ၵူၼ်းမိူင်းပၼ်ႇ ၵေႃႉၼိုင်ႈယဵပ်ႇၺႃးမၢၵ်ႇ ၽွင်းၵႂႃႇၼႃး ပဵၼ်မၢၵ်ႇဢၼ်ႁၢင်ႈၵၢင်ဝႆႉၼိူဝ် သဵၼ်ႈတၢင်းၵူၼ်းမိူင်းၵႂႃႇမႃး ဝႃႈၼႆ။
ဝၼ်းတီႈ 18/11/2018 ယၢမ်းၵၢင်ၼႂ် မွၵ်ႈ 8 မူင်း ဢူးၶုၼ်ႇၵျေႃႇ ဢႃယု 53 ပီ ပဵၼ်ၸၢဝ်းပဢူဝ်း ယူႇဝၢၼ်ႈမႆႉပူၵ်ႇ ပၢင်ပီႉ ဢိူင်ႇၼႃးမွၼ် ၽွင်းမၼ်းၸၢႆးဢွၵ်ႇႁိူၼ်းၵႂႃႇ တေၵႂႃႇပေႃႉၶဝ်ႈၼႂ်းၼႃးၼၼ်ႉ ယဵပ်ႇၺႃးမၢၵ်ႇဢၼ်ႁၢင်ႈၵၢင်ဝႆႉ ၼိူဝ် သဵၼ်ႈတၢင်းၵႂႃႇမႃး၊ ယၢၼ်ၵႆဝၢၼ်ႈမႆႉပူၵ်ႇ မွၵ်ႈ 2 လၵ်း မၢၵ်ႇတႅၵ်ႇတိူဝ်ႉသႂ်ႇ တီႈၶႃလႄႈ ၸွမ်းတူဝ် လႆႈမၢတ်ႇၸဵပ်း ႁၢဝ်ႈ ႁႅင်း ဝႃႈၼႆ။
ၵူၼ်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၢၵ်ႇတႅၵ်ႇတိူဝ်ႉသႂ်ႇၵူၼ်းဝၢၼ်ႈလုၵ်ႈၼိုင်ႈ လႆႈ ငိၼ်းဝႃႈ ၾၢႆႇသိုၵ်းမၢၼ်ႈ ဢဝ်ပုၼ်ႈၽွၼ်းပၼ်မူတ်းၼႆဝႃႇ။ လႅပ်ႈပဵၼ်မၢၵ်ႇသိုၵ်းမၢၼ်ႈႁၢင်ႈၵၢင်ဝႆႉၵူၺ်း ၶဝ်ႁူႉ ထၢင်ႇ သိုၵ်းတႆး တေၵႂႃႇမႃးတၢင်းၼၼ်ႉ။ တူဝ်ဢူးၶုၼ်ႇၵျေႃႇၼႆႉ လႆႈငိၼ်းဝႃႈ ၶဝ်ဢဝ်ၵႂႃႇယူတ်းယႃ ႁူင်းယႃၼႂ်းတပ်ႉမၢၼ်ႈ တီႈၼမ်ႉၸၢင်လိူဝ်ၼၼ်ႉ ၶိုၼ်းသိုပ်ႇၵႂႃႇယူတ်းယႃတီႈဢွင်ႇပၢၼ်းယဝ်ႉ”ဝႃႈၼႆ။
တေႃႈလဵဝ် တၢင်းပွတ်းဢိူင်ႇၼႃးမွၼ် ၸႄႈဝဵင်းမိူင်းပၼ်ႇၼၼ်ႉ မီးသိုၵ်းဢၼ်တူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်း လူင် ပွင်ၸိုင်ႈမၢၼ်ႈ၊ သိုၵ်း PNLO လႄႈ သိုၵ်း RCSS ၸဵမ်ၸိူဝ်းၼႆႉ ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 16/10/2018 ၼၼ်ႉၵေႃႈ သိုၵ်း PNLO တင်း RCSS လႆႈပဵၼ်ပၢင်တိုၵ်းၵၼ် တၢင်းၾၢႆႇတူၵ်း ဝၢၼ်ႈမႆႉပူၵ်ႇ ပၢင်ပီႉ ဢိူင်ႇၼႃးမွၼ် ၸႄႈဝဵင်းမိူင်းပၼ်ႇ မႃးၵမ်းၼိုင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ