ဢၼ်ၸၵၶ 1 ဝဵင်းၵျွၵ်ႉမႄး ၼႄးဝႃႈ ၽႂ်ၵဵဝ်ႇၶွင်ႈတပ်ႉသိုၵ်းၸိုင်ႈတႆး RCSS တေတီႉၺွပ်းပၼ်တူတ်ႈတၢမ်ႇ လူၺ်ႈမၢႆမီႈ 17/1 ၼႆၼၼ်ႉ ၽိတ်ႈၵၼ်တင်း NCA ဝႆႉလႄႈၾၢႆႇတပ်ႉမတေႃႇထုၵ်ႇယိုတ်း၊ ယုၵ်ႉလိူၵ်ႈၶိုၼ်းၶေႃႈၵႂၢမ်း ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်းမၢႆ 3 RCSS/SSA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၸုမ်းႁဝ်းၶႃႈၼႆႉ ပဵၼ်ၸုမ်းဢၼ်လူင်းလၢႆးမိုဝ်း NCA ဝႆႉယဝ်ႉ။ ပေႃးဢဝ်ပိူင် NCA ဝႃႈၸိုင် ၶဝ်တေဢမ်ႇၸၢင်ႈမႃးဝႃႈသင်။ ၵွပ်ႈပိူဝ်ႈ ၸိူင်ႉၼၼ်လႄႈ ၵဵဝ်ႇၵပ်းဢၼ်ၼႆႉ ၾၢႆႇၵဵဝ်ႇၶွင်ႈ ၸုမ်းႁဝ်းၶႃႈ ႁၢင်ႈႁႅၼ်းတႅမ်ႈလိၵ်ႈတႃႇပဵၼ်တၢင်းၵၢၼ်ဝႃႈ ၶေႃႈၸီႉ ၼႄးၼႆႉ မၼ်းၽိတ်း NCA ။ ၵွပ်ႈၼႆလႄႈ ႁႂ်ႈၶိုၼ်းမႄးႁုပ်ႈ ယုၵ်ႉလိူၵ်ႈၶိုၼ်း ၵႂၢမ်းဢၼ်လၢတ်ႈၼႆႉ သင်ဝႃႈ လႆႈ လၢတ်ႈတႄႉ” ဝႃႈၼႆ။
ၽူႈၶဝ်ႈၸုမ်းပႃႇတီႇၵၢၼ်မိူင်း ဝဵင်းၵျွၵ်ႉမႄးၵေႃႉၼိုင်ႈ လၢတ်ႈဝႃႈ “ တပ်ႉသိုၵ်းမၢၼ်ႈ ၸၵၶ 1 ဝဵင်းၵျွၵ်ႉမႄးၼႆႉ ႁွင်ႉၵၢင်ႉၵႄႇၼႂ်းပွၵ်ႉယွမ်ႇ ၼႂ်းၸႄႈဝဵင်းၵျွၵ်ႉမႄး လၢတ်ႈမိူဝ်ႈဝၼ်းတီႈ 31 လိူၼ်ဢွၵ်ႊထူဝ်ႊၿိူဝ်ႊဝႃႈ ၽႂ်ၽူႈလႂ် ၵပ်းသိုပ်ႇတိတ်းတေႃႇၵၼ်တင်း တပ်ႉသိုၵ်းၸိုင်ႈတႆး RCSS/SSA ၸိုင် တေတီႉၺွပ်းပၼ်တူတ်ႈတၢမ်ႇလူၺ်ႈ မၢႆမီႈ 17/1(တိတ်းတေႃႇၸုမ်းၼွၵ်ႈမၢႆမီႈ)” ဝႃႈၼႆ။
ၸဝ်ႈသိုၵ်းလူင်ၸၢႆးငိုၼ်း လၢတ်ႈဝႃႈ “ ၾၢႆႇတပ်ႉမတေႃႇ ၸၵၶ ၵျွၵ်ႉမႄးၼၼ်ႉ ပေႃးမၼ်းဝႃႈတႄႉ မၼ်းၽိတ်း NCA ၶႃႈဢေႃႈ။ ၼႂ်း NCA ၼၼ်ႉ မၼ်းတေမီးဝႆႉၶေႃႈၼိုင်ႈ။ ပေႃးဢဝ်တၢင်းမၢၼ်ႈဝႃႈ ပုဒ်မ ၂၄ (က)-(ခ)။ ပေႃးၾၢႆႇတႆး သမ်ႉ မၼ်းတေပဵၼ်မတ်ႉတႃ 24(ၵ)-(ၶ)။ ၼႂ်းတွၼ်ႈ(ၶ) ၼၼ်ႉ မၼ်းတိုၼ်းတႅမ်ႈဝႆႉတႅၵ်ႇလႅင်းဝႃႈ ၸုမ်းဢၼ် လူင်းလၢႆးမိုဝ်း NCA ၼၼ်ႉ ၸုမ်းမၼ်းၵေႃႈလီ။ ၵူၼ်းဢၼ်မႃးၵဵဝ်ႇၵပ်းၸုမ်းဢၼ် လူင်းလၢႆးမိုဝ်း NCA ၵေႃႈလီ တိုၼ်း တေဢမ်ႇလႆႈဢဝ်လိူင်ႈလၢဝ်း(အရေး) ၵဵဝ်ႇၵပ်းၼွၵ်ႈမၢႆမီႈ” ဝႃႈၼႆ။
RCSS/SSA ၼႆႉပဵၼ်ၸုမ်းလူင်းလၢႆးမိုဝ်း NCA ဝႆႉ ၸဵမ်မိူဝ်ႈပၢၼ် လူင်ပွင်ၸိုင်ႈ ဢူးတဵင်းၸဵင်ႇသေ ၾၢႆႇတၢင်း လူင်ပွင်ၸိုင်ႈမိူင်းႁူမ်ႈတုမ်ၵေႃႈ လႆႈပိုၼ်ၽၢဝ်ႇဝႆႉ မိူဝ်ႈဝၼ်းတီႈ 12 လိူၼ်ဢွၵ်ႊထူဝ်ႊၿိူဝ်ႊ 2015 ၼၼ်ႉဝႃႈ RCSS/ SSA ဢမ်ႇၸႂ်ႈၸုမ်းၽိတ်းမၢႆမီႈ 17/1 ယဝ်ႉ ဝႃႈၼႆ။
