ၸဝ်ႈၼႃႈတီႈပလိၵ်ႈ ဝဵင်းၵဵင်းမႆႇ တီႉၺွပ်းႁႅင်းၵၢၼ်ယၢၼ်မိူင်း ၼႂ်းတူတ်ႈတၢမ်ႇတၢင်းၽိတ်း မဝ်းလဝ်ႈယဝ်ႉႁေႃႈရူတ်ႉၶိူင်ႈ။
ဝၼ်းတီႈ 12/11/2018 ၸဝ်ႈၼႃႈတီႈပလိၵ်ႈ ႁူင်းပလိၵ်ႈမႄႈၾႅၵ်ႇ တီႉၺွပ်းၸၢႆးသေႃး ႁႅင်းၵၢၼ်ယၢၼ်မိူင်းၼႂ်းတူတ်ႈ တၢမ်ႇတၢင်းၽိတ်းၵိၼ်လဝ်ႈမဝ်းယဝ်ႉႁေႃႈရူတ်ႉၶိူင်ႈ တီႈဢိူင်ႇမႄႈၾႅၵ်ႇ ၸႄႈဝဵင်းသၼ်သၢႆး ၸႄႈတွၼ်ႈၵဵင်းမႆႇ ၸိုင်ႈထႆးသေ သူင်ႇႁူင်းပလိၵ်ႈပၼ်တူတ်ႈတၢမ်ႇၸွမ်းၼင်ႇမၢႆမီႈ။
ၸဝ်ႈၼႃႈတီႈ ႁူင်းပလိၵ်ႈမႄႈၾႅၵ်ႇ ၾၢၵ်ႇထိုင်ၵူၼ်းဝၢၼ်ႈၵူၼ်းမိူင်းဝႃႈ “ ႁေႃႈရူတ်ႉႁေႃႈၵႃးႁႂ်ႈဝႆႉၾၢင်ႉသတိ ႁႂ်ႈမေႃၼပ်ႉယမ်ပၵ်းပိူင်ၵၢၼ်ႁေႃႈရူတ်ႉၵႃး “ ဝႃႈၼႆ။
ၸိူင်ႉၼၼ်ၼင်ႇၵဝ်ႇမိူဝ်ႈဝၼ်းတီႈ 13/11/2018 ၼၼ်ႉၵေႃႈ ၸဝ်ႈၼႃႈတီႈ ႁူင်းပလိၵ်ႈမႄႈဝၢင်း လႆႈတီႉၺွပ်းတူဝ် ၸၢႆးယုမ်ႉၶိူဝ်း ၼႂ်းတူတ်ႈတၢမ်ႇဢဝ်ၶလိပ်ႈပူဝ်ႉ (ၸိူင်းငဝ်းဢၼ်ဢမ်ႇၼုင်ႈသိူဝ်ႈၶူဝ်း) သႂ်ႇဝႆႉၼႂ်းၾူၼ်း။ ၼၼ်ႉၵေႃႈဢဝ်တူဝ်မၼ်းၸၢႆး သူင်ႇႁူင်းပလိၵ်ႈ ပၼ်တူတ်ႈတၢမ်ႇ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီး။
မိူဝ်ႈလဵဝ်ၸဝ်ႈၼႃႈတီႈပလိၵ်ႈၾၢႆႇႁူမ်ႇလူမ်ႈမိူင်းထႆး မီးၶိူင်ႈမိုဝ်းဢၼ်ၶိုတ်းၵၢပ်ႈပၢၼ်သေ ၵူတ်ႇထတ်း တီႉၺွပ်းၵူၼ်းဝၢၼ်ႈၵူၼ်းမိူင်းၸိူဝ်းဢၼ်ဢမ်ႇၸွမ်းပၵ်းပိူင် ႁူမ်ႈပႃးထိုင်ၵူၼ်းၸိူဝ်း Download ၸိူင်းပူဝ်ႉ (ၸိူင်းဢမ်ႇၼုင်ႈသိူဝ်ႈၶူဝ်း) ၸိူဝ်းၼႆႉလူးၵွၼ်ႇ။
