ၽူႈၶဝ်ႈၸုမ်းဢူၺ်းလီပွတ်းႁွင်ႇလႄႈ RCSS ပဵၼ်ပၢင်တိုၵ်းၵၼ် ၼႂ်းဝၢၼ်ႈၼႃးလေႃႉ ဢိူင်ႇၸေႈၶၢၼ် ၸႄႈဝဵင်းသီႇ ပေႃႉ ပၢင်တိုၵ်းႁိုင် 5 မိၼိတ်ႉ(ၼႃးထီး) ၵူၼ်းဝၢၼ်ႈတူၵ်းပဵၼ်ယိူဝ်ႇ ပၢင်တိုၵ်း မီးလွင်ႈမၢတ်ႇၸဵပ်းလူႉတၢႆ။
မိူဝ်ႈၼႆႉ ဝၼ်းတီႈ 23/11/2018 ယၢမ်းၵၢင်ၼႂ် 6:20 မူင်း ထိုင် 6:25 မူင်း ၶၢဝ်းယၢမ်းႁိုင် 5 မိၼိတ်ႉ(ၼႃးထီး) သိုၵ်းၶူဝ်း ၶဵဝ် SSPP တင်း သိုၵ်းၶူဝ်းလၢႆး RCSS ပဵၼ်ပၢင်တိုၵ်းၵၼ် ၼႂ်းဝၢၼ်ႈၼႃးလေႃႉ ဢိူင်ႇၸေႈၶၢၼ် ၾၢႆႇၸၢၼ်းဝဵင်း သီႇ ပေႃႉ ယၢၼ်ၵႆ မွၵ်ႈ 27-28 လၵ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၵူၼ်းဝၢၼ်ႈၼႃးလေႃႉ ၸၢႆးပေႇ ဢႃယု 30 ပီပၢႆ တင်း ဢၢႆႈၸၢႆးဢွၼ်ႇ ဢႃယု 7 ၶူပ်ႇ လႆႈလူႉတၢႆထင်တီႈ။ ၼၢင်းဢေးမူၼ်း ဢႃယု 20 ပီပၢႆ၊ ၸၢႆးသၢင်ႇၼွင်ႉ ဢႃယု 30 ပီပၢႆလႄႈ မေႃသွၼ်ၼၢင်းထူၺ်း ဢႃယု 20 ပီပၢႆ လႆႈမၢတ်ႇၸဵပ်း ဝႃႈၼႆ။
ၵူၼ်းဝၢၼ်ႈၼႃးလေႃႉ ဢၼ်ပဵၼ်ပီႈၼွင်ႉၵူၼ်းလူႉတၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ပၢင်တိုၵ်းတႄႉ ပဵၼ်ၸဵမ်ၸဝ်ႉယဝ်ႉ ၶဝ်ယိုဝ်းၵၼ်ၼႂ်းဝၢၼ်ႈၵမ်းလဵဝ်ဢေႃႈ။ ပဵၼ်ၶူဝ်းလၢႆးတင်း ၶူဝ်းၶဵဝ်ၼႆႉယဝ်ႉၶႃႈ။ ၵူၼ်းဝၢၼ်ႈလႆႈ လူႉတၢႆၸွမ်း 2 ၵေႃႉ မၢတ်ႇၸဵပ်း 3 ၵေႃႉ။ ဢမ်ႇပွင်ႇၸႂ်ၸွမ်းယဝ်ႉၶႃႈ ႁဝ်းတေႃႇႁဝ်းယိုဝ်းၵၼ်ၶိုၼ်းၸိူင်ႉၼႆ။ ႁဝ်းၶႃႈ ပဵၼ်ၵူၼ်းဝၢၼ်ႈတႄႉ ယူႇၼႂ်းၶိုင်ႈၵၢင်မၼ်းသေ ၵႂင်ဝႃႈၵႂင်ၶႃႈဢေႃႈၼႆႉ” ဝႃႈၼႆ။
သိုပ်ႇလၢတ်ႈဝႃႈ ၸုမ်းၶိုၼ်ႈ ထွၼ်ဢွၵ်ႇၵႂႃႇတၢင်းၾၢႆႇတူၵ်း တၢင်းၵႃးမူတ်းယဝ်ႉ။ ထႅင်ႈၸုမ်းၼိုင်ႈသမ်ႉ လုၵ်ႉတၢင်း ပွတ်းႁွင်ႇသေ ၽိူမ်ႉၶဝ်ႈမႃးထႅင်ႈ လႅပ်ႈတေၶဵင်ႈၵၼ်ထႅင်ႈၶႃႈႁိုဝ်ၵေႃႈ ဢမ်ႇႁူႉ ဝႃႈၼႆ။
ၵူၼ်းမၢတ်ႇၸဵပ်း 3 ၵေႃႉၼၼ်ႉ ၽွင်းသူင်ႇတူဝ် ၵႂႃႇယူတ်းယႃ တီႈႁူင်းယႃမိူင်းၶိူဝ်းၼၼ်ႉ လႆႈႁူႉဝႃႈ တၢႆၸွမ်းတၢင်း ထႅင်ႈ ၵေႃႉၼိုင်ႈ ပဵၼ်ၸၢႆးၼွင်ႉ ဢႃယု 30 ပီပၢႆ ဝႃႈၼႆ။
တေႃႈလဵဝ် ဢၼ်ၵူၼ်းဝၢၼ်ႈပၢႆႈၽေးသိုၵ်းတႄႉ ပႆႇမီး။
ၵဵဝ်ႇလူၺ်ႈလွင်ႈၼႆႉ ၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူးတပ်ႉသိုၵ်းတင်းသွင်ၾၢႆႇယူႇၵေႃႈ ယင်းဢမ်ႇပႆႇလႆႈ။ တီႈပၢင် တိုၵ်းၼၼ်ႉ လွင်ႈမၢတ်ႇၸဵပ်းလူႉတၢႆ သိုၵ်းတင်း 2 ၾၢႆႇတႄႉ ပႆႇလႆႈႁူႉၸွမ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ