ၸဝ်ႈၵႃးၼင်ႇၵၼ် ၽိတ်းမေႃးထဵင်ၵၼ်သေ ပလိၵ်ႈၾၢႆႇၵုမ်းၵမ် သဵၼ်ႈတႃႈသၢႆတၢင်း ၶဝ်ႈၵႄႈလိတ်ႈ ၺႃးၸဝ်ႈၵႃး ဢဝ်လႅဝ်းၾၼ်းတိူဝ်ႉ ဝႃႈၼႆ။

ဝၼ်းတီႈ 20/11/2018 တီႈသုၼ်ၵႃႉၶၢႆ လႅၼ်လိၼ်တႆး-ၶႄႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ ယွၼ်ႉရူတ်ႉ ၵႃး ဢိုတ်းၶမ်တၢင်းသေ ၸဝ်ႈၵႃးၼင်ႇၵၼ် ၽိတ်းမေႃးထဵင်ၵၼ် ပလိၵ်ႈၾၢႆႇၵုမ်းၵမ် သဵၼ်ႈတႃႈသၢႆတၢင်း ၶဝ်ႈၵႄႈ လိတ်ႈ ၺႃးၸဝ်ႈၵႃးဢဝ်လႅဝ်းၾၼ်းၺႃး ပလိၵ်ႈ ဝႃႈၼႆ။

ၵူဝ်ႇမိၼ်း ၵူၼ်းႁေႃႈၵႃး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈၵႃး လမ်းၼိုင်ႈလႄႈ လမ်းၼိုင်ႈ ႁေႃႈၶၢမ်ႈပူၼ်ႉ ၵၼ် ႁဵတ်းၼၼ်သေ ၸဝ်ႈၵႃး 12 လေႃႉ ၸိုဝ်ႈႁွင်ႉ ၸေႃႇၸေႃႇ တင်း ၸဝ်ႈၵႃး 22 လေႃႉ ၽိတ်းမေႃးထဵင်ၵၼ် ၶဝ် ၼင်ႇၵၼ် ၽိတ်းမေႃးၾၼ်းတႅင်းၵၼ်၊ ပလိၵ်ႈ ၶဝ်ႈၵႄႈ ၺႃးၾၼ်းၸွမ်း။ ၵူၺ်းၵႃႈ ဢမ်ႇထိုင်တီႈလႆႈမႆႈၸႂ်” ဝႃႈၼႆ။

တေႃႈလဵဝ် ပလိၵ်ႈၾၢႆႇၵုမ်းၵမ် သဵၼ်ႈတၢင်း တင်း ၸဝ်ႈၵႃး 12 လေႃႉ ၸေႃႇၸေႃႇ လႆႈၶဝ်ႈယူတ်းယႃတူဝ်ဝႆႉ တီႈႁူင်း ယႃ ၵူၼ်းမိူင်းၸႄႈဝဵင်းမူႇၸေႊ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၾၢႆႇပလိၵ်ႈ လႆႈပိုတ်ႇဢမူႉ/ၶၻီႊ ဢဝ်လိူင်ႈလၢဝ်း ၵူၼ်းႁေႃႈၵႃး ဢၼ်ဢဝ်လႅဝ်းၾၼ်း သႂ်ႇ ပလိၵ်ႈၾၢႆႇၵုမ်းၵမ်ၼၼ်ႉ တီႈႁူင်းပလိၵ်ႈၸႄႈဝဵင်းမူႇၸေႊ ဝႃႈၼႆ။

ၼႂ်းၸႄႈဝဵင်းမူႇၸေႊၼႆႉ ၸဝ်ႈၵႃး ၵမ်ႈၼမ် ႁေႃႈၵႃး ဢမ်ႇမီးပၵ်း ဢမ်ႇမီးပိူင်သေ ၵႃးလူင် ၵႆႉၵႆႉၶမ်ဢိုတ်းသဵၼ်ႈတႃႈ သၢႆတၢင်းယူႇတႃႇသေႇ။ ၵူၼ်းမိူင်းၵႂႃႇမႃး ႁူပ်ႉတၢင်းယၢပ်ႇၽိုတ်ႇၸွမ်း ဝႃႈၼႆ။