶႅင်ႇမၢၵ်ႇၼင်ၼႆႉ မီးသူးရၢင်းဝလ်း တေမွပ်ႈယိုၼ်ႈပၼ် သူးထီႉၼိုင်ႈလႆႈ 20 သႅၼ်ပျႃး၊ သူး ထီႉသွင် 10 သႅၼ်ပျႃးလႄႈ ထီႉသၢမ်သမ်ႉ 3 သႅၼ်ပျႃး ဝႃႈၼႆ။
ပီၼႆႉ ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ တေၸတ်းႁဵတ်းတီႈ ဝဵင်းလႃႈသဵဝ်ႈ ၶိုၵ်ႉယႂ်ႇလူင် တေတႄႇ ၸတ်းႁဵတ်း ဝၼ်းတီႈ 6 ထိုင် 9 လိူၼ်ၻီႊသႅမ်ႊၿိူဝ်ႊ 2018 ဝႃႈၼႆ။
