ၼႂ်းဝၼ်းပိုတ်ႇပၢင်ပွႆး လိူၼ် 12 မူၼ်း(ဢမ်ႇၼၼ်) ပွႆးပွႆႇႁူင်းၾႆးမိၼ် တီႈဝဵင်းတူၼ်ႈတီးၼၼ်ႉ ႁူင်းၾႆးမိၼ်လုၵ်ႈၼိုင်ႈ တူၵ်းသႂ်ႇၼႂ်းပၢင်ပွႆး တိူဝ်ႉသႂ်ႇၵူၼ်းမႃးၶဝ်ႈပွႆး လႆႈမၢတ်ႇၸဵပ်းၸွမ်း။
ဝၼ်းတီႈ 14/11/2018 ယၢမ်းၵၢင်ၶိုၼ်း မွၵ်ႈ 9:45 မူင်းၼၼ်ႉ ႁူင်းၾႆးမိၼ် ဢၼ်မီးၸိုဝ်ႈဝႃႈ (ဓါတ်ခဲ့) ဢၼ်ပွႆႇၶိုၼ်ႈ တီႈပၢင်ႇဢႃႇဝုၺ်ႇယႃႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ တၼ်းၶိုၼ်ႈၵႂႃႇ တၢင်းသုင် မွၵ်ႈ 100 ပေႇ ၵူၺ်း တူၵ်းလူင်းသႂ်ႇၼႂ်းပၢင်ပွႆး တိူဝ်ႉသႂ်ႇၵူၼ်းၶဝ်ႈဢႅဝ်ႇလႄႇပွႆးလႆႈမၢတ်ႇၸဵပ်းၸွမ်း 3 ၵေႃႉ။
ၼၢင်းၸၢမ်ၽူၺ်း ၸုမ်းၶၢဝ်ႇၽူႈတွႆႇႁွၵ်ႈ လၢႆးငၢၼ်းလၢတ်ႈၼႄဝႃႈ “ မိူဝ်ႈၶမ်ႈဝႃး ဝၼ်းပိုတ်ႇပၢင်ပွႆးၼၼ်ႉ ႁူင်းၾႆး မိၼ်တူၵ်းလုၵ်ႈၼိုင်ႈ။ တိူဝ်ႉသႂ်ႇၵူၼ်း ၼႂ်းပွႆး 3 ၵေႃႉ။ ၼႂ်း 3 ၵေႃႉၼၼ်ႉ လႆႈမၢတ်ႇၸဵပ်းႁၢဝ်ႈႁႅင်းၵေႃႉၼိုင်ႈ တေႃႈလဵဝ် ၵူၼ်းမၢတ်ႇၸဵပ်းၼၼ်ႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃလူင် ၸဝ်ႈၸၢမ်ႇထုၼ်း။ တႃႇ 2 ၵေႃႉ လႆႈမၢတ်ႇၸဵပ်း ဢိတ်းဢွတ်း ဢမ်ႇပေႃးလႆႈမႆႈၸႂ်” ဝႃႈၼႆ။
ၼႂ်းဝၼ်းပိုတ်ႇပၢင်ပွႆး လိူၼ် 12 မူၼ်း တီႈတူၼ်ႈတီးၼၼ်ႉ ယူႇတီႈၸွမ်ၽွင်းလူင် မိူင်းတႆး ၻွၵ်ႊတိူဝ်ႊလိၼ်းထုတ်ႉ ပိုတ်ႇပၢင်။ လိူဝ်ၼၼ်ႉ မီးတၢင်းၵႃႈၼူၵ်ႉတူဝ်း၊ ၵႃႈလၢႆး၊ တၢင်းၵႃႈယိူင်း/ ၸိူင်း ၸၢဝ်းၶိူဝ်းၽႂ်မၼ်းလႄႈ ႁွင်ႉၽဵင်း ၵႂၢမ်း ပိုတ်ႇပၢင်ၵႂႃႇ ဝႃႈၼႆ။
ပွႆးလိူၼ် 12 မူၼ်း တီႈတူၼ်ႈတီးၼႆႉ တေၸတ်းႁဵတ်း တႃႇ 10 ဝၼ်း။ တႄႇဢဝ် ဝၼ်းတီႈ 14-23/11/2018။ ပီၼႆႉ ႁူင်း ၾႆးမိၼ် ၶဝ်ႈၶေႉၵၼ် တင်းမူတ်း မီး 410 လုၵ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ