ၵူၼ်းထဝ်ႈ(ယိင်း) ဝၢၼ်ႈပဵင်း ဢိူင်ႇဢီႇၼၢႆး ၺႃးမၢၵ်ႇၵွင်ႈ ၽွင်းၵႂႃႇပုမ်ႇၶဝ်ႈၼႃးသေ လူႉတၢႆပႅတ်ႈၵၢင်တၢင်း။
ဝၼ်းတီႈ 18/11/2018 ယၢမ်းဝၢႆးဝၼ်း မွၵ်ႈ 1 မူင်းပၢႆ ၽူႈၵွၼ်းဝၢၼ်ႈ/ ဢိူင်ႇ ၽူႈယႂ်ႇၵူၼ်းလူင်လႄႈ ၵူၼ်းဝၢၼ်ႈ ပဵင်း ႁူမ်ႈၵၼ်သေ သွၵ်ႈတဝ်ႁႃ ၵူၼ်းထဝ်ႈ ၵူၼ်းဝၢၼ်ႈပဵင်း ၸိုဝ်ႈႁွင်ႉၼၢႆးမလွတ်ႉ(ၽူႈယိင်း) ဢႃယု မွၵ်ႈ 60 ပီ ပဵၼ်ၸၢဝ်း ၶိူဝ်းၶၢင် ၸႃတိဝၢၼ်ႈပဵင်း။ ထူပ်းႁၼ်တူဝ်တၢႆမၼ်းၼၢင်း ၼႂ်းၵႄႈဝၢၼ်ႈပဵင်း တင်း ဝၢၼ်ႈၼႃးႁႃႈ ဢိူင်ႇဢီႇၼၢႆး ၸႄႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၵူၼ်းၼႂ်းဢိူင်ႇဢီႇၼၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ်ၵႂႃႇသွၵ်ႈႁၼ် တီႈၼႂ်းထိူၼ်ႇထူပ်း ႁၼ် ၼႂ်းဝူင်ႈ ၵၢင်ဝၢၼ်ႈၼႃးႁႃႈ တင်း ဝၢၼ်ႈပဵင်း။ မၼ်းၼၢင်းၺႃးမၢၵ်ႇၵွင်ႈတိူဝ်ႉတီႈပုမ်(ထူင်ယဵဝ်ႈ) လုၵ်ႈၼိုင်ႈ။ ယွၼ်ႉပၢင်တိုၵ်းပႆႇယဵၼ် ၽူႈယႂ်ႇၵူၼ်းလူင် ၼႂ်းဢိူင်ႇ၊ ၼႂ်းဝၢၼ်ႈၵေႃႈ ႁၢမ်ႈၵူၼ်းဝၢၼ်ႈဢွၵ်ႇၵႂႃႇႁဵတ်းၵၢၼ်ၵၼ်။ မိူဝ်ႈ ဝၼ်းတီႈ 17 ၼၼ်ႉ လႆႈႁူႉဝႃႈ မၼ်းၼၢင်းၵႂႃႇပုမ်ႇၶဝ်ႈၼႆ။ ၵမ်းၼႆႉ ၵူၼ်းလူင် ၽူႈယႂ်ႇဝၢၼ်ႈပဵင်းၵေႃႈ ထတ်းတူၺ်း ၵူၼ်းၼႂ်းဝၢၼ်ႈၶဝ်သေ ဝႃႈၼၢႆးမလွတ်ႉ ပႆႇပွၵ်ႈမႃးၽႅဝ်ႁိူၼ်းႁဵတ်းၼၼ်သေ ဢွၼ်ၵၼ်ၸွမ်းသွၵ်ႈႁႃ” ဝႃႈၼႆ။
တႄႇဢဝ် ဝၼ်းတီႈ 14 လိူၼ်ၼႆႉမႃး သိုၵ်းဢူၺ်းလီပွတ်းႁွင်ႇ တင်း RCSS လႆႈပဵၼ်ပၢင်တိုၵ်းၵၼ်မႃး တေႃႇထိုင် ဝၼ်းတီႈ 17 ပၢင်တိုၵ်းၸင်ႇၵွႆႈလူတ်းယွမ်းလူင်းၵႂႃႇ ဝႃႈၼႆ။
ၼၢႆးမလွတ်ႉၼႆႉ ၺႃးယိုဝ်းၵမ်းသိုဝ်ႈႁိုဝ် ဢမ်ႇၼၼ် မၼ်းၼၢင်းၵႂႃႇၺႃးပၢင်တိုၵ်းလႄႈ ၺႃးၸၢၵ်ႇပၢင်တိုၵ်းႁိုဝ်ၼႆၵေႃႈ ၽႂ်ပႆႇႁူႉလႆႈ။
ပူၼ်ႉမႃး မိူဝ်ႈဝၼ်းတီႈ 07/11/2018 ယၢမ်းဝၢႆးဝၼ်း မွၵ်ႈ 4 မူင်းၼၼ်ႉၵေႃႈ ၵူၼ်းဝၢၼ်ႈ ႁၼ်တူဝ်တၢႆ သၢမ်မူၼ်း (ၸၢဝ်းၶၢင်) ၼႂ်းၵႄႈဝၢၼ်ႈပဵင်းၼိူဝ် – ပဵင်းတႂ်ႈ သဵၼ်ႈတၢင်း လႃႈသဵဝ်ႈ – ၼမ်ႉတူႈ ၼႂ်းဢိူင်ႇဢီႇၼၢႆး ၸႄႈဝဵင်းလႃႈ သဵဝ်ႈ ၸိုင်ႈတႆး ပွတ်းႁွင်ႇ။ မၼ်းၸၢႆးၼႆႉ ႁၢႆၵႂႃႇမိူဝ်ႈၽွင်း တပ်ႉသိုၵ်းဢူၺ်းလီပွတ်းႁွင်ႇ တင်း RCSS ပဵၼ်ပၢင်တိုၵ်း ၵၼ် မိူဝ်ႈ ဝၼ်း တီႈ 26/10/2018 ၼၼ်ႉ ဝႃႈၼႆ။
