ၵူၼ်းမိူင်းတႆး ပွတ်းႁွင်ႇလၢႆၸႄႈဝဵင်း ထုၵ်ႇၸုမ်းပႃႇတီႇသၢင်ႇသီႈၶၢၼ်းႁွင်ႉ ၵႂႃႇႁူမ်ႈၸုမ်းသိုၵ်းၵဝ်ႇသေ ၵမ်ႉထႅမ်တပ်ႉ သိုၵ်းလူင်ပွင်ၸိုင်ႈမၢၼ်ႈ တီႈဝဵင်းလႃႈသဵဝ်ႈ ႁူဝ်ၵူၼ်း ႁဵင်ပၢႆ။

ဝၼ်းတီႈ 25/11/2018 ယၢမ်းၵၢင်ၼႂ် 9 မူင်း ၵူၼ်းမိူင်း လႃႈသဵဝ်ႈ၊ မိူင်းယႆ၊ သႅၼ်ဝီ၊ ၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ ၵူတ်ႉၶၢႆ လႄႈ ဢိၵ်ႇထႅင်ႈ လၢႆလၢႆၸႄႈဝဵင်း ထုၵ်ႇၸုမ်းပႃႇတီႇသၢင်ႇသီႈၶၢၼ်းႁွင်ႉၵႂႃႇ ၶဝ်ႈႁူမ်ႈ ၸုမ်းသိုၵ်းၵဝ်ႇ(သိုၵ်းထၢၵ်ႈ)သေ ၵမ်ႉထႅမ်တပ်ႉသိုၵ်းလူင်ပွင်ၸိုင်ႈမၢၼ်ႈ တီႈဝဵင်းလႃႈ သဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။

ၵူၼ်းမိူင်းယႆ ၽူႈၶဝ်ႈႁူမ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ၵူၼ်းမိူင်းယႆၶႃႈ၊ ၸုမ်းသၢင်ႇသီႈႁွင်ႉမႃး။ ၵႃႈၸ ရိပ်ႈ ၵႃႈတၢင်းတႄႉ သၢင်ႇသီႈဢွၵ်ႇပၼ် ၼိုင်ႈၵေႃႉ 5,000 ပျႃး။ ႁွင်ႉမႃးလွင်ႈသင်တႄႉ ႁဝ်းၶႃႈ ဢမ်ႇႁူႉၸၵ်းမဵဝ်း မၼ်း ၶႃႈ မႃး(ဒို့အရေး) ၸွမ်းပိူၼ်ႈႁဵတ်းၼႆၵူၺ်းၶႃႈ” ဝႃႈၼႆ။

ၵူၼ်းမိူင်းသႅၼ်ဝီ ၽူႈၶဝ်ႈႁူမ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မႃး (ဒို့အရေး) ၶႃႈဝႃႇ၊ ၸုမ်းသၢင်ႇသီႈႁွင်ႉမႃးၶႃႈ။ လႆႈငိုၼ်း ၼိုင်ႈၵေႃႉ 2,000 ပျႃး။ ယဝ်ႉၵေႃႈ တီႈဝၢၼ်ႈသမ်ႉပၼ်ထႅင်ႈ ၼိုင်ႈၵေႃႉ 5,000 ပျႃးၶႃႈ” ဝႃႈၼႆ။

ပၢင်ၼႄၵၢင်ၸႂ်ၼႆႉ တႄႇဢွၼ်ၵၼ်ပႆတၢင်း လုၵ်ႉဢဝ်တီႈႁူင်းႁေႃၵၢင်ဝဵင်း(လွႆယဵဝ်ႈ) ပႆထိုင် ပၢင်လဵၼ်ႈမၢၵ်ႇၼင် (လႃႈ သဵဝ်ႈလူင်) ၼႂ်းၸႄႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ ၵူၼ်းဢၼ်မႃးၶဝ်ႁူမ်ႈၵမ်ႈၼမ်တႄႉ ပဵၼ်ၵူၼ်းသိုၵ်းၵဝ်ႇ လုၵ်ႈ မေးၵူၼ်းသိုၵ်း တပ်ႉ သိုၵ်းမၢၼ်ႈ ၸဵမ်ၸိူဝ်း ၼႆႉ။

တီႈပၢႆႉဢၼ်ၵူၼ်းမိူင်းဢွၼ်ၵၼ်ယိပ်းသေ ပႆတၢင်းမႃးၼၼ်ႉ ၵမ်ႈၼမ် တႅမ်ႈဝႆႉဝႃႈ “လွင်ႈၽွမ်ႉႁူမ်ႈၸၢဝ်းၶိူဝ်း ၼင်ႇ ႁိုဝ် တေဢမ်ႇတႅၵ်ႈယၢႆႈၼၼ်ႉ ပဵၼ်ပုၼ်ႈၽွၼ်းႁဝ်း (ဒို့အရေး)”။ လိူဝ်ၼၼ်ႉ ၸုမ်းတပ်ႉသိုၵ်းၵဝ်ႇမၢၼ်ႈ တႅမ်ႈပၢႆႉသေ ပူၵ်း ၼႄဝႃႈ ႁဝ်းၶႃႈ “ၵမ်ႉထႅမ်တပ်ႉသိုၵ်းမၢၼ်ႈလႄႈ ဢၼ်ၵူၼ်းတၢင်းၼွၵ်ႈ မႃးၸတ်းႁႂ်ႈႁဝ်းၶႃႈ တႅၵ်ႇယၢႆႈၵၼ်ၼၼ်ႉ ႁဝ်းၶႃႈ တိုၼ်းဢမ်ႇႁၼ်လီ တိုၼ်းသၢၼ်ၶတ်း” ဝႃႈၼႆ။

ၼႂ်းလိူၼ်ၼူဝ်ႊဝႅမ်ႊၿိူဝ်ႊ ၼႆႉမႃး ၼႂ်းမိူင်းတႆးလၢႆလၢႆတီႈ မိူၼ်ၼင်ႇ ၵဵင်းတုင်၊ တူၼ်ႈတီး၊ ၼမ်ႉၸၢင် ၸဵမ်ၸိူဝ်းၼႆႉ ၸတ်းႁဵတ်းမႃး ပၢင်ၵမ်ႉထႅမ်တပ်ႉသိုၵ်းလူင်ပွင်ၸိုင်ႈမၢၼ်ႈ ဝႃႈၼႆ။