လူင်ပွင်ၸိုင်ႈမိူင်းႁူမ်ႈတုမ်မၢၼ်ႈ ဢွၵ်ႇပၵ်းပိူင်မႂ်ႇ ၵဵဝ်လူၺ်ႈလွင်ႈတီႈလိၼ် ႁႂ်ႈၸဝ်ႈသူၼ်ၸဝ်ႈၼႃးဢွၼ်ၵၼ်တၢင်ႇသဵၼ်ႈမၢႆ-ၼႂ်းၶၢဝ်းတၢင်း 6 လိူၼ်ႁႂ်ႈယဝ်ႉ ပေႃးဢမ်ႇတၢင်ႇတေတီႉၺွပ်းယဵတ်ႈၶွၵ်ႈဝႃႈၼႆ။

ႁၢင်လိူၼ် ဢွၵ်ႊထူဝ်ႊၿိူဝ်ႊ 2018 မႃးၼႆႉ လူင်ပွင်ၸိုင်ႈမိူင်းႁူမ်ႈတုမ်မၢၼ်ႈ ဢွၵ်ႇပၵ်းပိူင်မႂ်ႇ ၵဵဝ်ႇလူၺ်ႈလွင်ႈတီႈလိၼ်ဝႃႈ  မိူဝ်ႈလဵဝ်မီးတီႈလိၼ်ဢၼ်ပဝ်ႇႁၢမ်းယူႇ 49 သႅၼ်ဢေႊၶိူဝ်ႊ၊ တီႈလိၼ် ဢၼ်ၵူၼ်းမိူင်းၽုၵ်ႇသွမ်ႈၸႂ်ႉတိုဝ်းဝႆႉသေ ဢမ်ႇပႆႇလႆႈတၢင်ႇယင်းတိုၵ်ႉမီးယူႇ 7 သႅၼ်ဢေႊၶိူဝ်ႊပၢႆလႄႈ ႁႂ်ႈဢွၼ်ၵၼ်တၢင်ႇသဵၼ်ႈၸိုဝ်ႈဝႆးဝႆးဝႃႈၼႆ။

ၸၢႆးဢွင်ႇမိၼ်ႉဢူး ၽူႈလူင်ႉလႅၼ်ႇ ၾၢႆႇမၢႆမီႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ လူင်ပွင်ၸိုင်ႈၶဝ်ပၼ် ၶၢဝ်းယၢမ်း 6 လိူၼ်ၼႆႉ မၼ်းဢေႇၼႃႇ ၵူၼ်းမိူင်းၸိူဝ်းယူႇၸွမ်း ဝၢၼ်ႈၼွၵ်ႈၼႃးပၢင်ႇယင်းတေပႆႇႁူႉၶၢဝ်ႇ မၼ်းလူးၵွၼ်ႇ ။ ႁၼ်ထိုင်ဝႃႈ ၽူႈမီးပုၼ်ႈၽွၼ်းၼႂ်းလူင်ပွင်ၸိုင်ႈ လူဝ်ႇလူင်းပိုၼ်ႉတီႈပၼ်တၢင်းႁူႉ ၵူၼ်းမိူင်းသေၵွၼ်ႇ၊ ၾၢႆႇၼိုင်ႈၵေႃႈ ၶႂ်ႈႁႂ်ႈၵူၼ်းဝၢၼ်ႈ ၵူၼ်းမိူင်း သႂ်ႇၸႂ်ထွမ်ႇ/ဢၢၼ်ႇၶၢဝ်ႇငၢဝ်းယူႇတႃႇသေႇ ပေႃးပူၼ်ႉၶၢဝ်းတၢင်း 6 လိူၼ်သေႁဝ်းပႆႇလႆႈၵႂႃႇတၢင်ႇယိုၼ်ႈႁဵတ်းဝႂ်လႆႈၼႆၸိုင် လူင်ပွင်ၸိုင်ႈ ၸၢင်ႈယိုတ်း ဢဝ်တီႈလိၼ်ႁဝ်းလႆႈ ” ဝႃႈၼႆ။

ၵူၼ်းၼႂ်းမိူင်းၸိုင်ႈတႆးၼႆႉ ၵမ်ႈၼမ်ႁဵတ်းၵိၼ်ႁႆႈ သႆႉၵိၼ်ၼႃး လဵင်ႉတွင်ႉလဵင်ႉၼႃႈႁိူၼ်းမႃး ၸဵမ်မိူဝ်ႈပၢၼ်ပူႇမွၼ်ႇၼၢႆးယႃႈ သူၼ်ႁႆႈၼႃးၶိုင်ႈလိူဝ်ၼႆႉဢမ်ႇမီးမၢႆၾၢင်၊သဵၼ်ႈၸိုဝ်ႈ။

ၼၢင်းၶမ်း ၸဝ်ႈလိၼ်သူၼ်လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၵူၼ်းမိူင်းႁဝ်းၶႃႈၼႆႉ ႁဵတ်းႁႆႈႁဵတ်း သူၼ်ၼႂ်းထိူၼ်ႇၼႂ်းပႃႇၸွမ်းၶႅပ်ႇလႅၼ်ဝၢၼ်ႈၸိူဝ်းၼႆႉမႃးပီယၢဝ်းၶၢဝ်းႁိုင် ဢမ်ႇမီးဝႂ်တီႈလိၼ်သင် ပေႃး ၶဝ်ဢဝ်ပၵ်းပိူင်ၸိူင်ႉၼႆမႃးၸႂ်ႉတိုဝ်းတႄႉတႄႉၸိုင် တေထူပ်းတၢင်းယၢပ်ႇတႄႉဢေႃႈ ” ဝႃႈၼႆ။

မၢႆမီႈမႂ်ႇၼႆႉပိုၼ်ၽၢဝ်ႇမိူဝ်ႈလိူၼ်ထူၼ်ႈ 9 သေပေႃးလိူၼ်ထူၼ်ႈ 3 ပီ2019 ၼႆႉတဵမ်ၶၢဝ်းယၢမ်း 6 လိူၼ်။ၵူၼ်းၼုမ်ႇၾၢႆႇတူင်ႉ ၼိုင်ၵဵဝ်ႇၵပ်းလိၼ်သူၼ်ႁႆႈၼႃးတိုၵ်းသူၼ်းဝႃႈ – ႁႂ်ႈၸဝ်ႈသူၼ်ၸဝ်ႈၼႃး ၸိူဝ်းပႆႇမီးဝႂ်တီႈလိၼ်ၼၼ်ႉ ႁိပ်ႈၼႅတ်ႈၵႂႃႇတီႈ  ႁွင်ႈၵၢၼ်ၾၢႆႇၼႃႈလိၼ်(မျေႇၸယိၼ်း) ဝဵင်းၽႂ်မၼ်းသေ ဢုပ်ႇလၢတ်ႈတွင်ႈထၢမ်ယွၼ်းဝႂ်ၾွမ်ႊတႃႇထႅမ်ၶေႃႈမုလ်း တႃႇယွၼ်းဝႂ်ၾွမ်ႊ 7 (ပူင်ႇၸၢမ်ႇ 7)။

ၼႂ်းမၢႆမီႈမႂ်ႇၼၼ်ႉပႃးဝႆႉဝႃႈ- တီႈလိၼ်ဢၼ်ဢမ်ႇမီးဝႂ်သင်ၼၼ်ႉ ပေႃးပူၼ်ႉၶၢဝ်းယၢမ်း 6 လိူၼ် တေပဵၼ်ၶွင်ၸိုင်ႈမိူင်းသေ ၽႂ်တေဢမ်ႇလႆႈမႃးၽုၵ်ႇသွမ်ႈၵိၼ်။ ၽႂ်ၽူႈလႂ်ပူၼ်ႉပႅၼ်ၽုၵ်ႇသွမ်ႈၸိုင် တၵ်းၺႃးတူတ်ႈတၢမ်ႇမႂ်ငိုၼ်းဢမ်ႇၼၼ်တူတ်ႈၶွၵ်ႈ – ဢမ်ႇၼၼ်တင်းတူၵ်းၶွၵ်ႈလႄႈ မႂ်ငိုၼ်းဝႃႈၼႆ။ မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇၼၼ်ႉတႄႉ ပိုၼ်ၽၢဝ်ႇၸူးတပ်ႉသိုၵ်းဝႃႈ လိၼ်ဢၼ်သိုၵ်း ယိုတ်းဝႆႉၼၼ်ႉ ပေႃးဢမ်ႇပဵၼ်ၸႂ်ႉ ႁႂ်ႈၸႅၵ်ႇပၼ်ၵူၼ်းမိူင်းၶိုၼ်း ဝႃႈၼႆဝႆႉလူးၵွၼ်ႇ။