ပွႆးဝၼ်းၵိူတ်ႇ ၸဝ်ႈၶူးလူင် ပႃႇမွၵ်ႉၶ တွၵ်ႇတိူဝ်ႇၶမ်းမၢႆ ထမ်မသႃမိ ၶွပ်ႈၶူပ်ႇ 54 ပီ ၸတ်းႁဵတ်းတီႈၸၼ်ႉၸွမ်ပုတ်ႉထ ဝဵင်းလူင်တူၼ်ႈတီး မီးတၵ်ႉ ၵႃႇသတ်ႉထႃး တီႈၸမ်ၵႆ ၶဝ်ႈႁူမ်ႈ လူႇတၢၼ်းတင်းၼမ်လၢႆ။
ဝၼ်းတီႈ 14/11/2018 မိူဝ်ႈၼႆႉ ယၢမ်းၵၢင်ၼႂ် 7:30 မူင်း သင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ် (သိုပ်ႇၸႃႇတႃႇ) ထၢပ်ႈၵၢမ်ႇ ယေႃးမုၼ် ၸဝ်ႈၶူးလူင် ပႃႇမွၵ်ႉၶ တွၵ်ႇတိူဝ်ႇၶမ်းမၢႆ ထမ်မသႃမိ ၸွမ်းၼင်ႇပိူင်ၾိင်ႈထုင်းၵဵင်းတုင် လၢၼ်ႉ ၼႃး တီႈ ၸၼ်ႉၸွမ် ပုတ်ႉထမိူင်းတႆး ပွၵ်ႉၽြႃးၶၢဝ် ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။
ၼၢင်းၸၢမ်ၽူၺ်း ၸုမ်းၶၢဝ်ႇၽူႈတွႆႇႁွၵ်ႈ ဢၼ်လူင်းပိုၼ်ႉတီႈ လၢတ်ႈၼႄဝႃႈ “ ၶပ်ႉမၢႆဝၼ်းမိူဝ်ႈၼႆႉတႄႉၵေႃႈ တေမီး ၸဝ်ႈသိလ်ထမ်းဝုၼ်းၸုမ်ႉ ႁေႃးတြႃးပၼ်တၵ်ႉၵႃႇသတ်းထႃး တီႈဢၼ်မႃးၶဝ်ႈႁူမ်ႈလူႇတၢၼ်း ၼႂ်းပွႆးဝၼ်းၵိူတ်ႇ ၸဝ်ႈ ၶူးလူင် ထမ်မသႃမိ။ လိူဝ်ၼၼ်ႉၵေႃႈ သိုပ်ႇၸႆးတႃ ပၼ်ၸဝ်ႈၶူးလူင် တွၵ်ႇတိူဝ်ႇၶမ်းမၢႆ ထမ်မသႃမိ ၶွပ်ႈၶူပ်ႇ 54 ပီ ပွၵ်ႈ ၼႆႉ ပဵၼ်ပွၵ်ႈၵမ်း 4 ယဝ်ႉ” ဝႃႈၼႆ။
သိုပ်ႇလၢတ်ႈဝႃႈ “ တီႈပၢင်သိုပ်ႇၸႆးတႃ ၸဝ်ႈၶူးလူင်ၼၼ်ႉ မီးသင်ၶၸဝ်ႈ တၢင်းပွတ်းဢွၵ်ႇၶူင်း ၵဵင်းတုင်၊ တႃႈၶီႈလဵၵ်း မႃးၶဝ်ႈႁူမ်ႈသုတ်ႇမုၼ်းပၼ် 10 တူၼ်ပၢႆ၊ ပေႃးသိုပ်ႇၸႆးတႃယဝ်ႉ ၸဝ်ႈသိလ်ထမ်းဝုၼ်းၸုမ်ႉ ဢွၼ်ႁူဝ် တၢင်ႇထီး ထၢတ်ႈၸႅတ်ႈႁူဝ်လိုင်း တီႈၸၼ်ႉၸွမ်ပုတ်ႉထ မိူင်းတႆးၵႂႃႇ” ဝႃႈၼႆ။
ၶပ်ႉမၢႆ ပွႆးဝၼ်းၵိူတ်ႇ ၸဝ်ႈၶူးလူင် ထမ်မသႃမိ ၼႂ်းဝၼ်းမိူဝ်ႈၼႆႉသမ်ႉ ယၢမ်းၵၢင်ၼႂ် 9 မူင်း ၸဝ်ႈသိလ်ထမ်းဝုၼ်းၸုမ်ႉ ဢွၼ်ႁူဝ်တၵ်ႉၵႃႇသတ်ႉထႃး တၢင်ႇထီးၵွင်းမူး/ ထၢတ်ႈၸႅတ်ႈ ႁူဝ်လိုင်း တီႈၸၼ်ႉၸွမ်ပုတ်ႉထမိူင်းတႆး။ ယၢမ်းၵၢင် ဝၼ်း 10 မူင်း ထိုင် 13 မူင်းသမ်ႉ ႁပ်ႉတွၼ်ႈၶႅၵ်ႇ၊ လဵင်ႉ လူၶႅၵ်ႇ၊ ပိုတ်ႇၵၢတ်ႇၼိပ်ႉပၢၼ်ႇလႄႈ ၵၢပ်ႈသွမ်းဝၼ်းသင်ၶ ၸဝ်ႈ။ ယၢမ်းၵၢင်ဝၼ်း 11 မူင်း လူႇတၢၼ်း၊ ထွမ်ႇထမ်း၊ ယၢတ်ႇၼမ်ႉဝၼ်းၵိူတ်ႇၸဝ်ႈၶူးလူင် ထမ်မသႃမိ လႄႈ ယွင်ႈ ၵုင်ႇၸဝ်ႈၶူးတွၵ်ႇတိူဝ်ႇ မႁေႃသထႃလင်ၵႃရ ဢၼ်လႆႈႁပ်ႉၸုမ်ႈၶူး Ph.D တီႈၸၼ်ႉၸွမ် မိူင်းသီႇႁူဝ်ႇ။
ပေႃးထိုင်မႃး ယၢမ်းၵၢင်ၶမ်ႈ 7 မူင်းသမ်ႉ ၸဝ်ႈၶူးလူင် ပႃႇမွၵ်ႉၶ တွၵ်ႇတိူဝ်ႇၶမ်းမၢႆ ထမ်မသႃမိ တေမဵတ်ႉတႃႇတြႃး ပၼ် တၵ်ႉၵႃႇသတ်ႉထႃး တီႈၸမ်/ၵႆ ဝႃႈၼႆ။
ဝၼ်းတီႈ 15/11/2018 သမ်ႉ တေလူႇတၢၼ်း သၢင်ႇၵၢၼ်းၵထိၼ် တီႈၸၼ်ႉၸွမ်ပုတ်ႉထမိူင်းတႆး ပွၵ်ႈၵမ်း 3 ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ