ႁႅင်းၵၢၼ်တႆး ၵူၼ်းမိူင်းပၼ်ႇႁွတ်ႈမိူင်းထႆးၺႃးၽူဝ်ၵဝ်ႇ ၵၼ်ႉၸၼ်ယဝ်ႉၶႃႈႁႅမ်တၢႆ တီႈပွၵ်ႉမႄႈရႅမ်ႊ ဝဵင်းၵဵင်းမႆႇ ၸိုင်ႈထႆး ။ ယၢမ်းလဵဝ်ၸဝ်ႈၼႃႈတီႈတိုၵ်ႉၸွမ်းႁႃတူဝ်ၵူၼ်းႁၢႆႉ ။

ဝၼ်းတီႈ 12/11/2018 ၼၢင်းတိင်ႉ ဢႃယု 33 ပီ ၵူၼ်းဝၢၼ်ႈဝူဝ်းလၢႆး ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ဢၼ်ႁွတ်ႈၽႅဝ်ႁဵတ်းၵၢၼ်ဝႆႉတီႈဝဵင်းၵဵင်းမႆႇ ၸိုင်ႈထႆးၼၼ်ႉၺႃးၶႃႈႁႅမ်တၢႆ တီႈႁွင်ႈလိုဝ်ႈၵူၼ်းႁဵတ်းၵၢၼ် ဢၼ်မီးၼႂ်းဢိူင်ႇမႄႈရႅမ်ႊ ၸႄႈဝဵင်းမႄႈရိမ်ႊ ၸႄႈတွၼ်ႈၵဵင်းမႆႇ ၸိုင်ႈထႆး ။

ၸၢႆးတႆးထိူၼ်ႇ ၽူႈၸွႆႈထႅမ်ၶႅၵ်ႇလီပၢင်ၸႃႉတႆး ၼႂ်းၵဵင်းမႆႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၶၢပ်ႈတူဝ်တၢႆမၼ်းၼၢင်း ၼႆႉ တိုၵ်ႉမီးတီႈႁူင်းယႃ တေဢဝ်ဝႆႉတီႈလႂ်ဢၼ်ဝႃႈၼၼ်ႉပႆႇႁူႉ ပီႈၼွင်ႉ ၶဝ်တႄႉၶႂ်ႈဢဝ်ဝႆႉတီႈဝတ်ႉတၢင်းပူင်ႇယဵင်း၊သင်ဝႃႈၶဝ်လူဝ်ႇတၢင်းၸွႆႈထႅမ်ႁႂ်ႈႁဝ်းၶႃႈၸွႆႈၼႆ၊ ႁဝ်းၶႃႈၵေႃႈယိၼ်းလီ ႁဝ်းတေဢဝ်မႃးႁႅၼ်းပၼ်တီႈဝတ်ႉပႃႇပဝ်ႈဝဵင်းၵဵင်းမႆႇၼႆႉဢေႃႈ မိူဝ်ႈလဵဝ် တေႁဵတ်းၸိူင်ႉႁိုဝ်ပႆႇႁူႉလီလီ လွင်ႈၶၢပ်ႈတူဝ်မၼ်းၼၢင်းၼႆႉ ” ဝႃႈၼႆ။

ၵေႃႉပဵၼ်ၽူဝ်ၵဝ်ႇၼၼ်ႉၸိုဝ်ႈႁွင်ႉ ၸၢႆးၵေႃးယ ဢမ်ႇၼၼ်ႁွင်ႉ ၸၢႆးယ ဢႃယု 38 ပီ ယူႇဝၢၼ်ႈသၢမ်ပူၼ်း ဢိူင်ႇယၢင်းလွႆ ၸႄႈဝဵင်း မိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း မၼ်းၸၢႆးၶႃႈသေပၢႆႈဝႆႉ။ မိူဝ်ႈလဵဝ်ၸဝ်ႈၼႃႈတီႈ ပလိၵ်ႈထႆး   ၸွမ်းႁႃတူဝ်ဝႆႉ လိူဝ်ၼၼ်ႉလႆႈၵပ်း သၢၼ်ၸဝ်ႈၼႃႈတီႈ ၸွမ်းလႅၼ် လိၼ် ႁႂ်ႈပၵ်းတႃ ပႂ်ႉတူၺ်း ယူႇဝႃႈၼႆ။