ယိူင်းဢၢၼ်းတွၼ်ႈတႃႇ ပၢႆးပၺ်ၺႃ မိူင်းတႆး ပေႃးတေမုၼ်းလႅင်းၶိုၼ်ႈယႂ်ႇၼၼ်ႉ သင်ၶၸဝ်ႈ တင်း ၽူႈမီးပိုၼ်ႉႁူႉပၢႆး ႁၼ် ၼႂ်းဝဵင်းတူၼ်ႈတီး ႁူမ်ႈ ၵၼ် ၶွတ်ႇၽွတ်ႈၶွမ်ႊမတီႊပၢႆးပၺ်ၺႃ မိူင်းတႆးၶိုၼ်ႈမႃး။
ဝၼ်းတီႈ 03/11/2018 သင်ၶၸဝ်ႈ တင်း ၸုမ်းတူင်ႉၼိုင်တူင်ႇဝူင်းတႆး ၼႂ်းၸႄႈဝဵင်းတူၼ်ႈတီး ၸတ်းႁဵတ်းပၢင်ၵုမ် ၶွတ်ႇၽွတ်ႈၶွမ်ႊမတီႊပၢႆးပၺ်ၺႃ မိူင်းတႆး တီႈလုမ်းၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။
ၼၢင်းၼူၼ်းမူဝ် ၽူႈပွင်ၵၢၼ်ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်း တွၼ်ႈလူင်ပွင်ၸိုင်ႈတႄႉၵေႃႈ ဢမ်ႇၸႂ်ႈၼင်ႇၵဝ်ႇ။ ယိူင်းဢၢၼ်းဝႆႉတႄႉၵေႃႈ တေၵွင်ႉသၢၼ်တၢင်းပၢႆးပၺ်ၺႃ လူင်ပွင် ၸိုင်ႈယူႇ။ မိူၼ်ၼင်ႇ ၼႂ်းမိူင်းၶၢင်၊ မိူင်းမွၼ်း၊ မိူင်းယၢင်းလႅင်၊ ယၢင်းၽိူၵ်ႇ ၸိူဝ်းၼႆႉတႄႉ ပိူၼ်ႈမီးႁူင်းႁဵၼ်းၸိူဝ်ႉ ၸၢတ်ႈယဝ်ႉ။ တွၼ်ႈတႃႇမိူင်းတႆးႁဝ်းၶႃႈသမ်ႉ ၼင်ႇႁိုဝ် ပၢႆးပၺ်ၺႃမိူင်းႁဝ်းပေႃးမုၼ်းလႅင်းၶိုၼ်ႈယႂ်ႇၵႂႃႇၼၼ်ႉ ယိူင်း ဢၢၼ်းၸိူင်ႉၼၼ်ႉသေ ၸင်ႇၶွတ်ႇၽွတ်ႈမႃး။ ၵွပ်ႈၼႆလႄႈ ယူႇတီႈၶႃႈၶဝ် ႁပ်ႉတုင်းဢဝ်ၶေႃႈဢေႃးဝႃႇတ တီႈသင်ၶ ၸဝ်ႈၶဝ်သေ ၸင်ႇႁူမ်ႈၵၼ်ၶွတ်ႇၽွတ်ႈမႃး ၶွမ်ႊမတီႊၼႆႉ” ဝႃႈၼႆ။
တေႃႈလဵဝ် ၶွမ်ႊမတီႊပၢႆးပၺ်ၺႃ မိူင်းတႆး ဢၼ်လူဝ်ႇႁဵတ်းသမ်ႉ ၸဵမ်ငဝ်ႈတေႃႇပၢႆ ပိူင်ၶဵၼ်ႇတႅမ်ႈ ၶွမ်ႊမတီႊပၢႆးပၺ် ၺႃလႄႈ ၶွမ်ႊမတီႊၽူႈပွင်ၵၢၼ်။ လူဝ်ႇၽိူမ်ႉထႅင်ႈ ၽူႈပွင်ၵၢၼ်ၼႂ်းၶွမ်ႊမတီႊ။ ယဝ်ႉၵေႃႈ တူၵ်းလူင်း လႆႈၸႂ်ၵၼ် လွင်ႈတေႁွင်ႉႁဵတ်းပၢင်ၵုမ်ၶွမ်ႊမတီႊ ၸဵမ်ၸိူဝ်းၼႆႉ။
တွၼ်ႈတႃႇပၢႆးပၺ်ၺႃမိူင်းတႆး ပေႃးတေၶိုၼ်ႈယႂ်ႇမုၼ်းလႅင်းၼၼ်ႉ ၼင်ႇႁိုဝ် ၵူၼ်းၼုမ်ႇပေႃးတေမီး သုၼ်ႇလႆႈႁဵၼ်း ႁူႉထၢင်ႇႁၢင်ႈ၊ တွၼ်ႈတႃႇၸၢတ်ႈပၢၼ် လုၵ်ႈဢွၼ်ႇပေႃးတေလႆႈၶိုၼ်ႈယႂ်ႇမုၼ်းလႅင်း ဝၼ်းတႃမိူဝ်းၼႃႈ ဝႃႈၼႆ။
ၶွမ်ႊမတီႊပၢႆးပၺ်ၺႃ မိူင်းတႆးၼႆႉ ႁူဝ်ပဝ်ႈပဵၼ် ၶူးလူင် ၸၢႆးၶမ်းမိူင်း(CTS’ ၻွၵ်ႊတိူဝ်ႊ)၊ ၵႅမ်ႁူဝ်ပဝ်ႈ ၸၢႆးၼုမ်ႇတွင်း၊ ၽူႈၼမ်းၼႂ်း ၸၢႆးမွင်ႇတိၼ်ႇ (ႁူဝ်ပဝ်ႈငဝ်ႈငုၼ်း ၵေႃလိၵ်ႈလၢႆးတႆး)၊ ၵႅမ်ၽူႈၼမ်းၼႂ်း ၸၢႆးသေႃႇသေႃႇ။ လိူဝ်ၼၼ်ႉ ၽူႈၼမ်းၼႃႈ(ၼႃယၵ) 8 ၵေႃႉ၊ ၽူႈၶဝ်ႈၶွမ်ႊမတီႊ 47 ၵေႃႉ၊ တီႈၵိူဝ်းၵုမ် 4 ၵေႃႉ၊ ၽူႈပွင်ၵၢၼ် 24 ၵေႃႉ ၸဵမ်ၸိူဝ်းၼႆႉ။
