ပၼ်ႁႃၼႂ်းၸိုင်ႈတႆးပွတ်းႁွင်ႇ ဢၼ်တပ်ႉသိုၵ်းတႆး 2 တပ်ႉသိုၵ်း တုမ်ႉတိူဝ်ႉပိုတ်းယိုဝ်းၵၼ် ႁႂ်ႈၵူၼ်းမိူင်းပေႃးလူႉ ပေႃးသုမ်းၼၼ်ႉ ဢမ်ႇထုၵ်ႇလီပဵၼ်လႄႈ ပႃႇတီႇႁူဝ်သိူဝ် SNLD တႅမ်ႈလိၵ်ႈတုၵ်းယွၼ်းထိုင် ႁူဝ်ပဝ်ႈတင်းသွင် ၾၢႆႇႁႂ်ႈဢုပ်ႇဢူဝ်းၵၼ် ၵႄႈလိတ်ႈပၼ်ႁႃ ၽႂ်းၽႂ်း ဝႃႈၼႆ။
ဝၼ်းတီႈ 26/11/2018 ယူႇတီႈပႃႇတီႇႁူဝ်သိူဝ် SNLD တႅမ်ႈလိၵ်ႈတုၵ်းယွၼ်းထိုင် ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ RCSS တင်း ၸွမ်သိုၵ်းလူင် ပၢင်ႇၾႃႉ ႁူဝ်ပဝ်ႈ SSPP ႁႂ်ႈႁူပ်ႉဢုပ်ႇငူပ်ႉငီႉၵၼ် လွင်ႈဢၼ်ပဵၼ်ပၼ်ႁႃ ပၢင်တိုၵ်းၼႂ်း မိူင်းၸိုင်ႈတႆးပွတ်းႁွင်ႇၼၼ်ႉ ႁႂ်ႈၵိုတ်းပၢင်တိုၵ်းပၼ်ၽႂ်းၽႂ်းသေၵမ်း ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈ မၢႆ 3 လၢတ်ႈတီႈၽူႈတွႆႇႁွၵ်ႈဝႃႈ “ မႅၼ်ႈယူႇၶႃႈ။ လႆႈ ႁူႉဝႆႉဝႃႈ ယူႇတီႈငဝ်ႈငုၼ်းပႃႇတီႇႁူဝ်သိူဝ် ႁဝ်းၶႃႈလႆႈတႅမ်ႈလိၵ်ႈတုၵ်းယွၼ်းထိုင် တပ်ႉသိုၵ်းတႆး 2 ၸုမ်း။ လႆႈငိၼ်းဝႃႈ ၸိူင်ႉၼၼ်” ဝႃႈၼႆ။
သိုပ်ႇလၢတ်ႈဝႃႈ ယူႇတီႈၾၢႆႇပႃႇတီႇတႄႉ တေလႆႈၸွႆႈထႅမ်ပၼ်ၵူၼ်းမိူင်းလၢႆးတၢင်းၸိူင်ႉႁိုဝ်။ ပႃႇတီႇဢၼ်ဝႃႈၼႆႉ ပႆ ၸွမ်းသဵၼ်ႈတၢင်းပေႃႈမႄႈၵူၼ်းမိူင်း ဢၼ်ၶႂ်ႈႁဵတ်းၶႂ်ႈပဵၼ် ယူႇတီႈပေႃႈမႄႈၵူၼ်းမိူင်းၵေႃႈမုင်ႈမွင်း။ မီးပၼ်ႁႃၽေး သိုၵ်း မႃးယဝ်ႉ လူဝ်ႇမီးၶေႃႈၵႄႈမၼ်း လူလွမ်တူၺ်းထိုင်ပူၵ်းပွင်ပၼ် ပေႃႈမႄႈၵူၼ်းမိူင်း ဢၼ်လႆႈထုၵ်ႇၺႃးၸိူဝ်းၼႆႉ ႁႂ်ႈ 2 ၸုမ်းဢုပ်ႇၵၼ် ႁႂ်ႈမၼ်းပဵၼ်ၽွၼ်းလီၵႂႃႇမိူဝ်းၼႃႈ ၼင်ႇဢၼ်ပေႃႈမႄႈၵူၼ်းမိူင်းတုၵ်းယွၼ်းမႃးၼၼ်ႉ” ဝႃႈၼႆ။
တႄႇဢဝ် ၼႂ်းၵၢင်လိူၼ်ၼႆႉမႃး သိုၵ်း RCSS တင်း SSPP လႆႈပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇ ၵူၼ်းမိူင်း လႆႈဢွၼ်ၵၼ်ပၢႆႈၽေးသိုၵ်း ယၢၼ်ႁိူၼ်းယေး လႆႈၺႃးၸၢၵ်ႇၸွမ်း လႆႈမၢတ်ႇၸဵပ်း၊ လူႉတၢႆ လႄႈ လႆႈထုၵ်ႇတီႉၺွပ်း ၵုမ်းၶင်တူဝ်ၵႂႃႇၵေႃႈမီး ဝႃႈၼႆ။
ယူႇတီႈပႃႇတီႇႁူဝ်သိူဝ် SNLD တႄႉ တုၵ်းယွၼ်းထိုင် တင်းသွင်ၾၢႆႇႁႂ်ႈၸဵဝ်းႁူပ်ႉဢုပ်ႇၵၼ်သေ တုၵ်းယွၼ်းထိုင် ႁႂ်ႈ ၸဵဝ်း ၵိုတ်းပၢင်တိုၵ်းပၼ်ဝႆးဝႆးသေၵမ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ