ၸဝ်ႈၼႃႈတီႈထႆးၼႂ်းၸႄႈတွၼ်ႈ ၵဵင်းႁၢႆးမိူင်းထႆးတွၼ်ႈၼိူဝ် ႁူမ်ႈၵၼ်ဢဝ်ႁူမ်ႇလူမ်ႈပွတ်းတွၼ်ႈ သၢမ်ၸဵင်ႇၶမ်း တင်းထုင်ႉသၢပ်ႇၼမ်ႉၶွင် ပိူဝ်ႈႁႄႉၵင်ႈလွင်ႈဢမ်ႇၼိမ်သဝ်းၼႂ်းပိုၼ်ႉတီႈ။

ဝၼ်းတီႈ 23/11/2018 ၸၢႆးပရႃႊသူင်ႊ လႃႉဢွၼ်ႇ ၽူႈၵွၼ်းၸႄႈဝဵင်းၵဵင်းသႅၼ်၊ သိုၵ်းဢိၵ်ႇၸဝ်ႈၼႃႈတီႈႁူမ်ႈဢဵၼ်ႁႅင်း 90 ပၢႆ ဢွၼ်ၵၼ်လူင်းပိုၼ်ႉတီႈ ၵူတ်ႇထတ်းလွင်ႈၼိမ်သဝ်း တီႉၺွပ်းလႆႈ ၽူႈၵဵဝ်ႇၶွင်ႈယႃႈမဝ်းၵမ် 3 ၵေႃႉ၊ ယိုတ်းလႆႈ ၾူၼ်း 1 ၶိူင်ႈလႄႈငိုၼ်း 40,620 ၿၢတ်ႇ ၼႆယဝ်ႉ။

မိူဝ်ႈဝၼ်းတီႈ 25/11/2018 ၼၼ်ႉၵေႃႈ သိုဝ်ႇၶၢဝ်ႇ Workpoint ပိုၼ်ၽၢဝ်ႇဝႃႈ – ၸဝ်ႈၼႃႈတီႈသိုၵ်းထႆး လႆႈႁူႉၶၢဝ်ႇဝႃႈ တေမီးလွင်ႈတေႃႉသူင်ႇယႃႈၶဝ်ႈမိူင်းထႆးၼႆသေ လႆႈႁူမ်ႈဢဵၼ်ႁႅင်းၵၼ် ၵႂႃႇပႂ်ႉၵူတ်ႇ ထတ်း။ ၽွင်းၼၼ်ႉ မီးၵူၼ်းၸၢႆးမွၵ်ႈ 7 ၵေႃႉပိူဝ်ႉ ထူင်ၸၢၼ်ႈသေ ပႆတၢင်းၶဝ်ႈၸူးမိူင်းထႆး ၊ ၸဝ်ႈၼႃႈတီႈၸင်ႇႁွင်ႉၵိုတ်း သေႁႂ်ႈဝၢင်းၶိူင်ႈၵွင်ႈၵၢင်ႇ ၵူၺ်းၵႃႈ ၾၢႆႇၵူၼ်းတေႃႉယႃႈ ဢမ်ႇယွမ်း ဝၢင်းလႄႈ သွင်ၾၢႆႇလႆႈပဵၼ်ပၢင်တိုၵ်းၵၼ် ႁိုင် 15 မိၼိတ်ႉ တီႈႁိုၵ်ႉၵၼ် ၼၼ်ႉတိတ်း ၸပ်းဝဵင်းတႃႈ ၶီႈလဵၵ်း ၾၢႆႇမိူင်းထႆးပဵၼ်ၸႄႈဝဵင်းမႄႈသၢႆ ထုင်ႉလွႆၼၢင်းၼွၼ်း မူႇဝၢၼ်ႈၽႃမီ ဢိူင်ႇဝဵင်းၽၢင်းၶမ်း ၼႂ်းၸႄႈတွၼ်ႈၵဵင်းႁၢႆး ၸိုင်ႈထႆးပွတ်းႁွင်ႇ။

တီႈၼႂ်းမိူင်းၸိုင်ႈထႆးၼႆႉ ၵႆႉမီးၶၢဝ်ႇၸဝ်ႈၼႃႈတီႈပလိၵ်ႈထႆးလႄႈ ၾၢႆႇၽဵဝ်ႈမူၺ်ႉယႃႈမဝ်းၵမ် ၵႆႉၵႆႉတီႉၺွပ်းလႆႈယႃႈမဝ်းၵမ်ၶိူဝ်းယႂ်းလႄႈ ၼင်ႇႁိုဝ်တေၵႄႈလိတ်ႈလႆႈၼႆသေ လူင်ပွင်ၸိုင်ႈ တေႁူမ်ႈမိုဝ်း ၽူႈမီးပုၼ်ႈၽွၼ်းလၢႆၾၢႆႇသေ ၶဵင်ႈၶႅင်ၵူတ်ႇထတ်းၵႂႃႇၼႆယဝ်ႉ။