တပ်ႉသိုၵ်းလူင်ပွင်ၸိုင်ႈမၢၼ်ႈ ၶိုၼ်ႈသွၵ်ႈတဝ်ၸွမ်းထိူၼ်ႇသေ လႆႈပဵၼ်ပၢင်တိုၵ်းၵၼ်တင်း တပ်ႉသိုၵ်းတဢၢင်း TNLA တီႈၼႂ်းထုင်ႉမိူင်းယဵၼ် ၸႄႈဝဵင်းၼမ်ႉတူႈ လႆႈပိုတ်းယိုဝ်းၵၼ် ႁိုင်မွၵ်ႈ ၸူဝ်ႈမူင်းပၢႆ။

ဝၼ်းတီႈ 13/11/2018 ယၢမ်းၵၢင်ဝၼ်း 10:20 – 11:50 မူင်း တပ်ႉသိုၵ်းလူင်ပွင်ၸိုင်ႈမၢၼ်ႈ ၶမယ 317 ပႃႈတႂ်ႈတပ်ႉမ 88 တင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁိမ်းဝၢၼ်ႈဢၢႆႇ ဢိူင်ႇဝၢၼ်ႈသႃႇလူင် ထုင်ႉမိူင်းယဵၼ် ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇပႆႇႁူႉ ဝႃႈၼႆ။

ႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းတဢၢင်း ဢွၵ်ႇဝႆႉဝႃႈ “ ယွၼ်ႉသိုၵ်းမၢၼ်ႈ တူင်ႉၼိုင်ၶဝ်ႈၸူးၼႂ်း ၼႃႈတီႈတပ်ႉသိုၵ်း တ ဢၢင်းလႄႈ ၸင်ႇလႆႈပဵၼ်ပၢင်တိုၵ်းၵၼ်။ ပူၼ်ႉမႃး မိူဝ်ႈဝၼ်းတီႈ 31 လိူၼ်ဢွၵ်ႊထူဝ်ႊၿိူဝ်ႊၼၼ်ႉၵေႃႈ သိုၵ်း TNLA – SSPP တင်း RCSS ပဵၼ်ပၢင်တိုၵ်းၵၼ်ယဝ်ႉၼၼ်ႉ ဝၢႆးၼၼ်ႉမႃး သိုၵ်းမၢၼ်ႈ ဢဝ်တိုဝ်ႉတၢင်းၼႆႉသေ သူင်ႇႁႅင်းသိုၵ်း ၶဝ်ႈတူင်ႉၼိုင် တၢင်းပွတ်းမိူင်းယဵၼ်လႄႈ ၸင်ႇလႆႈပဵၼ်ပၢင်တိုၵ်းၵၼ်” ဝႃႈၼႆ။

ထုင်ႉမိူင်းယဵၼ်ၼႆႉ မီးၾၢႆႇႁွင်ႇဝဵင်းၼမ်ႉတူႈ။ သိုၵ်းတဢၢင်းတႄႇၶဝ်ႈမႃးတူင်ႉၼိုင်ၸွမ်းဝၢၼ်ႈ မိူဝ်ႈပီၵၢႆ 2017 လိူၼ် ၻီႊသႅမ်ႊၿိူဝ်ႊသေ ယင်းလႆႈပဵၼ်ပၢင်တိုၵ်းၵၼ်တင်း SSPP/SSA ယူႇ။

ၵူၼ်းမိူင်းထုင်ႉမိူင်းယဵၼ် လၢတ်ႈတီႈၽူႈတွႆႇႁွၵ်ႈဝႃႈ “ တၢင်းပွတ်းတွၼ်ႈၼၼ်ႉ မိူဝ်ႈဢွၼ်တၢင်း မၼ်းပဵၼ်ၼႃႈတီႈ SSPP တူင်ႉၼိုင်။ မိူဝ်ႈလဵဝ်သမ်ႉ သိုၵ်းတဢၢင်း ၶဝ်ႈမႃးတၢင်းပွတ်းတွၼ်ႈၼၼ်ႉသေ မႃးတူင်ႉၼိုင်ထႅင်ႈ။ ၼႂ်းၸႂ် ႁဝ်းၶႃႈ ၵူၼ်းမိူင်းတႄႉ ၶႂ်ႈတုၵ်းယွၼ်း ယႃႇႁႂ်ႈလႆႈပဵၼ်ပၢင်တိုၵ်းၵၼ် ယွၼ်ႉဝႃႈ မိူဝ်ႈလဵဝ်ၼႆႉသမ်ႉ ပဵၼ်ၶၢဝ်း ဢဝ်ၶဝ်ႈ” ဝႃႈၼႆ။

မိူဝ်ႈဝၼ်းတီႈ 13/11/2018 ယၢမ်းၵၢင်ဝၼ်း မွၵ်ႈ 12 မူင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ ၶမယ 501 ပႃႈတႂ်ႈၸၵၶ 1 ၵျွၵ်ႉမႄး သွၵ်ႈတဝ် ၸွမ်းဝၢၼ်ႈၸွမ်းထိူၼ်ႇ ပိုတ်းယိုဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA 2 ၾၢႆႇ လႆႈ ပဵၼ်ပၢင်တိုၵ်းၵၼ် ၼႂ်းၵႄႈ ဝၢၼ်ႈၼႃးလေႃႉ တင်း ၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်း ဝၢၼ်ႈ ၼႂ်းဢိူင်ႇၸေႈၶၢၼ် 500 ပၢႆ လႆႈဢွၼ်ၵၼ်ပၢႆႈ။