ပၢင်ဢုပ်ႇဢူဝ်း တႃႇမီးၵၢၼ်ငၢၼ်းလီလႄႈ ငိုၼ်းၶဝ်ႈလီ ၸတ်းႁဵတ်းတီႈဝဵင်းလူင်တူၼ်ႈတီး ပဵၼ်ပွၵ်ႈႁႅၵ်ႈ

ၸုမ်းၶၢဝ်ႇၽူႈတွႆႇႁွၵ်ႈလႄႈ ႁွင်ႈၵၢၼ် ရေကြည်ရာ ၸုမ်း BBC ႁူမ်ႈၵၼ်ၸတ်းႁဵတ်းပၢင်ဢုပ်ႇဢူဝ်း တႃႇၵူၼ်းမိူင်းမီးၵၢၼ် ငၢၼ်းလီသေ ၶိုၼ်ႈယႂ်ႇမႂ်ႇသုင် ပဵၼ်ပွၵ်ႈႁႅၵ်ႈ။

ဝၼ်းတီႈ 08/11/2018 ယၢမ်းၵၢင်ၼႂ် 9 မူင်း ထိုင် 4 မူင်းဝၢႆးဝၼ်း ပၢင်ဢုပ်ႇဢူဝ်းၼႆႉ ၸတ်းႁဵတ်းတီႈႁူင်းႁႅမ်း Mountain Star ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။ ဢဝ်ႁူဝ်ၶေႃႈဢၼ်ဝႃႈ တႃႇတေလႆႈ ၵၢၼ်ငၢၼ်းလီလႄႈငိုၼ်းၶဝ်ႈလီ ၼၼ်ႉ ထုၵ်ႇလီမီးသင်ၼႆသေ ဢုပ်ႇဢူဝ်းလႅၵ်ႈလၢႆႈၵၼ်။ ၸၢႆးၵျေႃႇလႅင်ႇ ႁူဝ်ပဝ်ႈပႃႇတီႇႁူဝ်သိူဝ်တူၼ်ႈတီး၊ ၼၢင်းၶမ်း ယိင်းၼွင်ႉ ၽူႈၵွၼ်းႁွင်ႈၵၢၼ်လွင်ႈငမ်းယဵၼ်လႄႈ လွင်ႈႁုၼ်ႈမုၼ်းၼႂ်းမိူင်းတႆး ၸုမ်း ILO မႃးဢုပ်ႇဢူဝ်းလႅၵ်ႈလၢႆႈ ဝႃႈၼႆ။

ၼၢင်းၸၢမ်ၽူၺ်း ၽူႈႁၢင်ႈႁႅၼ်းၶပ်ႉၶိုင်တႃႇပဵၼ် ပၢင်ဢုပ်ႇဢူဝ်းၼႆႉ လၢတ်ႈဝႃႈ “ ဢၼ်တီႈဢုပ်ႇဢူဝ်း ပိၼ်ႇပၢႆႇလႅၵ်ႈလၢႆႈ ၵၼ်ၵႂႃႇသမ်ႉ ယိူင်းဢၢၼ်းဢၼ်ဝႃႈ ႁႂ်ႈၵူၼ်းမိူင်းမီးၵၢၼ်ငၢၼ်းလီ မီးငိုၼ်းၶဝ်ႈလီသေ ၶိုၼ်ႈယႂ်ႇမႂ်ႇသုင်။ ယႃႇႁႂ်ႈလႆႈဢွၵ်ႇ ၼွၵ်ႈမိူင်းသေ ၵႂႃႇႁႃႁဵတ်းၵၢၼ်ၼွၵ်ႈမိူင်း ၸဵမ်ၸိူဝ်းၼႆႉ” ဝႃႈၼႆ။

ယူႇတီႈၽူႈမႃးၶဝ်ႈႁူမ်ႈၵေႃႈ တွင်ႈထၢမ်လွင်ႈၵၢၼ်ငၢၼ်းၸူဝ်ႈၶၢဝ်း တႃႇလုၵ်ႈႁဵၼ်းၸၼ်ႉၸွမ်ၶဝ် တေၸၢင်ႈႁဵတ်းလႆႈ တႃႇႁႂ်ႈမီးငိုၼ်းၶဝ်ႈၵႃႈႁဵၼ်း၊ လွင်ႈၵႃႈၶၼ်တူဝ်သတ်းဢၼ်လဵင်ႉၸွမ်းႁိူၼ်း ႁႂ်ႈမီးၵႃႈၶၼ်၊ လွင်ႈႁႃၵၢၼ်ငၢၼ်းယၢပ်ႇၽိုတ်ႇ ဝၢႆးယဝ်ႉၸၼ်ႉၸွမ်၊ လွင်ႈၶူဝ်းၶွင်ဢွၵ်ႇၼႂ်းသူၼ် ဢမ်ႇမီးၵႃႈၶၼ်၊ ဢမ်ႇမီးလွၵ်းၵၢတ်ႇ ၸိူဝ်းၼႆႉ။

ပၢင်ဢုပ်ႇဢူဝ်းလႅၵ်ႈလၢႆႈၼႆႉ မီးၽူႈၶဝ်ႈႁူမ်ႈ ဢုပ်ႇဢူဝ်းလႅၵ်ႈလၢႆႈ ၵူၼ်းၼုမ်ႇၼႂ်းဝဵင်းတူၼ်ႈတီး၊ ပၢင်လွင်းလႄႈ ၾၢႆၶုၼ် ၸိူဝ်းၼႆႉ မႃးၶဝ်ႈႁူမ်ႈ 20 ပၢႆ။ လိူဝ်ၼၼ်ႉ ၵွၼ်ႇပႆႇၸတ်းႁဵတ်းပၢင်ဢုပ်ႇဢူဝ်း တွၼ်ႈၵၢင်ၼႂ်ၼႆႉ လႆႈၸတ်းႁဵတ်းပၢင်လႅၵ်ႈ လၢႆႈတၢင်းႁူႉ workshop ဝႃႈၼႆ။