Friday, March 29, 2024

ၵူၼ်းမိူင်းတူၼ်ႈတီး ဢွၼ်ၵၼ် သၢၼ်ၶတ်း လွင်ႈၵမ်ႉထႅမ်တပ်ႉသိုၵ်းလူင်ပွင်ၸိုင်ႈမၢၼ်ႈ ၼႂ်းဝၼ်းပိုတ်ႇ ပၢင်ပွႆးလိူၼ် 12 မူၼ်း

Must read

ၵူၼ်းမိူင်းတူၼ်ႈတီး တင်း ၸုမ်းတူင်ႉၼိုင်တူင်ႇဝူင်းၵူၼ်း 19 ၸုမ်း ဢွၼ်ၵၼ်လူင်းလၢႆးမိုဝ်း သၢၼ်ၶတ်း လွင်ႈတႃႇ တေၸတ်းႁဵတ်းပၢင်ၵမ်ႉထႅမ်တပ်ႉသိုၵ်းလူင်ပွင်ၸိုင်ႈမၢၼ်ႈ ၼႂ်းဝၼ်းပိုတ်ႇပၢင်ပွႆးလိူၼ် 12 မူၼ်း(ပွႆးပွႆႇႁူင်းၾႆးမိၼ်) ၼႂ်းဝၼ်းတီႈ 14 လိူၼ်ၼႆႉ ဝႃႈၼႆ။

Photo by – ၵူၼ်းမိူင်းၼမ်ႉၸၢင်/ ပၢင်ၼႄၵၢင်ၸႂ် ၵမ်ႉထႅမ်လွင်ႈတပ်ႉသိုၵ်းမၢၼ်ႈ တီႈၼမ်ႉၸၢင် ဝၼ်းတီႈ 12/11/2018

ဝၼ်းတီႈ 11/11/2018 ၵူၼ်းမိူင်း တင်း ၸုမ်းတူင်ႇဝူင်းၵူၼ်း ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ႁူမ်ႈၵၼ် လူင်းလၢႆးမိုဝ်း ယဝ်ႉၵေႃႈ တၢင်ႇလိၵ်ႈထိုင် ၸွမ်ၽွင်းလူင်မိူင်းတႆး လွင်ႈဝႃႈ ၵူၼ်းမိူင်းဢမ်ႇႁၼ်လီၸွမ်းၵၢၼ်မိူင်း လွင်ႈ ၵမ်ႉထႅမ်တပ်ႉသိုၵ်းလူင်ပွင်ၸိုင်ႈမၢၼ်ႈ ၼႂ်းဝၼ်းပိုတ်ႇပၢင်ပွႆးလိူၼ် 12 မူၼ်း ဢၼ်တေထိုင်မႃးၼႆႉ ဝႃႈၼႆ။

- Subscription -

ၵူၼ်းမိူင်းတူၼ်ႈတီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းယူႇလွင်ႈၼႆႉ ဢၼ်ဝႃႈ ပၢင်ၵမ်ႉထႅမ်တပ်ႉသိုၵ်း မၢၼ်ႈၼၼ်ႉ ပေႃးယူႇတီႈႁဝ်းၶႃႈ ၵူၼ်းမိူင်းပိုၼ်ႉတီႈဝႃႈတႄႉ လွင်ႈၼႆႉ ႁဝ်းၶႃႈ ဢမ်ႇႁၼ်လီၸွမ်း။ ပွႆးလိူၼ် 12 မူၼ်း ၼႆႉ မၼ်းပဵၼ်ပွႆးၾိင်ႈငႄႈၾိင်ႈထုင်းၵူၺ်း မၼ်းဢမ်ႇၸႂ်ႈပွႆးၵၢၼ်ဝၢၼ်ႈၵၢၼ်မိူင်းသင်” ဝႃႈၼႆ။

Photo by – Website Tachileik News Agency/ ၽိုၼ်လိၵ်ႈသၢၼ်ၶတ်း ၵူၼ်းမိူင်းတူၼ်ႈတီး ဢၼ်တၢင်ႇထိုင်ၸွမ်ၽွင်းလူင်မိူင်းတႆး

ပၢင်ပွႆးလိူၼ် 12 မူၼ်း (ပွႆးပွႆႇႁူင်းၾႆးမိၼ်)ၼႆႉ ယွၼ်ႉဝႃႈ ပဵၼ်ပွႆးၾိင်ႈငႄႈၾိင်ႈထုင်း ဢၼ်ၵိုၵ်းပီႈၼွင်ႉၵူၼ်းမိူင်း ၼႂ်း ၸႄႈဝဵင်းတူၼ်ႈတီးမႃးဢၼ်ၼိုင်ႈပဵၼ်ပွႆးဢၼ်လုမ်ႈၾႃႉႁူႉၸၵ်း။ ၼွၵ်ႈလိူဝ်ၼၼ်ႉ ပေႃးထိုင်ၶၢဝ်းပွႆးမႃး ၸဵမ်ၵူၼ်း ၼႂ်းမိူင်းတႆး တၢင်ႇတီႈသီႇလႅၼ်၊ ၵူၼ်းၼႂ်းမိူင်းႁူမ်ႈတုမ်လႄႈ ၵူၼ်း ၼွၵ်ႈမိူင်းဢွၼ်ၵၼ်မႃး ၶဝ်ႈႁူမ်ႈတွင်ႈတဵဝ်းတင်း ၼမ် ဝႃႈၼႆ။

ဢူးတိၼ်ႇမွင်ႇတူဝ်း ၸုမ်းတူင်ႉၼိုင်ၵၢၼ်မိူင်း ၼႂ်းမိူင်းတႆး လၢတ်ႈတီႈၸုမ်းၶၢဝ်ႇတႃႈၶီႈလဵၵ်းဝႃႈ “ တေႃႇထိုင်ယၢမ်း လဵဝ် မီး 19 ၸုမ်းယဝ်ႉ ဢၼ်သၢၼ်ၶတ်းလွင်ႈၼႆႉ။ ၵူၼ်းမိူင်းတိုၵ်ႉၶႂ်ႈဢွၼ်ၵၼ်လူင်းလၢႆးမိုဝ်းထႅင်ႈယူႇ ယွၼ်ႉဝႃႈ ၶၢဝ်းယၢမ်းမၼ်းဢမ်ႇပေႃး။ ထႅင်ႈၾၢႆႇၼိုင်ႈၵေႃႈ ႁဝ်းၶႃႈ ၼႅတ်ႈႁဵတ်းလႄႈ ဢမ်ႇတၼ်းၵဵပ်းလၢႆးမိုဝ်း၊ တေႃႇထိုင် ဝၼ်းၸၼ်ၼႆႉမႃး ၵဵပ်းလႆႈၵႃႈႁိုဝ်ၵေႃႈ တေတၢင်ႇထိုင်ၵႂႃႇတီႈ ၸွမ်ၽွင်းလူင်မိူင်းတႆးထႅင်ႈၵမ်းၼိုင်ႈ။ လွင်ႈၽိုၼ် လိၵ်ႈသၢၼ်ၶတ်း တႃႇၵမ်ႉထႅမ်တပ်ႉသိုၵ်းမၢၼ်ႈၼၼ်ႉ ႁဝ်းၶႃႈ လႆႈႁဵတ်းလိၵ်ႈသေ တၢင်ႇထိုင်ၵႂႃႇတီႈလူင်ပွင်ၸိုင်ႈ မိူင်းတႆး မိူဝ်ႈဝၼ်းတီႈ 9 လိူၼ်ၼႆႉမႃး ၾၢႆႇတၢင်းလူင်ပွင်ၸိုင်ႈ ဢမ်ႇတုမ်ႉတွပ်ႇမႃးၶိုၼ်းသင်” ဝႃႈၼႆ။

ၼႂ်းလိၵ်ႈၼၼ်ႉပႃးဝႆႉဝႃႈ ပၢင်ၸူႉတုမ်ဢဵၼ်ႁႅင်း ဢၼ်တေႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄၼၼ်ႉ ဢမ်ႇၵိုင်ႇလီ ပဵၼ် ၼႂ်းၶၢဝ်းတၢင်းပၢင်ပွႆး ႁူင်းၾႆးမိၼ် ဝႃႈၼႆ။

ဝၼ်းတီႈ 11/11/2018 ၼႆႉ ယူႇတီႈၸုမ်းႁူမ်ႇလူမ်ႈၸိူဝ်ႉၸၢတ်ႈသေ ၸႅၵ်ႇဝႂ်ပိဝ်၊ ၽိုၼ်လိၵ်ႈဝႃႈ တေပႆတၢင်းၼႄၵၢင်ၸႂ် လွင်ႈၵမ်ႉထႅမ်သိုၵ်းမၢၼ်ႈ ၼႂ်းဝၼ်းတီႈ 14/11/2018 ဝၼ်းပိုတ်ႇပၢင် ပၢင်ပွႆးလိူၼ် 12 မူၼ်း ပွႆးပွႆႇႁူင်းၾႆးမိၼ်။

ပၢင်ပွႆးလိူၼ် 12 မူၼ်း တီႈဝဵင်းတူၼ်ႈတီးၼႆႉ တေၸတ်းႁဵတ်း ၼႂ်းဝၼ်းတီႈ 14 ထိုင် 23 / 11/2018 ဢွင်ႇတီႈၸတ်း ႁဵတ်းသမ်ႉ တေပဵၼ်တီႈၵၢင်ပၢင်ႇဢႃးဝူၺ်ႇယႃႇ။ ပီၼႆႉ ႁူင်းၾႆးမိၼ် ဢၼ်ၶဝ်ႈၶႅင်ႇၵၼ် တင်းမူတ်း မီး 410 လုၵ်ႈ ပၢႆ ဝႃႈၼႆ။

မိူဝ်ႈၼႆႉ ဝၼ်းတီႈ 12/11/2018 တီႈၸႄႈဝဵင်းၼမ်ႉၸၢင်ၵေႃႈ ၸတ်းႁဵတ်းၵႂႃႇ လွင်ႈၵမ်ႉထႅမ်တပ်ႉသိုၵ်းလူင်ပွင်ၸိုင်ႈ မၢၼ်ႈ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း