ၵူၼ်းဝၢၼ်ႈပၢင်ႁူင်း တင်း ဝၢၼ်ႈၵေႃႇရၶႃး (ဝၢၼ်ႈ 13 လၵ်း) ဢၼ်ပၢႆႈၽေးသိုၵ်းမႃးသွၼ်ႈဝႆႉတီႈ ဝတ်ႉၵျွင်းဢီႇၼၢႆး ၼၼ်ႉ ၶိုၼ်း ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းမူတ်းယဝ်ႉ။

မိူဝ်ႈၼႆႉ ဝၼ်းတီႈ 19/11/2018 ယၢမ်းၵၢင်ၼႂ် 10:30 မူင်း ၵူၼ်းဝၢၼ်ႈပၢင်ႁူင်း တင်း ဝၢၼ်ႈၵေႃႇရၶႃး ႁူဝ်ၵူၼ်း မွၵ်ႈ 130 ၵေႃႉ ဢၼ်မႃးသွၼ်ႈဝႆႉတီႈ ဝတ်ႉၵျွင်းဢီႇၼၢႆး ၼႂ်းဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ယွၼ်ႉဝႃႈငဝ်းလၢႆးၼႂ်းပိုၼ်းတီႈၼိမ်သဝ်းယဝ်ႉလႄႈ ဢွၼ် ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းၶိုၼ်းမူတ်းယဝ်ႉ ဝႃႈၼႆ။

ၵူၼ်းဝၢၼ်ႈဢီႇၼၢႆး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ဢွၼ်ၵၼ်ပွၵ်ႈၶိုၼ်းမိူဝ်ႈၼႆႉယဝ်ႉၶႃႈ။ တီႈဝတ်ႉတႄႉ ဢမ်ႇ မီး ၽႂ်သေၵေႃႉယဝ်ႉၶႃႈ။ ၵမ်ႈၼမ် ဢၼ်ပၢႆႈမႃးပွၵ်ႈၼႆႉတႄႉ ပဵၼ်ၵူၼ်းဝၢၼ်ႈပၢင်ႁုင်း တင်း ဝၢၼ်ႈ 13 လၵ်း။ ဢၼ် ပၢႆႈမႃးၵမ်းၼႆႉ ၵမ်ႈၼမ် ပဵၼ်ၵူၼ်းထဝ်ႈ၊ ၼၢင်းယိင်းလႄႈ လုၵ်ႈဢွၼ်ႇ” ဝႃႈၼႆ။

မိူဝ်ႈဝၼ်းတီႈ 15/11/2018 ၼၼ်ႉ သိုၵ်းဢူၺ်းလီပွတ်းႁွင်ႇ တင်း RCSS ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၵႄႈဝၢၼ်ႈ ပၢင်ႁုင်း တင်း ဝၢၼ်ႈၵေႃႇရၶႃး(ဝၢၼ်ႈ 13 လၵ်း) ၵူၼ်းဝၢၼ်ႈ လႆႈဢွၼ်ၵၼ်ပၢႆႈဢွၵ်ႇမႃး မွၵ်ႈ 130 ၵေႃႉ ဝႃႈၼႆ။

မိူဝ်ႈဝၼ်းတီႈ 29/10/2018 ၼၼ်ႉၵေႃႈ သိုၵ်းဢူၺ်းလီပွတ်းႁွင်ႇ တင်း သိုၵ်း RCSS ၶဵင်ႈၶႅင်ၵၢၼ်သိုၵ်းၵၼ်လႄႈ ၵူၼ်းဢိူင်ႇဢီႇၼၢႆး 1,000 ပၢႆ ဢွၼ်ၵၼ်ပၢႆႈယၢၼ်ႁိူၼ်းယေးသွၼ်ႈယူႇတီႈဝတ်ႉၵျွင်းမၢၼ်ႈသူႈ ယဝ်ႉၵမ်းၼိုင်ႈ။

ပဵၼ်ၵူၼ်းဝၢၼ်ႈပၢင်ႁုင်း၊ ဝၢၼ်ႈပဵင်း၊ ဝၢၼ်ႈၼႃးႁႃႈ၊ ဝၢၼ်ႈ 13 လၵ်းလႄႈ ဝၢၼ်ႈ 15 လၵ်း ၼႂ်းဢိူင်ႇဢီႇၼၢႆး ၸႄႈဝဵင်း လႃႈသဵဝ်ႈ။