မၢၵ်ႇတႅၵ်ႇလုၵ်ႈၼိုင်ႈတီႈပွၵ်ႉၸွၼ်ၸူဝ်ႇ မူႇၸေႊ တႅၵ်ႇၽူင်ႉသႂ်ႇ လုၵ်ႈဢွၼ်ႇတၢႆထင်တီႈၵေႃႉၼိုင်ႈ၊ မၢတ်ႇၸဵပ်းၵေႃႉၼိုင်ႈ ဝႃႈၼႆ။
ဝၼ်းတီႈ 11/11/2018 ယၢမ်းဝၢႆးဝၼ်း 1 မူင်းပၢႆ လုၵ်ႈဢွၼ်ႇသွင်ၵေႃႈ ၵဵပ်းလဵၼ်ႈမၢၵ်ႇ ဢၼ်ႁေႃႇထူင်ယၢင်ဝႆႉၼၼ်ႉ တီႈပွၵ်ႉၸွၼ်ၸူဝ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ မၢၵ်ႇၼၼ်ႉ တႅၵ်ႇၽူင်ႉသႂ်ႇၶႃသွင်ၵေႃႉ လုၵ်ႈဢွၼ်ႇ ဢႃယု 11 ပီ ၵေႃႉၼိုင်ႈလႄႈ 12 ပီ ၵေႃႉၼိုင်ႈ ဝႃႈၼႆ။
ဢူးတွင်းထုၼ်း ၸုမ်းၸွႆႈထႅမ်ၽေးၵိုင်ႉၵၢင်ႉ တီႈမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ လုၵ်ႈဢွၼ်ႇၼႆႉ ၵဵပ်းလဵၼ်ႈမၢၵ်ႇ ဢၼ်ပႅတ်ႈဝႆႉတၢင်းၼွၵ်ႈဝၢင်းႁိူၼ်းၼၼ်ႉ တႅၵ်ႇသႂ်ႇ။ လုၵ်ႈဢွၼ်ႇၵေႃႉ ဢႃယု 11 ပီၼၼ်ႉ တိူဝ်ႉမၢတ်ႇႁၢဝ်ႈႁႅင်းသေ လႆႈလူႉတၢႆၵႂႃႇ။ ထႅင်ႈၵေႃႉၼိုင်ႈ ဢႃယု 12 ပီသမ်ႉ တိူဝ်ႉၸွမ်းၶေႃး၊ ၶႃ၊ တီႈပုမ် ၸိူဝ်းၼႆႉ တေႃႈလဵဝ် လႆႈၶဝ်ႈႁွင်ႈ ၽႃႇ တတ်းယဝ်ႉ ဢမ်ႇထိုင်တီႈလႆႈမႆႈၸႂ်” ဝႃႈၼႆ။
မၢၵ်ႇဢၼ်တႅၵ်ႇၵႂႃႇၼႆႉ ပဵၼ်မၢၵ်ႇသႅၼ်း/မဵဝ်းသင် ဢၼ်ဝႃႈၼၼ်ႉ ပႆႇႁူႉ ယူႇတီႈၾၢႆႇတပ်ႉသိုၵ်း တိုၵ်ႉၵူတ်ႇထတ်း တူၺ်းယူႇ ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 19 လိူၼ်သႅပ်ႊထႅမ်ႊၿိူဝ်ႊၼၼ်ႉၵေႃႈ မၢၵ်ႇတႅၵ်ႇလုၵ်ႈၼိုင်ႈ ၼႂ်းၵႄႈဝၢၼ်ႈၼမ်ႉတွင်း တင်း ဝဵင်းပၢင်ႇသၢႆး ၸႄႈဝဵင်းမူႇၸေႊ တႅၵ်ႇသႂ်ႇ ၼၢင်းယိင်း 2 ၵေႃႉ။ ၶဝ်သွင်ၵေႃႉၼၼ်ႉ တၢႆၵေႃႉၼိုင်ႈ မၢတ်ႇၵေႃႉၼိုင်ႈ ဝႃႈ ၼႆ။
ၼႂ်းၸႄႈဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်ၶႄႇ – တႆး ဝဵင်းၼိုင်ႈ။ လိူဝ်ၼၼ်ႉ ပဵၼ်ဝဵင်းၵႃႉၶၢႆႁဵတ်းၵၢၼ် ႁႃငိုၼ်းငၢႆႈၵေႃႈၸႂ်ႈ။ ယွၼ်ႉၼၼ်ႉ ၵႆႉမီးလွင်ႈလၵ်ႉၵၼ်၊ ၸူၼ်ၵၼ်၊ ယိုဝ်းၵၼ်၊ မၢၵ်ႇတႅၵ်ႇ ၸဵမ်ၸိူဝ်းၼႆႉ။ တၢင်းပွတ်း တွၼ်ႈ ၼၼ်ႉ ၵမ်ႈၼမ် ပျီႇတူႉၸိတ်ႉ၊ ပလိၵ်ႈမၢၼ်ႈလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ တူင်ႉၼိုင်ၵႂႃႇမႃးယူႇတႃႇသေႇ ဝႃႈ ၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ