Friday, March 29, 2024

ပီႈၼွင်ႉတႆး ႁွတ်ႈၵဵင်းမႆႇ တေၶဝ်ႈႁူမ်ႈၼႄၾၢင်ႁၢင်ႈ မိၵ်ႈမၢႆတႆး ၼႂ်းဝၼ်းပွႆးလွႆးၵရႃႇထူင်း

Must read

ပီႈၼွင်ႉတႆး ၵဵင်းမႆႇ ႁူမ်ႈၵၼ်သေ တေၶဝ်ႈႁူမ်ႈပႆၼႄၾၢင်ႁၢင်ႈမိၵ်ႈမၢႆ ၾိင်ႈႁိတ်ႈႁွႆးတႆး တင်း ၼူၵ်ႉတူဝ်း ၼႂ်းဝၼ်း လိူၼ် 12 မူၼ်း လႄႈ ပွႆႇမွၵ်ႇပွႆႇတဵၼ်း လွင်ႈၸွမ်းမႄႈၼမ်ႉပိင်း “ ပွႆးလွႆးၵရႃႇထူင်း” ဝႃႈၼႆ။

Photo by – SHAN/ ပီႈၼွင်ႉတႆး ၵဵင်းမႆႇ ဢွၼ်ၵၼ်ၶဝ်ႈႁူမ်ႈပႆၼႄမိၵ်ႈမၢႆတႆး ၼႂ်းဝၼ်းပွႆးလိူၼ် 12 မူၼ်း လွႆးၵရႃႇထူင်း တီႈၵဵင်းမႆႇ ပီ 2017

မိူဝ်ႈၼႆႉ ဝၼ်းတီႈ 23/11/2018 ယၢမ်းၵၢင်ၶမ်ႈ 6 မူင်း ယူႇတီႈၶွင်ႇသီႇၸၢဝ်းၶိူဝ်းတႆး ၵဵင်းမႆႇ တေဢွၼ်ႁူဝ်ၼမ်းၼႃႈ သေ ၶဝ်ႈႁူမ်ႈပႆၼႄၾၢင်ႁၢင်ႈမိၵ်ႈမၢႆတႆး ဢိၵ်ႇပႃး တၢင်းၵႃႈၾိင်ႈႁိတ်ႈႁွႆးတႆး ၼူၵ်ႉ/ တူဝ်း တေတႄႇဢဝ် တီႈၸဵင်ႇၶူး မိူင်း ၼႂ်းၵႄႈၽၵ်းတူ ၵဵင်းမႆႇ – ၽၵ်းတူတႃႈၽႄးပႆထိုင် ၵၢတ်ႇမိူင်းမႂ်ႇ ၸႄႈဝဵင်းၵဵင်းမႆႇ ၸိုင်ႈထႆး။

- Subscription -

ၸၢႆးသႅင်မိူင်း မင်းၵွၼ်း ႁူဝ်ပဝ်ႈ ၶွင်ႇသီႇၸၢဝ်းၶိူဝ်းတႆး (สภาชาติพันธุ์ ไทยใหญ่) လၢတ်ႈတီႈၽူႈတွႆႇႁွၵ်ႈဝႃႈ “ ပီႈၼွင်ႉတႆး ႁဝ်း မႃးယူႇသဝ်းတီႈၵဵင်းမႆႇၵေႃႈမီးတင်းၼမ်။ ဢၼ်ၵူႈပီ ႁဝ်းၶႃႈ ၵႂႃႇၶဝ်ႈႁူမ်ႈပိူၼ်ႈၵေႃႈ မၼ်းပႆႇမီးလွင်ႈ ထၢင်ႇႁၢင်ႈ မိူၼ်ပီၼႆႉ။ ပီၼႆႉ ႁဝ်းၶႃႈၵေႃႈ ၶတ်းၸႂ်သေ ႁဵတ်းမႃး ၵွပ်ႈပိူဝ်ႈႁဝ်းၶႃႈၵေႃႈ တေလႆႈၶဝ်ႈၶေႉၶႅင်ႇၸွမ်းပိူၼ်ႈ ယွၼ်ႉ မၼ်းပဵၼ်ၵရႃႇထူင်းယႂ်ႇ။ ၵွပ်ႈၼႆလႄႈ ႁႂ်ႈပီႈၼွင်ႉတႆးႁဝ်းၶႃႈ ပေႃးမီးသုၼ်ႇႁူမ်ႈပႃး ၼႂ်းၵဵင်းမႆႇ။ ထႅင်ႈလွင်ႈၼိုင်ႈၵေႃႈ ပိူၼ်ႈမွၵ်ႇထိုင်ႁဝ်းမႃး ႁဝ်းၶႃႈၵႂႃႇၶဝ်ႈႁူမ်ႈၵူႈပီၵူႈပီၵေႃႈ မၼ်းဢမ်ႇယႂ်ႇပဵင်းပီၼႆႉ ၵွပ်ႈၼႆပီၼႆႉၵေႃႈ ႁဝ်းၶႃႈ ၶဝ်ႈႁူမ်ႈ ႁႂ်ႈမၼ်းပေႃးယိုင်ႈယႂ်ႇ” ဝႃႈၼႆ။

Photo by – SHAN/ ပီႈၼွင်ႉတႆး ၵဵင်းမႆႇ ဢွၼ်ၵၼ်ၶဝ်ႈႁူမ်ႈပႆၼႄမိၵ်ႈမၢႆတႆး ၼႂ်းဝၼ်းပွႆးလိူၼ် 12 မူၼ်း လွႆးၵရႃႇထူင်း တီႈၵဵင်းမႆႇ ပီ 2017

သိုပ်ႇလၢတ်ႈဝႃႈ “ထႅင်ႈလွင်ႈၼိုင်ႈၵေႃႈ ၶူဝ်းၼုင်ႈတၢင်းဝႆ ၾိင်ႈထုင်းႁဝ်းၶႃႈ ဢၼ်လႂ်ပဵၼ်ဢၼ်ၸႅတ်ႈဢၼ်ၸၢင်ႇ ၶွင် ႁဝ်းဢၼ်ဝႃႈၼၼ်ႉ ၼင်ႇႁိုဝ် ပိူၼ်ႈပေႃးတေလႆႈႁူႉၶွင်ဢၼ်ၸႅတ်ႈတႆးႁဝ်း ၸင်ႇလႆႈဢဝ်တိုဝ်ႉတၢင်း ဢၼ်ၼႆႉသေ ၸတ်းႁဵတ်းမႃး ယဝ်ႉၵေႃႈ မွၵ်ႇထိုင် ပီႈၼွင်ႉတႆးႁဝ်းၶႃႈ ၵူႈၵေႃႉ ႁႂ်ႈမႃးၶဝ်ႈႁူမ်ႈၸွမ်းၵၼ် တွၼ်ႈတႃႇ ပဵၼ်ၼႃႈတႃ တႆးႁဝ်းၶႃႈ” ဝႃႈၼႆ။

ပီၼႆႉ တွၼ်ႈတႃႇပီႈၼွင်ႉတႆး လႆႈမၢႆထႅဝ် 21 တင်း 22 ။ တေတုမ်ၵၼ်ယၢမ်း 6 မူင်း ၵၢင်ၶမ်ႈ 7 မူင်းတေဢွၼ်ပႆၼႄၵႂႃႇ ဝႃႈၼႆ။

ၸၢႆးသႅၼ်မွင်း ၵူၼ်းၼုမ်ႇၽူႈဢွၼ်တူင်ႉၼိုင် ၵေႃႉၼိုင်ႈ လၢတ်ႈဝႃႈ “ မွၵ်ႇထိုင် ပီႈၼွင်ႉတႆးႁဝ်းၶႃႈ ၼႂ်းၵဵင်းမႆႇ ၵူႈၵေႃႉ ၵူႈၵူၼ်း မႃးၶဝ်ႈႁူမ်ႈၸွမ်းၵၼ်ၶႃႈ။ ပီၼႆႉ ႁဝ်းၶႃႈ တေၸတ်းႁဵတ်းယႂ်ႇလူင်ၼႆလႄႈ ၼင်ႇႁိုဝ် ႁဝ်းၶႃႈ ပေႃးတေ ၼႄလႆႈ ၾၢင်ႁၢင်ႈတႆးႁဝ်းၶႃႈၼႆသေ ႁႂ်ႈႁဝ်းၶႃႈ မႃးၶဝ်ႈႁူမ်ႈၸွမ်းၵၼ်ၼမ်ၼမ်ၶႃႈ။ လိူဝ်ၼၼ်ႉ ႁႂ်ႈဢွၼ်ၵၼ် သႂ်ႇၶူဝ်း တႆး၊ ၶႅၼ်းႁူဝ်တႆး မႃးၵၼ်ၵူႈၵေႃႉၶႃႈ။ သင်ဝႃႈ ပီႈၼွင်ႉႁဝ်း ဢမ်ႇႁူႉတီႈၸူႉတုမ်ၵၼ် ဢမ်ႇၼၼ် ၶႂ်ႈထၢမ်လၢႆးႁူဝ်ယွႆႈ မၼ်း ၸိုင် ၵပ်းသိုပ်ႇမႃးလႆႈတီႈမၢႆၾူၼ်း ၶႃႈႁဝ်း 099-1381836 ၵေႃႈလႆႈၶႃႈ” ဝႃႈၼႆ။

မိူဝ်ႈပီ 2017 ၼၼ်ႉၵေႃႈ ယူႇတီႈၶွင်ႇသီႇၸၢဝ်းၶိူဝ်းတႆး ၵဵင်းမႆႇသေ ဢွၼ်ႁူဝ်ၼမ်းၼႃႈ ပီႈၼွင်ႉတႆး (ႁႅင်းၵၢၼ်တႆး) ၼႂ်း ၵဵင်းမႆႇ ၶဝ်ႈႁူမ်ႈပႆၼႄၾၢင်ႁၢင်ႈမိၵ်ႈမၢႆတႆးလႄႈ ၼႄပႃး တၢင်းၵႃႈၼူၵ်ႉတူဝ်းလႄႈ လၢႆးႁႆႇၵွင်မွင်းတႆး မႃးယဝ်ႉ ၵမ်း ၼိုင်ႈ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း