ၵူၼ်းမိူင်းတႆးမႆႈၸႂ် ဝူၼ်ႉၵႂင်ၸွမ်းလွင်ႈပၵ်းပိူင်မၢႆမီႈ တီႈလိၼ် ဢၼ်လူင်ပွင်ၸိုင်ႈႁဵတ်းဢွၵ်ႇမႂ်ႇၼႆႉ

ၵူၼ်းမိူင်းတႆးမႆႈၸႂ် လွင်ႈပၵ်းပိူင်တီႈလိၼ် ဢၼ်လူင်ပွင်ၸိုင်ႈႁဵတ်းဢွၵ်ႇမႂ်ႇၼၼ်ႉ ယွၼ်ႉဝႃႈ တေတုမ်ႉတိူဝ်ႉ ၵၢၼ်ႁႃ ၵိၼ်လဵင်ႉတွင်ႉၵူၼ်းမိူင်းႁၢဝ်ႈႁႅင်း လႄႈ တေႁဵတ်းႁႂ်ႈၵူၼ်းမိူင်း ႁူပ်ႉလွင်ႈယၢပ်ႇၽိုတ်ႇ ဝႃႈၼႆ။

ဝၼ်းတီႈ 30/10/2018 ၼၼ်ႉ ယူႇတီႈငဝ်ႈၵေႃ ၾၢႆႇၸႅၵ်ႈၽႄ လိၼ်ပဝ်ႇ၊ လိၼ်လၢပ်ႈလႄႈ လိၼ်လိူင်း တင်းၾၢႆႇ လူင် ပွင်ၸိုင်ႈ ပိုၼ်ၽၢဝ်ႇဢွၵ်ႇဝႆႉ ၵူၼ်းမိူင်း ၸိူဝ်းဢၼ်ဢမ်ႇပႆႇမီးဝႂ်တီႈလိၼ်ၼၼ်ႉ ႁႂ်ႈဢွၼ်ၵၼ်ႁဵတ်း ဝႂ်တီႈလိၼ် (တၢင်ႇ မၢႆၾၢင်) ၶဝ်ႈပဵၼ်တၢင်းၵၢၼ် တႃႇၶၢဝ်းတၢင်း 6 လိူၼ် ႁႂ်ႈႁဵတ်းယဝ်ႉ သင်ဝႃႈ ဢမ်ႇႁဵတ်းၸိုင် သင်ၵူတ်ႇထတ်း ႁၼ်ၺႃး ဢၼ်ၽုၵ်ႇသွမ်ႈဝႆႉၸိူဝ်းၼၼ်ႉ ဢမ်ႇမီးဝႂ်တီႈလိၼ်ၸိုင် တေတီႉယဵတ်ႈၶွၵ်ႈ လႄႈ မၢပ်ႇမႂ်ငိုၼ်း ၸွမ်းၼင်ႇ ပၵ်းပိူင်မီး ၼၼ်ႉ ဝႃႈၼႆ။

ၸဝ်ႈႁႆႈၸဝ်ႈၼႃး ၵေႃႉၼိုင်ႈ ၼႂ်းၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ပၵ်းပိူင်တီႈလိၼ် ဢၼ်ၶဝ်ႁဵတ်းဢွၵ်ႇ မႃးၼႆႉ ႁၼ်ထိုင်ဝႃႈ မၼ်းတေတုမ်ႉတိူဝ်ႉ ၵူၼ်းႁဵတ်းသူၼ်/ႁႆႈ/ ၼႃး ႁဝ်းၶႃႈတႄႉတႄႉ ပိူၼ်ႈတေၸၢင်ႈယိုတ်းဢဝ်လၢႆ ၵေႃႈပဵၼ်လႆႈ။ ၼႂ်းဝဵင်းလၢႆးၶႃႈႁဝ်းၼႆႉ ဢၼ်မီးဝႂ်တီႈလိၼ် ႁူဝ်ပၢၵ်ႇလႂ် ဢမ်ႇပူၼ်ႉ 10 ၵေႃႉ မီးၵႃႈၼႆႉၵူၺ်း။ ဢၼ်ၶဝ်ဢွၵ်ႇပၵ်းပိူင်မၢႆမီႈမႃးၸိူင်ႉၼႆ ၶၢဝ်းယၢမ်းၵေႃႈဢေႇ ၶၢဝ်းတၢင်း 6 လိူၼ် ႁႂ်ႈႁဵတ်းယဝ်ႉၼႆ တေႁဵတ်းႁိုဝ် ႁႂ်ႈယဝ်ႉၶႃႈလႃႇ ၵူၼ်းဝၢၼ်ႈၼွၵ်ႈၼႃးပၢင်ႇႁဝ်း မၢင်ၵေႃႉ ယင်းပႆႇႁူႉတီႈပွင်ႇမၼ်း။ မၢင်ၵေႃႉ ယင်းပႆႇႁူႉလွင်ႈ ပၵ်း ပိူင်ဢၼ်ၼႆႉဢွၵ်ႇမႃး ၵူၼ်းမိူင်းဢၼ်ႁဵတ်းသူၼ် မႃး ၶၢဝ်းတၢင်း 10-20 ပီမႃးၼႆႉ မၢင်ၵေႃႉ ဢမ်ႇမီးဝႂ်တီႈလိၼ် လွင်ႈ ၼႆႉၵိုင်ႇလီႁဵတ်းၸိူင်ႉႁိုဝ် ဢမ်ႇၼၼ်ၵေႃႈ ႁႂ်ႈဢွၼ်ၵၼ်ၵႂႃႇတၢင်ႇႁဵတ်းႁႂ်ႈယဝ်ႉၼႂ်းၶၢဝ်းတၢင်း 6 လိူၼ်ႁႃႉ၊ ဢမ်ႇၼၼ် ၵူၼ်းမိူင်းတႆးႁဝ်း လီႁူမ်ႈၵၼ် ဢွၼ်ၵၼ်သၢၼ်ၶတ်း လွင်ႈပၵ်းပိူင်ၼႆႉႁႃႉ လွင်ႈၼႆႉ ႁဝ်းၶႃႈ ၵူၼ်းမိူင်း ထုၵ်ႇလီဢွၼ် ၵၼ်ဝူၼ်ႉတူၺ်းယူႇ” ဝႃႈၼႆ။

ၸၢႆးဢွင်ႇမိၼ်ႉဢူး ၽူႈလူင်ႉလႅၼ်ႇ ၾၢႆႇမၢႆမီႈ လၢတ်ႈတီႈၽူႈတွႆႇႁွၵ်ႈဝႃႈ “ လူင်ပွင်ၸိုင်ႈပၼ် ၶၢဝ်းယၢမ်း 6 လိူၼ်ၼႆႉ မၼ်းဢေႇၼႃႇ ၵူၼ်းမိူင်းၸိူဝ်းယူႇၸွမ်း ဝၢၼ်ႈၼွၵ်ႈၼႃးပၢင်ႇယင်းတေပႆႇႁူႉၶၢဝ်ႇ မၼ်းလူးၵွၼ်ႇ ။ ႁၼ်ထိုင်ဝႃႈ ၽူႈ မီးပုၼ်ႈၽွၼ်းၼႂ်းလူင်ပွင်ၸိုင်ႈ လူဝ်ႇလူင်းပိုၼ်ႉတီႈပၼ်တၢင်းႁူႉ ၵူၼ်းမိူင်းသေၵွၼ်ႇ၊ ၾၢႆႇၼိုင်ႈၵေႃႈ ၶႂ်ႈႁႂ်ႈၵူၼ်း ဝၢၼ်ႈ ၵူၼ်းမိူင်း သႂ်ႇၸႂ်ထွမ်ႇ/ဢၢၼ်ႇၶၢဝ်ႇငၢဝ်းယူႇတႃႇသေႇ ပေႃးပူၼ်ႉၶၢဝ်းတၢင်း 6 လိူၼ်သေႁဝ်းပႆႇလႆႈၵႂႃႇတၢင်ႇ ယိုၼ်ႈႁဵတ်းဝႂ်လႆႈၼႆၸိုင် လူင်ပွင်ၸိုင်ႈ ၸၢင်ႈယိုတ်း ဢဝ်တီႈလိၼ်ႁဝ်းလႆႈ” ဝႃႈၼႆ။

မၢႆမီႈမႂ်ႇၼႆႉပိုၼ်ၽၢဝ်ႇမိူဝ်ႈလိူၼ်ထူၼ်ႈ 9 သေပေႃးလိူၼ်ထူၼ်ႈ 3 ပီ2019 ၼႆႉတဵမ်ၶၢဝ်းယၢမ်း 6 လိူၼ်။ ၵူၼ်းၼုမ်ႇ ၾၢႆႇတူင်ႉ ၼိုင်ၵဵဝ်ႇၵပ်းလိၼ်သူၼ်ႁႆႈၼႃးတိုၵ်းသူၼ်းဝႃႈ – ႁႂ်ႈၸဝ်ႈသူၼ်ၸဝ်ႈၼႃး ၸိူဝ်းပႆႇမီးဝႂ်တီႈလိၼ်ၼၼ်ႉ ႁိပ်ႈၼႅတ်ႈၵႂႃႇတီႈ ႁွင်ႈၵၢၼ်ၾၢႆႇၼႃႈလိၼ်(မျေႇၸယိၼ်း) ဝဵင်းၽႂ်မၼ်းသေ ဢုပ်ႇလၢတ်ႈတွင်ႈ ထၢမ်ယွၼ်းဝႂ်ၾွမ်ႊ တႃႇထႅမ်ၶေႃႈမုလ်း တႃႇယွၼ်းဝႂ်ၾွမ်ႊ 7 (ပူင်ႇၸၢမ်ႇ 7)။

ၼႂ်းမၢႆမီႈမႂ်ႇၼၼ်ႉပႃးဝႆႉဝႃႈ- တီႈလိၼ်ဢၼ်ဢမ်ႇမီးဝႂ်သင်ၼၼ်ႉ ပေႃးပူၼ်ႉၶၢဝ်းယၢမ်း 6 လိူၼ် တေပဵၼ်ၶွင်ၸိုင်ႈ မိူင်းသေ ၽႂ်တေဢမ်ႇလႆႈမႃးၽုၵ်ႇသွမ်ႈၵိၼ်။ ၽႂ်ၽူႈလႂ်ပူၼ်ႉပႅၼ်ၽုၵ်ႇသွမ်ႈၸိုင် တၵ်းၺႃးတူတ်ႈ တၢမ်ႇမႂ်ငိုၼ်းဢမ်ႇ ၼၼ်တူတ်ႈၶွၵ်ႈ – ဢမ်ႇၼၼ်တင်းတူၵ်းၶွၵ်ႈလႄႈ မႂ်ငိုၼ်းဝႃႈၼႆ။ မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇၼၼ်ႉတႄႉ ပိုၼ် ၽၢဝ်ႇၸူးတပ်ႉသိုၵ်းဝႃႈ လိၼ်ဢၼ်သိုၵ်း ယိုတ်းဝႆႉၼၼ်ႉ ပေႃးဢမ်ႇပဵၼ်ၸႂ်ႉ ႁႂ်ႈၸႅၵ်ႇပၼ်ၵူၼ်းမိူင်းၶိုၼ်း ဝႃႈၼႆဝႆႉ လူးၵွၼ်ႇ။