လူတ်ႉ 3 လေႃႉ တၢင်ႇၵႂၢႆးလမ်းၼိုင်ႈ ၺႃးယိုဝ်းၼိူဝ်သဵၼ်ႈတၢင်း ဝဵင်းလိူဝ်ႇ-မူႇၸေႊ ၼႂ်းၸႄႈဝဵင်းၵျွၵ်ႉမႄး ၵူၼ်း ႁေႃႈလူတ်ႉၺႃးယိုဝ်းတၢႆထင်တီႈ ၵေႃႉၼိုင်ႈ။
ဝၼ်းတီႈ 04/11/2018 ယၢမ်းၵၢင်ၶိုၼ်း မွၵ်ႈ 10 မူင်း ၵူၼ်းဢမ်ႇႁူႉၾၢႆႇ ယိုဝ်းၵူၼ်းႁေႃႈလူတ်ႉ 3 လေႃႉလမ်းၼိုင်ႈ ဢၼ်တၢင်ႇၵႂၢႆး 2 တူဝ်မႃးၼၼ်ႉ ၺႃးယိုဝ်းတီႈ ႁိမ်းမၢႆလၵ်း 103/1 ဝၢၼ်ႈသၶၢၼ်းတႃႇ ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ။ ၵူၼ်းႁေႃႈလူတ်ႉၵေႃႉၺႃးယိုဝ်းၼၼ်ႉ ၸိုဝ်ႈႁွင်ႉ ထႅၵ်ႉမျၢတ်ႉ(ႁွင်ႉ) ၺူဝ်ႇလူင်း ဢႃယု 25 ပီ တိူဝ်ႉၺႃး မၢၵ်ႇၵွင်ႈ သွင်လုၵ်ႈသေ လႆႈလူႉတၢႆထင်တီႈၵႂႃႇ ဝႃႈၼႆ။
ဢူးတိၼ်ႇမွင်ႇတဵင်း ၸုမ်းၸီႇဝိတ ၸွႆႈထႅမ်ၵူၼ်းမၢတ်ႇၸဵပ်းလူႉတၢႆ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ် မိူဝ်ႈဝၼ်းတီႈ 4 ယၢမ်းၵၢင် ၶမ်ႈ မွၵ်ႈ 9:50 မူင်းၼၼ်ႉ။ မၼ်းၸၢႆးတိူဝ်ႉၺႃးမၢၵ်ႇၵွင်ႈ 2 လုၵ်ႈသေ လႆႈလူႉတၢႆထင် တီႈၵမ်းလဵဝ်” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၼႂ်းၸႄႈဝဵင်းၵျွၵ်ႉမႄး ၵူၼ်းႁေႃႈရူတ်ႉၵႃး တၢင်ႇဝူဝ်း/ တၢင်ၵႂၢႆး ၵႆႉၺႃးၵူၼ်းဢမ်ႇႁူႉၾၢႆႇယိုဝ်း သႂ်ႇ တေႃႇထိုင်ယၢမ်းလဵဝ် ၸုမ်းဢၼ်ယိုဝ်းၼၼ်ႉ ပဵၼ်ၼမ်ႉမိုဝ်းၽႂ်ဢၼ်ဝႃႈၼၼ်ႉ ပႆႇၵူတ်ႇထတ်းတီႉၺွပ်းတူဝ်ၵူၼ်း ႁၢႆႉလႆႈ ဝႃႈၼႆ။
ပီၼႆႉ မိူဝ်ႈဝၼ်းတီႈ 12 လိူၼ်ၵျုၼ်ႊၼၼ်ႉၵေႃႈ ၵူၼ်းႁေႃႈၵႃးတၢင်ႇဝူဝ်း လမ်းၼိုင်ႈ ၺႃးယိုဝ်းၼႂ်းၸႄႈဝဵင်းၵျွၵ်ႉမႄး ၼင်ႇၵဝ်ႇ။ လိူဝ်ၼၼ်ႉ မိူဝ်ႈဝၼ်းတီႈ 19 လိူၼ်ၵျုၼ်ႊပူၼ်ႉမႃးၵေႃႈ ၵူၼ်းႁေႃႈၵႃး တင်း ၵူၼ်းၸွမ်းၵႃး တၢင်ႇဝူဝ်း ၺႃးယိုဝ်းထႅင်ႈၼင်ႇၵဝ်ႇ ၼႂ်းၸႄႈဝဵင်းၵျွၵ်ႉမႄး ဝႃႈၼႆ။
ၼႂ်းၸႄႈဝဵင်းၵျွၵ်ႉမႄး တင်း သီႇပေႃႉၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးယူႇတႃႇသေႇ မိူၼ်ၼင်ႇ တပ်ႉ သိုၵ်းလူင်ပွင်ၸိုင်ႈမၢၼ်ႈ၊ ပျီႇတူႉၸိတ်ႉ၊ သိုၵ်းတဢၢင်း TNLA၊ သိုၵ်း RCSS လႄႈ သိုၵ်း SSPP/ SSA ၸဵမ်ၸိူဝ်းၼႆႉ။