ႁႅင်းၵၢၼ်ယၢၼ်မိူင်း ၸိူဝ်းၶဝ်ႈၵႂႃႇႁဵတ်းၵၢၼ်မိူင်းထႆး ၽိတ်းမၢႆမီႈၼၼ်ႉ ထုၵ်ႇပလိၵ်ႈထႆး တီႉသူင်ႇတူဝ်ပွၵ်ႈတၢင်း လႅၼ်လိၼ် မႄႈသၢႆ – တႃႈၶီႈလဵၵ်း တင်းမူတ်း မီးၵႂႃႇ 1,048 ၵေႃႉယဝ်ႉ။
ဝၼ်းတီႈ 13/11/2018 ယၢမ်း 12 မူင်းၵၢင်ဝၼ်း ပလိၵ်ႈထႆး သူင်ႇတူဝ်ႁႅင်းၵၢၼ်ယၢၼ်မိူင်း မွပ်ႈယိုၼ်ႈပၼ် ၸဝ်ႈ ၼႃႈတီႈ ၾင်ႇတႃႈၶီႈလဵၵ်းထႅင်ႈ ၸၢႆး 8 ၵေႃႉ၊ ယိင်း 4 ၵေႃႉ ႁူမ်ႈၵၼ် 12 ၵေႃႉ။ ပၢင်မွပ်ႈယိုၼ်ႈႁႅင်းၵၢၼ်ၸတ်း တီႈၶူဝ် မိုတ်ႈၵိုဝ်းမၢႆ 2 မႄႈသၢႆ – တႃႈၶီႈ လဵၵ်း လႅၼ်လိၼ်တႆး – ထႆး ဝႃႈၼႆ။
သိုဝ်ႇၶၢဝ်ႇ တႃႈၶီႈလဵၵ်း ဢွၵ်ႇဝႆႉဝႃႈ “ ႁႅင်းၵၢၼ် 12 ၵေႃႉ ဢၼ်သူင်ႇပွၵ်ႈမႃးၼၼ်ႉ ပဵၼ်ႁႅင်းၵၢၼ် ယူႇတၢင်းမိူင်းတႆး၊ တႃႈၵုင်ႈလႄႈ တိူင်းဢေႊရႃႊဝႃႊတီႊ ၸဵမ်ၸိူဝ်းၼႆႉ” ဝႃႈၼႆ။
ႁႅင်းၵၢၼ်ယၢၼ်မိူင်း ဢၼ်ထုၵ်ႇပလိၵ်ႈထႆး တီႉသူင်ႇပွၵ်ႈတၢင်းလႅၼ်လိၼ်တႆး – ထႆး မႄႈသၢႆ – တႃႈၶီႈလဵၵ်းၼႆႉ တႄႇ ဢဝ်ဝၼ်းတီႈ 1 လိူၼ်ၵျႅၼ်ႊၼိဝ်ႊရီႊမႃးတေႃႇထိုင် ဝၼ်းတီႈ 13 လိူၼ်ၼူဝ်ႊဝႅမ်ႊၿိူဝ်ႊ 2018 ၼႆႉ မီးၵႂႃႇယဝ်ႉ ၽူႈၸၢႆး 706 ၵေႃႉ၊ ၽူႈယိင်း 311 ၵေႃႉလႄႈ လုၵ်ႈဢွၼ်ႇ 31 ၵေႃႉ ႁူမ်ႈၵၼ် တင်းမူတ်း 1,048 ၵေႃႉ ဝႃႈၼႆ။
ႁႅင်းၵၢၼ်ယၢၼ်မိူင်း ဢၼ်ထုၵ်ႇသူင်ႇပွၵ်ႈမႃးၼၼ်ႉ ယွၼ်ႉပိူဝ်ႈ မၢင်ၵေႃႉ ဝတ်းဝႂ်မူတ်းဢႃယု၊ မၢင်ၵေႃႉ ပူၼ်ႉလႅၼ် ၶႅၼ်ႈ/ ဢွင်ႈတီႈမၵ်းတတ်းဝႆႉ ၸဵမ်ၸိူဝ်းၼႆႉ ဝႃႈၼႆ။
