ၾၢႆႇသုၼ်ႇလႆႈၵူၼ်းၸၢတ်ႈၸိုင်ႈလုမ်ႈၾႃႉ တူၵ်ႇတၵ်ႉဝႃႈ ၽူႈမီးပုၼ်ႈၽွၼ်းၶွမ်ႊပၼီႊ Facebook ထုၵ်ႇလီၶဵင်ႈၶႅင်ၵုမ်းၵမ် ၽူႈၸႂ်ႉတိုဝ်း Facebook ၶွင်ၵူၼ်းမိူင်းႁူမ်ႈတုမ်မၢၼ်ႈ။
ဝၼ်းတီႈ 06/11/2018 ႁွင်ႈၵၢၼ်ၶၢဝ်ႇ Reuters ပိုၼ်ၽၢဝ်ႇဝႃႈ ႁွင်ႈၵၢၼ်ၾၢႆႇသုၼ်ႇလႆႈၵူၼ်း ၸၢတ်ႈၸိုင်ႈလုမ်ႈၾႃႉ တူၵ်ႇတၵ်ႉဝႃႈ ၶွမ်ႊပၼီႊ Facebook ဢမ်ႇလႆႈႁႄႉၵင်ႈၵၢၼ်ၸႂ်ႉသိုဝ်ႇ Online သေ ႁဵတ်းႁႂ်ႈ ၵူၼ်းၵမ်ႈၽွင်ႈဢဝ်ၸႂ်ႉတိုဝ်း ၶေႃႈၵႂၢမ်းလိူင်းၸိူင်းသၢင်ႈလွင်ႈပႅင်းၸင်းတေႃႇၵၼ်သေ ႁဵတ်းႁႂ်ႈဝၢၼ်ႈမိူင်းတိူဝ်းသုၵ်ႉယုင်ႈဢူၼ်ၵဝ်းမႃးၼႆယဝ်ႉ။
ၸုမ်း Business for Social Responsibility (BSR) ဝႃႈ – “ ၶွမ်ႊပၼီႊ Facebook ထုၵ်ႇလီၶဵင်ႈၶႅင်ၵၢၼ် ၵူတ်ႇထတ်းၵၢၼ်ၸႂ်ႉတိုဝ်း Facebook ၶွင်ၵူၼ်းမိူင်းႁူမ်ႈတုမ်မၢၼ်ႈ လူဝ်ႇႁူမ်ႈမိုဝ်းၵၼ်တင်း ၸဝ်ႈၼႃႈ တီႈလူင်ပွင်မၢၼ်ႈလႄႈ ၾၢႆႇတူင်ႉၼိုင်ၼႂ်းတူင်ႇဝူင်းၵူၼ်း ပိူဝ်ႈႁူမ်ႈၵၼ်ၵႄႈလိတ်ႈပၼ်ႁႃ ၵူၼ်းမိူင်း ၸႂ်ႉတိုဝ်း Facebook ပဵၼ်ၶိူင်ႈမိုဝ်းၵၢၼ်သၢင်ႈလွင်ႈပႅင်းၸင်းၵၼ် ၼႂ်းၸိူဝ်ႉၸၢတ်ႈ ” ဝႃႈၼႆ။
ၾၢႆႇ Facebook တွပ်ႇလၢတ်ႈဝႃႈ – “ မိူဝ်ႈလဵဝ်ၶွမ်ႊပၼီႊႁဝ်းၶႃႈ မီးဝႆႉၽူႈလူင်ႉလႅၼ်ႇၽႃႇသႃႇမၢၼ်ႈ 99 ၵေႃႉဢၼ်ပႂ်ႉ ၵူတ်ႇထတ်းၶေႃႈၵႂၢမ်းလိူင်းၸိူင်းလႄႈ ၵႂၢမ်းပႅင်းၸင်းၵၼ် လိူဝ်ၼၼ်ႉမီးၶိူင်ႈမိုဝ်း Automatic မွတ်ႇယႃႉပႅတ်ႈႁၢင်ႈ ဢၼ်ႁၢင်ႈႁၢႆႉလီၵူဝ်ၸိူဝ်းၼႆႉ ” ဝႃႈၼႆ ။
Facebook ၼႆႉၵေႃႇတင်ႈမီးမႃးမိူဝ်ႈပီ 2004 ၽူႈၵေႃႇတင်ႈပဵၼ် Mark Zuckerberg။ ၽႄႈတိူၼ်းၶဝ်ႈ ၼႂ်းၵုၼ်ဢေႊသျိူဝ်ႊ မိူဝ်ႈပီ 2008 – 2009 ၸိူဝ်းၼႆႉ။ ၽူႈၶဝ်ႈၸႂ်ႉ Facebook ၼႂ်းလုမ်ႈၾႃႉ ၼိုင်ႈဝၼ်းၽတ်ႉၽဵင်ႇမီး 2 ႁဵင်လၢၼ်ႉၵေႃႉ ။ ၽူႈယိင်းၸႂ်ႉ Facebook ၼမ်လိူဝ်ၽူႈၸၢႆး လႆႈႁူႉၸွမ်းၶေႃႈမုလ်ႊ Facebook Company – ပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ