ပၢင်ပွႆးဝၼ်းၵိူတ်ႇ ၸဝ်ႈၶူးလူင် ပႃႇမွၵ်ႉၶ တွၵ်ႇတိူဝ်ႇၶမ်းမၢႆ ထမ်မသႃမိ ၶွပ်ႈၶူပ်ႇ 54 ပီတဵမ် လႄႈ ၸတ်းႁဵတ်းပႃး ပၢင် ၵုမ်ၶွၼ်ႊၾရႅၼ်ႉသ် ၵူႈမိူင်းမိူင်း တီႈၸၼ်ႉၸွမ်ပုတ်ႉထ မိူင်းတႆး ဝႃႈၼႆ။
ဝၼ်းတီႈ 12-13/11/2018 ယၢမ်းၵၢင်ၼႂ် 8 မူင်း ထိုင် 5 မူင်းႁူဝ်ၶမ်ႈ တႃႇၶၢဝ်းတၢင်း 2 ဝၼ်း သင်ၶၸဝ်ႈ တင်း တၵ်ႉၵႃႇ သတ်ႉထႃး ႁူမ်ႈၵၼ်ၸတ်းႁဵတ်း ပၢင် ၵုမ်ၶွၼ်ႊၾရႅၼ်ႉသ်ၵူႈမိူင်းမိူင်း တီႈၸၼ်ႉၸွမ်ပုတ်ႉထမိူင်းတႆး ပွၵ်ႉၽြႃးၶၢဝ်၊ ဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။ ပၢင်ၵုမ်ၶွၼ်ႊၾရႅၼ်ႉသ်ပွၵ်ႈၼႆႉ ပဵၼ်ပွၵ်ႈၵမ်း 4 ဝႃႈၼႆ။
ၸဝ်ႈၶူးၺၢၼ်ႇၼသႃႇမိ ၽူႈၸတ်းၵၢၼ်ၵူႈလွင်ႈလွင်ႈ ပၢင်ၵုမ်ၶွၼ်ႊၾရႅၼ်ႉသ်ၵူႈမိူင်းမိူင်း လၢတ်ႈတီႈၽူႈတွႆႇႁွၵ်ႈဝႃႈ “ တႃႇႁဵတ်းၶွၼ်ႊၾရႅၼ်ႉသ်ၼႆႉ ဢွၼ်တၢင်းသုတ်း မၼ်းပဵၼ်လွင်ႈပတ်တိတ်ႉသ သမုတ်ႉၽတၼႆႉ မၼ်းပဵၼ်လွင်ႈ ယႂ်ႇပၢႆးဝူၼ်ႉလိုၵ်ႉလမ်ႇ ဢၼ်ၼိုင်ႈ၊ ၽြႃးပဵၼ်ၸဝ်ႈၵေႃႈ ပူၵ်းပွင် ပတ်တိတ်ႉသ သမုတ်ႉၽတ ႁူႉသၸ်ႉၸႃႇ၊ ႁူႉလွင်ႈ ၽဝ၊ ႁူႉလွင်ႈၼိပ်ႉပၢၼ်ႇ ၼႂ်းသႃသၼႃၽြႃးပဵၼ်ၸဝ်ႈၼႆႉ မၼ်းတေမီးထေႇရဝၢတ်ႈ။ မႁႃယၼ်ႇၼႃႉ ၸိူဝ်းၼႆႉ ယွၼ်ႉ ၼၼ် လၢႆလၢႆမိူင်း ၵိူင်းၶဝ်ပဵၼ်ၸိူင်ႉႁိုဝ် ပႅၵ်ႇပိူင်ႈၵၼ်ၸိူင်ႉႁိုဝ် ဢဝ်မႃးတႅၵ်ႈၵၼ်သေ လႄႈ ႁႂ်ႈၽူႈဢၼ်ၶဝ်ႈၸႂ်၊ လႆႈ လဵပ်ႈႁဵၼ်းၵႂႃႇ ဢၼ်ၼႆႉဢၼ်ၼိုင်ႈ။ ထႅင်ၾၢႆႇၼိုင်ႈၵေႃႈ ၽူႈလူင်ႉလႅၼ်ႇလိၵ်ႈလၢႆးၼႂ်းထမ်း(ပိတၵၢတ်ႈ) ၵူႈမိူင်းမိူင်း လႆႈမႃးႁူပ်ႉ မႃးထူပ်းၵၼ်ၵေႃႈပႃး” ဝႃႈၼႆ။
ပၢင်ၵုမ်ၶွၼ်ႊၾရႅၼ်ႉသ်ၵူႈမိူင်းမိူင်းၼႆႉ မီးၽူႈလူင်ႉလႅၼ်ႇလိၵ်းလၢႆးၼႂ်းထမ်းမ(ပိတၵၢတ်ႈ) မႃးတၢင်ႇလၢတ်ႈ ၶဝ်ႈႁူမ်ႈ ၸွမ်း မိူၼ်မိူင်း USA၊ ရတ်ႊသျႃး၊ ဢီႇတလီ၊ သီရိလင်းၵႃ၊ သပဵၼ်ႇ၊ တီႉပႅတ်ႉ၊ ဢိၼ်းတီးယိူဝ်း၊ မိူင်းထႆးလႄႈ ဢိၵ်ႇ ထႅင်ႈလၢႆလၢႆမိူင်း တင်းမူတ်း မီး 11 မိူင်း ၽူႈလူင်ႉလႅၼ်ႇဢၼ် မႃးတၢင်ႇလၢတ်ႈသမ်ႉ မီးမွၵ်ႈ 20 ၵေႃႉ ဝႃႈၼႆ။
လိူဝ်ၼၼ်ႉ ပေႃးထိုင်မႃး ဝၼ်းတီႈ 14/11/2018 သမ်ႉ သင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ် ထပ်ႈၵၢမ်ႇ ယေႃး မုၼ် ၸဝ်ႈၶူးလူင် ပႃႇမွၵ်ႉၶ တွၵ်ႇတိူဝ်ႇၶမ်းမၢႆ ထမ်မသႃမိ ၶွပ်ႈၶူပ်ႇ 54 ပီ။ ဝၼ်းတီႈ 15/11/2018 သမ်ႉ လူႇတၢၼ်း သၢင်ႇၵၢၼ်းၵထိၼ်ႇ တီႈၸၼ်ႉၸွမ်ပုတ်ႉထမိူင်းတႆး ပွၵ်ႈၵမ်း 3 ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ