တႆးႁွတ်ႈမိူင်းၵွၵ်ႇ တေႁူမ်ႈၵၼ်ၸတ်းပွႆး ယုၵ်ႉယွင်ႈ မေႃၵႂၢမ်းလူင် ၸၢႆးသၢႆမၢဝ်း

ပီႈၼွင်ႉတႆးႁွတ်ႈမိူင်းၵွၵ်ႇ တေႁူမ်ႈၵၼ် ၸတ်းႁဵတ်းပၢင်ပွႆးယုၵ်ႉယွင်ႈမေႃၵႂၢမ်းလူင် ၸၢႆးသၢႆမၢဝ်း ၶိုၵ်ႉယႂ်ႇလူင် တီႈမိူင်းၵွၵ်ႇ။

လိူၼ်ၼႃႈ ဝၼ်းတီႈ 08-09/12/2018 ယၢမ်းၵၢင်ၶမ်ႈ ပီႈၼွင်ႉတႆးႁွတ်ႈ ၵုင်းထဵပ်ႈ(မိူင်းၵွၵ်ႇ) တင်း ၸုမ်းၵူႈၽႆးလွႆၶူး  (ၸုမ်းၸွႆႈထႅမ်ၽေးၵိုင်ႉၵၢင်ႉ) တေႁူမ်ႈၵၼ် ၸတ်းႁဵတ်းပၢင်ယုၵ်ႉယွင်ႈ ၸၢႆးသၢႆမၢဝ်းလႄႈ ႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ တီႈတိူဝ်းၽႆးမရီႉ ၽုတ်ႉပေႃးလ် ၽိဝ်း(တ်ႉ) 45/5 မူႇထီႉ14 သွႆးၸၼ်ထႃးဝတ်ႉ သဵၼ်ႈတၢင်းပၢင်းၼႃးတတ်ႇ (လင်လူဝ်းတတ်ႉ ရၢမ်းသွင်) မိူင်းၵွၵ်ႇ ၸိုင်ႈထႆး။

ၸၢႆးသိူဝ်တႆး ၵေႃႉတူင်ႉၼိုင်ဢွၼ်ႁဵတ်းသၢင်ႈပၢင်ပွႆးယုၵ်ႉယွင်ႈၸၢႆးသၢႆမၢဝ်း တီႈမိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ ၸတ်းႁဵတ်းပၢင်ပွႆးယုၵ်ႉယွင်ႈၼႆႉ ယွၼ်ႉဝႃႈ မိူဝ်ႈပီႈသၢႆမၢဝ်းမႃးၼႄမေႃ ၵမ်းလိုၼ်း တီႈမိူင်းၵွၵ်ႇၼႆႉ ပီႈ သၢႆမၢဝ်း ယၢမ်ႈလၢတ်ႈဝႆႉသေ ၶႂ်ႈၸတ်းႁဵတ်းပၢင်ပွႆးႁွင်ႉၵႂၢမ်းပၼ် ပီႈၼွင်ႉႁဝ်းၶႃႈတီႈမိူင်းၵွၵ်ႇ။ ၵမ်းၼႆႉ ႁဝ်း ၶႃႈၵေႃႈၸင်ႇဝူၼ်ႉဝႃႈ ပွႆးယုၵ်ႉယွင်ႈ တင်း ပီမႂ်ႇတႆးၵေႃႈ ႁႂ်ႈႁူမ်ႈၵိုၵ်းႁဵတ်းၵႂႃႇၸွမ်းၵၼ်ၼႆသေ ၸင်ႇတေၸတ်းႁဵတ်း ပၢင်ပွႆး ၼႆႉမႃးၶႃႈ။ ထႅင်ႈလွင်ႈၼိုင်ႈၵေႃႈ ပီႈၼွင်ႉတႆးႁဝ်း ဢၼ်မႃးႁဵတ်းၵၢၼ်ၼႂ်းမိူင်းၵွၵ်ႇၼႆႉ ၵႂႃႇမႃးႁႃၵၼ်ယၢပ်ႇၵေႃႈ ပိူင် ၼိုင်ႈ။ ပေႃးဢမ်ႇၸႂ်ႈၶၢဝ်းပွႆးပီမႂ်ႇၵူၼ်း မၢင်ၵေႃႉ ၸိူဝ်းႁဵတ်းၵၢၼ် ၸွမ်းႁူင်းငၢၼ်းတေလိုဝ်ႈၵၢၼ်ၵၼ်ယၢပ်ႇ ပေႃးဢမ်ႇ ၸႂ်ႈပဵၼ်ပွႆး လၢမ်းပီမႂ်ႇၸိူင်ႉၼႆ ယွၼ်ႉၼၼ်လႄႈ ႁဝ်းၶႃႈၵေႃႈ ၸတ်းႁဵတ်းႁူမ်ႈၵၼ်ပႃး ႁႂ်ႈယဝ်ႉတီႈလဵဝ်ၵမ်းလဵဝ်” ဝႃႈၼႆ။

ပၢင်ပွႆးယုၵ်ႉယွင်ႈ ၶူးမေႃၵႂၢမ်းလူင် ၸၢႆးသၢႆမၢဝ်းၼႆႉ တေၵဵပ်းၵႃႈၶဝ်ႈပွႆး ၼိုင်ႈၵေႃႉလႂ် 100 ဝၢတ်ႇ ထိုင် 200 ဝၢတ်ႇ ဝႃႈၼႆ။

ၸၢႆးသိူဝ်တႆး လၢတ်ႈဝႃႈ “ ငိုၼ်းတီႈဢၼ် လႆႈၵဵပ်းတီႈပီႈၼွင်ႉႁဝ်းၶႃႈမႃးၼၼ်ႉ ႁဝ်းၶႃႈတေႁၵ်းၵႃႈၸႂ်ႉၸၢႆႇၵမ်ႈၽွင်ႈ သေ ဢၼ်လိူဝ် တေမွပ်ႈပၼ်ပီႈၸၢႆးသၢႆမၢဝ်းတင်းမူတ်းၶႃႈ။ ၶႂ်ႈႁႂ်ႈပီႈၼွင်ႉႁဝ်းၶႃႈပွင်ႇၸႂ်ၵၼ် ႁဝ်းၶႃႈၸွႆႈၵၼ် ၵမ်ႉထႅမ် ပၼ် ၵႃႈယူတ်းယႃ ပီႈသၢႆမၢဝ်း ၼႆၶႃႈဢေႃႈ။ ထႅင်ႈလွင်ႈၼိုင်ႈ ပီႈသၢႆမၢဝ်းၵေႃႈသမ်ႉၶႂ်ႈႁူပ်ႉထူပ်းပႃးပီႈၼွင်ႉတႆးႁဝ်းၶႃႈ ၼႂ်းမိူင်းၵွၵ်ႇၵေႃႈပႃး” ဝႃႈၼႆ။

တီႈပၢင်ပွႆးယုၵ်ႉယွင်ႈၶူးမေႃၵႂၢမ်းလူင် ၸၢႆးသၢႆမၢဝ်းၼႆႉ တေမီးၽူႈႁွင်ႉၽဵင်းၵႂၢမ်းတႆး မႃးလဝ်ႇမူၼ်ႈပၼ် မိူၼ်ၼင်ႇ ၸၢႆး သၢႆမၢဝ်း၊ ၸၢႆးသိူဝ်တႆး၊ ၸၢႆးငဝ်းလႅင်း၊ ၸၢႆးဢွင်ႇသႅင်မိူင်း၊ ၸၢႆးလိူၼ်သႂ်၊ ၸၢႆးတိုၼ်းလီ၊ ၼၢင်းၼွင်ႉၼူၼ်းလႄႈ ဢိၵ်ႇ ထႅင်ႈလၢႆလၢႆၵေႃႉ။ ဝူင်းတွႆႇတိုင်ႈသမ်ႉ ပဵၼ်ဝူင်းႁိူဝ်းမႂ်ႇလႄႈ ၸိူင်းလႅင်းမႂ်ႇ ၸဵမ်ၸိူဝ်းၼႆႉ။