ပၢင်ၵမ်ႉထႅမ် တပ်ႉသိုၵ်းလူင်ပွင်ၸိုင်ႈမၢၼ်ႈ တီႈဝဵင်းၵဵင်းတုင် ၶၢၼ်းၵူၼ်းမိူင်းၶဝ်ႈႁူမ်ႈၵမ်ႉထႅမ် တင်းၼမ် လွင်ႈဝႃႈ ၵမ်ႉထႅမ်ယွမ်းႁပ်ႉတပ်ႉသိုၵ်းမၢၼ်ႈ လႄႈ လွင်ႈတေဢမ်ႇၽၢတ်ႇဢွၵ်ႇမိူင်းႁူမ်ႈတုမ် ဝႃႈၼႆ။
မိူဝ်ႈၼႆႉ ဝၼ်းတီႈ 14/11/2018 ယၢမ်းၵၢင်ၼႂ် ၵူၼ်းဝၢၼ်ႈ ၵူၼ်းမိူင်း ထုၵ်ႇၶၢၼ်းႁွင်ႉၶဝ်ႈႁူမ်ႈၵမ်ႉထႅမ် လွင်ႈဝႃႈ တေ ဢမ်ႇၽၢတ်ႇဢွၵ်ႇမိူင်းႁူမ်ႈတုမ်လႄႈ ၵမ်ႉထႅမ်ယွမ်းႁပ်ႉတၢင်းၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ တီႈၶူင်ႇၵႂၢႆးၸူၼ်း ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ဝႃႈၼႆ။
ၵူၼ်းမိူင်းၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈၵူၼ်းၶူင်ႇ ၼႂ်းဝဵင်းၵဵင်းတုင်တႄႉ ဢမ်ႇပေႃးၵႂႃႇ ၶႃႈ ။ လႆႈႁၼ်ပီႈၼွင်ႉဝၢၼ်ႈၼွၵ်ႈၼႃးပၢင်ႇႁဝ်း တၢင်းပွတ်းၼိူဝ်လွႆ မႃးၶဝ်ႈႁူမ်ႈၶႃႈ။ ၵူၼ်းမိူင်းဢၼ်ပိူၼ်ႈႁူႉလွင်ႈ တၢင်း မၼ်းတႄႉ ဢမ်ႇမိူဝ်းၶဝ်ႈႁူမ်ႈၶႃႈ။ လွင်ႈႁူဝ်ၵူၼ်းၶဝ်ႈႁူမ်ႈမီးၵႃႈႁိုဝ်ဢၼ်ဝႃႈၼၼ်ႉတႄႉ ပႆႇလႆႈႁူႉတႅတ်ႈတေႃး လီၶႃႈ” ဝႃႈၼႆ။
ၵူၼ်းမိူင်းၵဵင်းတုင် ဢၼ်လႆႈၵႂႃႇၶဝ်ႈႁူမ်ႈၵမ်ႉထႅမ်တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ လွင်ႈတေဢမ်ႇၽၢတ်ႇဢွၵ်ႇ မိူင်း ႁူမ်ႈတုမ်ၼၼ်ႉ မၢင်ဢွင်ႈတီႈၸူႉတုမ်ၵၼ် တီႈလဵဝ်သေ ဢွၼ်ၵၼ်ပႆၶဝ်ႈဝဵင်း။ မၢင်ဢွင်ႈတီႈ ပေႃးၵႆဝဵင်းၸိုင် ဢွၼ် ၵၼ်ၶီႇရူတ်ႉၵႃးသေ မႃးၸူႉတုမ်ၵၼ် တီႈဝတ်ႉၽြႃႉၸဝ်ႈႁူဝ်ၶူင်ႇသေ ဢွၼ်ၵၼ်ပႆၶဝ်ႈၼႂ်းပၢင်ႇၶူင်ႇၵႂၢႆးၸူၼ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ