ၾႆးမႆႈပုမ်ႇ/ၵွင်ၶဝ်ႈၵူၼ်းမိူင်းလၢႆးၶႃႈ 2 ပုမ်ႇ ၵဵဝ်ႇလူၺ်ႈလွင်ႈၼႆႉ ပဵၼ်ယွၼ်ႉသင် ၽႂ်ၵေႃႉလႂ် ၽဝ်ဢၼ်ဝႃႈၼၼ်ႉ ပႆႇႁူႉ ႁူဝ်ယွႆႈမၼ်း ဝႃႈၼႆ။

ဝၼ်းတီႈ 22/11/2018 ယၢမ်းၵၢင်ၼႂ် 10 မူင်းပၢႆၼၼ်ႉ ၾႆးမႆႈပုမ်ႇၶဝ်ႈ ၼႃးလုင်းၸေႃးၵ လႄႈ ပႃႈၶႆႇ ၵူၼ်းဝၢၼ်ႈၼမ်ႉ တူၵ်း ဢိူင်ႇၼမ်ႉတူၵ်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ၵဵဝ်ႇလူၺ်ႈလွင်ႈၾႆးမႆႈၼႆႉ ပဵၼ် ယွၼ်ႉသင် ပဵၼ်ၼမ်ႉမိုဝ်းၽႂ်ၽဝ် ဢၼ်ဝႃႈၼၼ်ႉ ပႆႇႁူႉ ဝႃႈၼႆ။

လုၵ်ႈယိင်း လုင်းၸေႃးၵ တင်း ပႃႈၶႆႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၾႆးမႆႈပုမ်ႇၶဝ်ႈ ၼႃးႁဝ်းၶႃႈ။ ႁဝ်းၶႃႈ ႁဵတ်းဝႆႉ 2 ပုမ်ႇၶႃႈ။ ၾႆးမႆႈၼၼ်ႉ မႆႈတင်း 2 ပုမ်ႇ။ ပုမ်ႇၶဝ်ႈ/ၵွင်လဵၵ်ႉၼၼ်ႉ ဢမ်ႇတၼ်းလႆႈသင်သေဢိတ်း။ ပုမ်ႇဢၼ် ၶႂ်ႈယႂ်ႇဝႆႉၼၼ်ႉတႄႉ တၼ်းၶႄလႆႈသေ လႆႈၶဝ်ႈၵမ်းၽွင်ႈၵူၺ်းၶႃႈ။ ပီၼႆႉ ၼႃးႁဝ်းၶႃႈသမ်ႉလီဝႆႉ။ မိူဝ်ႈၵူႈပီ ႁဝ်းၶႃႈ လႆႈႁဵတ်းပုမ်ႇလဵဝ်ၵူၺ်း။ ပီၼႆႉ ႁဝ်းၶႃႈ ႁဵတ်း 2 ပုမ်ႇ။ လွင်ႈလႆႈမႆႈၼႆႉ ပဵၼ်ယွၼ်ႉသင် ပဵၼ်ၽႂ်ၽဝ် ဢၼ်ဝႃႈၼၼ်ႉ ဢမ်ႇပႆႇႁူႉၶႃႈ” ဝႃႈၼႆ။

မၼ်းၼၢင်းလၢတ်ႈဝႃႈ “ ၶဝ်ႈ 2 ပုမ်ႇၼႆႉ လၢမ်းၶၢတ်ႈဝႆႉဝႃႈ တေလႆႈၶဝ်ႈပိူၵ်ႇ ဢမ်ႇယွမ်း 100 ထူင်။ ၵေးလၢင်းပီၼႆႉ လႆႈၸႂ်ႉဝႆႉ 20 သႅၼ်ပၢႆ။ ၵႃႈၶၼ်တၢင်းမူတ်းတႄႉ ဢိင်ၼိူဝ် ၶၼ်ၶဝ်ႈထႅင်ႈလႄႈ ဢမ်ႇၸၢင်ႈလၢမ်းၶၢတ်ႈ” ဝႃႈၼႆ။

ၵူၼ်းဝၢၼ်ႈၼမ်ႉတူၵ်းလႄႈ ၸဝ်ႈၼႃး ႁိမ်းႁွမ်းၸိူဝ်းၵၼ်မႃးၸွႆႈၶႄလႄႈ ၾႆးဢမ်ႇတၼ်းမႆႈမူတ်း။ ၶဝ်ႈပိူၵ်ႇတႄႉ တၼ်းလႆႈၶိုၼ်းၽွင်ႈယူႇ ဝႃႈၼႆ။