လူင်ပွင်ၸိုင်ႈမိူင်းထႆး ပိုၼ်ၽၢဝ်ႇဝႃႈ ႁႂ်ႈၵိုတ်းၵၢၼ်ၸႂ်ႉၶေႃႈၵႂၢမ်းဢၼ်ႁွင်ႉႁႅင်းၵၢၼ်ယၢၼ်မိူင်းဝႃႈ “ တၢင်ႇၻၢဝ်ႉ” ႁႂ်ႈႁႅင်း ၵၢၼ်မီးသုၼ်ႇၶဝ်ႈထိုင်ၶေႃႈမုလ်းၶၢဝ်ႇသၢၼ်ၽဵင်ႇပဵင်းၵၼ်တင်းၵူၼ်းထႆး ဝႃႈၼႆ။
ဝၼ်းတီႈ 27/11/2018 ၶၢဝ်ႇသူတ်ႇပိုၼ်ၽၢဝ်ႇဝႃႈ ၸၢႆးၽုတ်ႉထိၽူင်း ပုၼ်ႊၵၼ်ႊ ၽူႈမီးပုၼ်ႈၽွၼ်း ၾၢႆႇၶၢၼ်ပၢၵ်ႇလုမ်း ၽွင်းလူင်မိူင်းထႆး ပိုတ်ႇလၢတ်ႈဝႃႈ ဢုပ်ႇဢူဝ်းလႆႈၸႂ်ၵၼ်တႅပ်းတတ်းၼႂ်းပၢင်ၵုမ် ၸုမ်းၽွင်းလူင်ဢၼ်ၸတ်းၼႂ်းဝၼ်းတီႈ 26/11/2018 ၵဵဝ်ႇလူၺ်ႈလွင်ႈ ႁႂ်ႈၵိုတ်းၵၢၼ်ၸႂ်ႉၶေႃႈၵႂၢမ်း ဢၼ်ႁွင်ႉဝႃႈ ( ၵူၼ်းတၢင်ႇၻၢဝ်ႉ ) ၊ ႁႂ်ႈႁႅင်းၵၢၼ်ယၢၼ်မိူင်း မီးသုၼ်ႇလႆႈၶဝ်ႈထိုင် ၶေႃႈမုၼ်းၶၢဝ်ႇသၢၼ်လႆႈတဵမ်ထူၼ်ႈပဵင်းၵူၼ်းထႆး ၸိူဝ်းၼႆႉ။
ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈၼႄတီႈ ၸုမ်းၶၢဝ်ႇၽူႈ တွႆႇႁွၵ်ႈဝႃႈ – “ ဢၼ်ၶဝ်ဝႃႈမီးသုၼ်ႇလႆႈၽဵင်ႇပဵင်းၵၼ်တင်းၵူၼ်းထႆးဢၼ်ဝႃႈၼၼ်ႉ ဢမ်ႇၸႂ်ႈၵူႈလွင်ႈ မၼ်းၵူၺ်းပဵၼ် လွင်ႈဢၼ်ၶဝ်ႈထိုင် ၶေႃႈမုလ်းၶၢဝ်ႇသၢၼ်ၵူၺ်း ၊ မိူၼ်ၼင်ႇပေႃးႁဝ်းၺႃးၸဝ်ႈၼႃႈတီႈ ၶဝ်တီႉၺွပ်းၼၼ်ႉ ၼႂ်းဝႂ်သင်ႇၶဝ်တႅမ်ႈၸိူင်ႉႁိုဝ်ပၵ်းပိူင် ၶဝ်မီးၸိူင်ႉႁိုဝ်ၸိူဝ်းၼႆႉ ႁဝ်းမီးသုၼ်ႇတေယွၼ်းတူၺ်းလႆႈ ၊ ဢမ်ႇၸႂ်ႈဝႃႈ ဢဝ်သူပ်းလၢတ်ႈသေ ပၼ်တၢင်းၽိတ်းၵၼ်လႄႈ ယွၼ်းဢဝ်ငိုၼ်းတိၵ်းတိၵ်း ၸဵမ်ၸိူဝ်းၼႆႉဢေႃႈ ” ဝႃႈၼႆ။
တီႈၼႂ်းမိူင်းၸိုင်ႈထႆးၼႆႉ မီးၵူၼ်းၼွၵ်ႈမိူင်းဢွၼ်ၵၼ်မႃးဢႅဝ်ႇယဵမ်ႈတင်းၼမ်တင်းလၢႆလႄႈ မီးႁႅင်းၵၢၼ်ယၢၼ်မိူင်း ဢၼ်လုၵ်ႉမႃးတၢင်းမိူင်းလၢဝ်း၊ ၵမ်ႊပူႊၶျႃႊလႄႈ မိူင်းႁူမ်ႈတုမ်မၢၼ်ႈ မႃးႁဵတ်းၵၢၼ်ၼပ်ႉဢၢၼ်ႇႁူဝ်သႅၼ် ၊ လူင်ပွင်ၸိုင်ႈထႆးလႄႈ ၵူၼ်းမိူင်းထႆးသမ်ႉႁွင်ႉၵူၼ်းဢႅဝ်ႇယဵမ်ႈၶဝ်ဝႃႈ “ တၢင်ႇၶျၢတ်ႊ” ၊ ႁႅင်းၵၢၼ်ယၢၼ်မိူင်းသမ်ႉႁွင်ႉဝႃႈ “တၢင်ႇၻၢဝ်ႉ” ၼႆသေ ႁဵတ်းႁႂ်ႈႁႅင်းၵၢၼ်ယၢၼ်မိူင်းဢမ်ႇႁၢၼ်ႉၸႂ် ဢွၼ်ၵၼ်တုၵ်းယွၼ်းႁႂ်ႈလၢႆႈမႃးလၢႆပွၵ်ႈလၢႆၵမ်း ။
