ဢိင်ၼိူဝ်သိုၵ်းတႆး 2 ၸုမ်းယိုဝ်းၵၼ်သေ ၵူၼ်းဝၢၼ်ႈၼႃးလေႃႉ ဢိူင်ႇၸႄႈၶၢၼ် ၸႄႈဝဵင်းသီႇပေႃႉ ၸိူဝ်းလႆႈ ပၢႆႈၵႂႃႇသွၼ်ႈဝႆႉ တီႈဝၢၼ်ႈၸႄႈၶၢၼ် 200 ပၢႆၼၼ်ႉ တေႃႈလဵဝ် ၶိုၼ်းဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်း ၶိုၼ်းယဝ်ႉ။
ဝၼ်းတီႈ 26/11/2018 ယၢမ်းႁူဝ်ၶမ်ႈ 5 မူင်း ၵူၼ်းဝၢၼ်ႈၼႃးလေႃႉ ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈဝႆႉ တီႈဝတ်ႉ ဝိႁၢရ်ဝၢၼ်ႈၸႄႈၶၢၼ် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ မိူဝ်ႈဝၼ်းတီႈ 23 ၼၼ်ႉ ၶိုၼ်းပွၵ်ႈႁိူၼ်းၵၼ်မူတ်းယဝ်ႉ ဝႃႈၼႆ။
ၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ႁဝ်းၶႃႈ ၵႂႃႇသူႇၸႂ်း ပၼ်ႁႅင်း ၵူၼ်းပၢႆႈၽေးသိုၵ်း တီႈဝၢၼ်ႈၸႄႈၶၢၼ်။ ယွၼ်ႉဝႃႈ ၶၢဝ်းၼႆႉသမ်ႉ ပဵၼ်ၶၢဝ်းဢဝ်ၶဝ်ႈ မိူဝ်ႈလဵဝ် ၸုမ်း ယိပ်းၵွင်ႈၵၢင်ႇၵေႃႈ ဢမ်ႇပေႃးမီးၸမ် ၶဝ် ယဝ်ႉ။ ၶဝ်ၵေႃႈ လႆႈဢွၼ်ၵၼ်ပွၵ်ႈၶိုၼ်းႁိူၼ်းယေးမူတ်းယဝ်ႉဝႃႈ” ဝႃႈၼႆ။
ၵူၼ်းမိူင်းဢၼ်လႆႈတူၵ်းပဵၼ်ယိူဝ်ႇ လူႉတၢႆ – မၢတ်ႇၸဵပ်း ယွၼ်ႉသိုၵ်းတႆး သွင်ၸုမ်းယိုဝ်းၵၼ်ၼၼ်ႉ ၸၢႆးလႅင်းၶိူဝ်း ဢႃယု 11 ပီ ယူႇၸၼ်ႉသီႇ ပဵၼ်လုၵ်ႈၸၢႆး ၸၢႆးမူၼ်း – ၼၢင်းၶမ်း တိူဝ်ႉပဵမ်ႉၶႂႃ ပွင်ႇပဵမ်ႉသၢႆႉသေ တၢႆၼိူဝ်ထူဝ်ႈလႃႇၵျီႇ။ ၸၢႆးၵူႇ ဢႃယု 34 ပီ (ပဵၼ်ၽူဝ် ၼၢင်းလႅင် မီးလုၵ်ႈၸၢႆး 2 ၵေႃႉ ၸၢႆးဝၼ်းလႄႈ ၸၢႆးသႅင်ၸိုၼ်ႈ) မၢၵ်ႇၵွင်ႈ တိူဝ်ႉၵွၵ်း ႁူဝ်ဢွၵ်းဢေႃ တၢႆၼိူဝ်ထူဝ်ႈလႃႇၵျီႇ(ၸၢႆးၵူႇ ၼႆႉ ပဵၼ်လုၵ်ႈၸၢႆး လုင်းလၢဝ်ႉ- ပႃႈပွၵ်း ယူႇဝၢၼ်ႈ ၼႃးလေႃႉတႂ်ႈ)။ ၸၢႆး သၢင်ႇၼွင်ႉ ဢႃယု 36 ပီ ပဵၼ်လုၵ်ႈလုင်းၺူဝ်ႇ – ပႃႈသႃႇ ၵူၼ်းဝၢၼ်ႈၼႃးလေႃႉၼိူဝ် မၼ်းၸၢႆးတေၵႂႃႇပေႃႉၶဝ်ႈလုင်း ဢွင်ႇပွၵ်ႉတႂ်ႈသေ ၶီႈထူဝ်ႈလႃႇၵျီႇမႃးၸွမ်း မၼ်းၸၢႆး ၵေႃႈ ၺႃးယိုဝ်းတိူဝ်ႉသႂ်ႇသေ လႆႈၵႂႃႇတၢႆတီႈႁူင်းယႃ ဝႃႈၼႆ။
ၵူၼ်းဢၼ်လႆႈမၢတ်ႇၸဵပ်းသမ်ႉ ၸၢႆးႁၢၼ်မိူင်း(ႁွင်ႉ) ၸၢႆးၶမ်းၸၢႆး (ပဵၼ်ပီႈၼွင်ႉတႆးၼိူဝ် ပဵၼ်လုၵ်ႈၶူၺ် လုင်းလၢဝ်ႉ ပႃႈပွၵ်း ဝၢၼ်ႈၼႃးလေႃႉတႂ်ႈ) မၢၵ်ႇၵွင်ႈတိူဝ်ႉ ၵိင်ႇႁႄႉလႄႈ ပဵမ်ႉၶႂႃ။ ၼၢင်းမူၼ်း လႄႈ လုၵ်ႈယိင်း ၼၢင်းယိင်းၶမ်း မိူဝ်ႈၽွင်းမၼ်းၼၢင်း ၸေးလုၵ်ႈဢွၼ်ႇမၼ်းဝႆႉ ၺႃးမၢၵ်ႇၵွင်ႈၶဝ်ႈပဵမ်ႉသၢႆႉ တိူဝ်ႉပႃးၶႃလုၵ်ႈဢွၼ်ႇမၼ်း ၼၢင်းယိင်း ၶမ်း ၾၢႆႇသၢႆႉ။ ၼၢင်းမူၼ်းသမ်ႉ မၢတ်ႇၸဵပ်းလိူဝ်ႁႅင်း။ မေႃသွၼ်ၼၢင်းထူၺ်း တိူဝ်ႉၶူႈလင် လိူတ်ႈဢွၵ်ႇလိူဝ်ႁႅင်း ၸဵမ်ၸိူဝ်းၼႆႉ။
မိူဝ်ႈဝၼ်းတီႈ 23/11/2018 ယၢမ်းၵၢင်ၼႂ်ၼၼ်ႉ ယွၼ်ႉသိုၵ်းတႆး 2 ၸုမ်း ယိုဝ်းၵၼ်သေ ၵူၼ်းဝၢၼ်ႈၼႃးလေႃႉ လႆႈ ဢွၼ်ၵၼ်ပၢႆႈယၢၼ်ႁိူၼ်းယေးၽႂ်မၼ်းသေဢမ်ႇၵႃး လႆႈလူႉတၢႆ မၢတ်ႇၸဵပ်းၸွမ်းၼႂ်းပၢင်တိုၵ်း ၵေႃႈမီး ဝႃႈၼႆ။
