သိုၵ်း TNLA တင်း ၸုမ်းပျီႇတုၸိတ်ႉ မၢၼ်ႈပၢင်ႇ ပဵၼ်ပၢင်တိုၵ်းၵၼ် တီႈၼႂ်းဢိူင်ႇၼႃးၼၢင်း ၸႄႈဝဵင်းလႃႈသဵဝ်ႈ ၵူၼ်းဝၢၼ်ႈဢွၼ်ၵၼ်ငိူင်ႉဝႄႈၽေးသိုၵ်း။

မိူဝ်ႈၼႆႉ ဝၼ်းတီႈ 20/11/2018 ယၢမ်းၵၢင်ၼႂ် မွၵ်ႈ 8 :30 မူင်း သိုၵ်းတဢၢင်း TNLA ၶိုၼ်ႈလေႃႇယိုဝ်း တပ်ႉပၢင်သဝ်း သိုၵ်းပျီႇတူႉၸိတ်ႉမၢၼ်ႈပၢင်ႇ တီႈလွႆပၢင်လူမ်း ၼႂ်းဢိူင်ႇၼႃးၼၢင်း ထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်း ႁွင်ႇ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း ဝႃႈၼႆ။

ၵူၼ်းဝၢၼ်ႈ ၼႂ်းဢိူင်ႇၼႃးၼၢင်း ဢၼ်ငိူင်ႉဝႄႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ်ငိူင်ႉဝႄႈၽေး မႃးယူႇဝႆႉတီႈ ဝၢၼ်ႈတိုင်းၶမ်း ၸဵမ်မိူဝ်ႈၶမ်ႈဝႃးၶႃႈ။ ဢၼ်ႁဝ်းၶႃႈမႃးၼႆႉ ပဵၼ်ၽူႈၸၢႆးတင်းသဵင်ႈၶႃႈယဝ်ႉ တင်းမူတ်း တေမီးမွၵ်ႈ 15 ၵေႃႉၼႆႉၶႃႈ။ တေႃႇထိုင်မိူဝ်ႈလဵဝ် ပႆႇႁတ်းပွၵ်ႈမိူဝ်းၶႃႈ။ ၶဝ်ပဵၼ်ပၢင်တိုၵ်းၵၼ် ယွၼ်ႉလွင်ႈ သင်ဢၼ် ဝႃႈၼၼ်ႉ ဢမ်ႇလႆႈႁူႉ” ဝႃႈၼႆ။

သိုပ်ႇလၢတ်ႈထႅင်ႈဝႃႈ “ တေႃႈလဵဝ်ၼႆႉ သိုၵ်းလွႆ မႃးမီးဝႆႉတီႈၼႂ်းဝၢၼ်ႈလူင် တင်း ဝၢၼ်ႈႁွင်ႇ၊ သိုၵ်းမၢၼ်ႈသမ်ႉ တေမီး ဝႆႉ ယူႇတၢင်းဝၢၼ်ႈတွၼ်းၼေႇလႄႈ ဝၢၼ်ႈႁူဝ်သႃ ၸိူဝ်းၼႆႉ” ဝႃႈၼႆ။

ၵူၼ်းဝၢၼ်ႈမၢင်ၸိူဝ်း မိူၼ်ၼင်ႇ ဝၢၼ်ႈလူင်၊ ဝၢၼ်ႈႁွင်ႇ၊ ဝၢၼ်ႈၼႃးၵႃႈၼိူဝ်၊ ဝၢၼ်ႈၵွင်း ၸိူဝ်းၼႆႉတႄႉ ဢွၼ်ၵၼ်ပၢႆႈ ၵႂႃႇယူႇ ဝႆႉတီႈဝတ်ႉဝၢၼ်ႈမိူင်းပၢႆ၊ ၵူၼ်းမိူင်းဢၼ်ပၢႆႈၵႂႃႇတီႈဝၢၼ်ႈတိုင်းၶမ်းသမ်ႉ ပဵၼ်ၵူၼ်းဝၢၼ်ႈလူင်၊ ဝၢၼ်ႈႁွင်ႇလႄႈ ဝၢၼ်ႈၵၢတ်ႇ။ လိူဝ်ၼၼ်ႉ ဢွၼ်ၵၼ်ပၢႆႈၵႂႃႇမူၵ်းယူႇၸွမ်းၼႂ်းထဵင်ၼႃး ၵေႃႈမီး။

ၵူၼ်းပၢႆႈၽေးသိုၵ်း ဢၼ်မီးဝႆႉတီႈဝတ်ႉဝၢၼ်ႈမိူင်းပၢႆၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈဢွၼ်ၵၼ်ပၢႆႈ ဢွၵ်ႇ မႃးမိူဝ်ႈၼႆႉၸဵမ်ၸဝ်ႉၶႃႈယဝ်ႉ။ မိူဝ်ႈၼႆႉ လႆႈငိၼ်းသဵင်ၵွင်ႈဢွၵ်ႇတႄႉ တၢင်းႁိုင် တေမီးမွၵ်ႈ ၶိုင်ႈၸူဝ်ႈမူင်းၶႃႈ။ ဢၼ်ႁဝ်းၶႃႈ မႃးမီးဝႆႉတီႈဝတ်ႉဝၢၼ်ႈမိူင်းပၢႆၼႆႉ ၵမ်ႈၼမ် ပဵၼ်ၵူၼ်းထဝ်ႈ၊ ၼၢင်းယိင်းလႄႈ လုၵ်ႈဢွၼ်ႇၶႃႈ” ဝႃႈၼႆ။

ၼႂ်းဢိူင်ႇၼႃးၼၢင်း ၸႄႈဝဵင်းလႃႈသဵဝ်ႈၼႆႉ တင်းမူတ်းမီး 8 ဝၢၼ်ႈ မိူၼ်ၼင်ႇ ဝၢၼ်ႈလူင်၊ ဝၢၼ်ႈၵွင်း၊ ဝၢၼ်ႈၵၢတ်ႇ၊ ဝၢၼ်ႈၼႃးၸၢၼ်း၊ ဝၢၼ်ႈ ၼႃးၼိူဝ်၊ ဝၢၼ်ႈႁွင်ႇ၊ ဝၢၼ်ႈႁူဝ်ၼၢင်းလႄႈ ဝၢၼ်ႈပၢင်လူမ်း ၸဵမ်ၸိူဝ်းၼႆႉ။