ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 10 ၸုမ်း ဢၼ်ၶွတ်ႇၽွတ်ႈဝႆႉ PPST ၼၼ်ႉ ယိူင်းဢၢၼ်းဝႃႈ တေၸတ်းႁဵတ်းပၢင်ဢုပ်ႇၵုမ်ၵၼ် ၼႂ်းလိူၼ်ၼူဝ်ႊဝႅမ်ႊၿိူဝ်ႊၼႆႉ ဝႃႈၼႆသေတႃႉ ၵူၺ်း ပႆႇပဵၼ်ႁဵတ်း ယွၼ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပႆႇတူဝ်ႈတၼ်းၵၼ် ဝႃႈၼႆ။

ပၢင်ၵုမ် PPST ၼႆႉ တေဢၢၼ်းၸတ်းႁဵတ်း ၼႂ်းဝၼ်းတီႈ 5-7 လိူၼ်ၼူဝ်ႊဝႅမ်ႊၿိူဝ်ႊ 2018 တီႈၵဵင်းမႆႇ ၸိုင်ႈထႆး ဝႃႈၼႆ။

ၸဝ်းသိုၵ်းလူင် ၸၢႆးငိုၼ်း ၽူႈၶၢၼ်ပၢၵ်ႇ ၸုမ်း EAOs လႄႈ ၽူႈၼမ်းၼႂ်းမၢႆ 3 RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ ပဵၼ်၊ ပႆႇပဵၼ်ဢၼ်ဝႃႈၼၼ်ႉ ပႆႇၸၢင်ႈဝႃႈ မၼ်းတေလႆႈပႂ်ႉတူၺ်းၾၢႆႇၸၢဝ်းၶိူဝ်းႁဝ်းၶႃႈ။ ၸွင်ႇႁဝ်းၶႃႈ တေတူဝ်ႈတၼ်း ဢမ်ႇတူၼ်ႈတၼ်း။ တေႃႈလဵဝ်ၼႆႉ ဢၼ်ႁဝ်းၶႃႈ 8 ၸုမ်း 10 ၸုမ်းၼႆႉ ဢိင်ၼိူဝ်ႁဝ်းၶႃႈ ၵႂႃႇဢုပ်ႇၵၼ် မႃးတီႈၼေႇပျီႇတေႃႇၵေႃႈလီ၊ တီႈတႃႈၵုင်ႈၵေႃႈလီ မၼ်းတိုၵ်ႉလႆႈဢဝ်ၽွၼ်းၵၢၼ်ၸိူဝ်းၼႆႉ မိူဝ်းတၢင်ႇထိုင် လုၵ်ႈၸုမ်း ၽႂ်မၼ်းယူႇ။ ပေႃးတၢင်ႇထိုင်လုၵ်ႈၸုမ်းၽႂ်မၼ်းယဝ်ႉ တူဝ်ႈတၼ်းၵၼ်မူတ်းယဝ်ႉ ႁဝ်းၶႃႈၸင်ႇတေႁွင်ႉပၢင်ၵုမ်၊ ပေႃးဝႃႈတူဝ်ႈတၼ်းတင်းမူတ်းၵေႃႈ လႅပ်ႈတေၸတ်းႁဵတ်းႁၢင်လိူၼ်ၼႆႉ” ဝႃႈၼႆ။

ပၢင်ၵုမ်ဢၼ်တေၸတ်းႁဵတ်းတီႈၵဵင်းမႆႇ ၸိုင်ႈထႆးၼၼ်ႉ ယူႇတီႈၸုမ်း PPST ၶိုၼ်းတေဢုပ်ႇဢူဝ်းၽွၼ်းပၢင်ႈ ဢၼ် လႆႈၵႂႃႇၶဝ်ႈႁူမ်ႈပၢင်ၵုမ်သႅၼ်းၽူႈၼမ်းသုင်သုတ်း တီႈၼေႇပျီႇတေႃႇ မိူဝ်ႈဝၼ်းတီႈ 15-16 လိူၼ်ဢွၵ်ႊထူဝ်ႊၿိူဝ်ႊ ၼၼ်ႉ ဢၼ်လႆႈႁူပ်ႉၵၼ်တင်း လူင်ပွင်ၸိုင်ႈ၊ တပ်ႉမတေႃႇမၢၼ်ႈၼၼ်ႉ ၽွၼ်းပၢင်ႈမၼ်းမီးၸိူင်ႉႁိုဝ် ၸဵမ်ၸိူဝ်းၼႆႉ ဝႃႈၼႆ။