ၵူၼ်းမိူင်းတႆး ၸႂ်ႉတိုဝ်းၶူဝ်းၶွင်ဢၼ်မိူင်းထႆးႁဵတ်းဢွၵ်ႇလႄႈ ၼႂ်းပီ 2018 ၼႆႉ ၵၢၼ်ၵႃႉၶၢႆၶူဝ်းၵုၼ်ႇထႆး – မၢၼ်ႈ ၽိူမ်ႉၶိုၼ်ႈထႅင်ႈ 8 မိုၼ်ႇလၢၼ်ႉၻေႃႇလိူဝ်ႊဝႃႈၼႆ။
ဝၼ်းတီႈ 03/11/2018 သိုဝ်ႇၶၢဝ်ႇထႆး MGR Online ပိုၼ်ၽၢဝ်ႇဝႃႈ ၵၢၼ်ၵႃႉၶၢႆၼႂ်းၵႄႈထႆး – မၢၼ်ႈ ၽိူမ်ႉၶိုၼ်ႈမႃးလိူဝ် ၵဝ်ႇ 8 မိုၼ်ႇလၢၼ်ႉၻေႃႊလိူဝ်ႊ။ ၵမ်ႈၼမ်ပဵၼ်ၶူဝ်းၵုၼ်ႇမိူင်းထႆးသူင်ႇၶၢႆၶဝ်ႈမိူင်းမၢၼ်ႈ – ဝႃႈၼႆ။
ၼၢင်းႁွမ် ၵူၼ်းၵႃႉ ဝဵင်းတႃႈၶီႈလဵၵ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ -“ ပီႈၼွင်ႉၵူၼ်းမိူင်းတႆးႁဝ်းၶႃႈ ၵမ်ႈပႃႈၼမ်ၼႆႉ လႆႈၸႂ် ၸႂ်ႉတိုဝ်းၶူဝ်းမိူင်းထႆးတႄႉၶႃႈဢေႃႈ မိူၼ်ၼင်ႇၶိူင်ႈႁဵတ်းႁၢင်ႈ၊ သိူဝ်ႈၶူဝ်းလႄႈ ၶူဝ်းၶွင်ၵိၼ်ယႅမ်ႉၸိူဝ်းၼႆႉ။ ၶူဝ်းၶွင် ဢၼ်လုၵ်ႉတၢင်းမိူင်းတႆးႁဝ်းၶႃႈသေ ၶဝ်ႈမိူင်းထႆးတႄႉဢမ်ႇပေႃးမီး ။ ၵမ်ႈၼမ်ပဵၼ်ၶူဝ်းၶွင်မိူင်းထႆးၶဝ်ႈမိူင်းတႆးမိူင်းႁူမ်ႈတုမ်မၢၼ်ႈၶႃႈဢေႃႈ ” ဝႃႈၼႆ ။
ၶူဝ်းၶွင်ဢၼ်ဢဝ်မိူင်းထႆးၶဝ်ႈမိူင်းႁူမ်ႈတုမ်မၢၼ်ႈၼႆႉ တေမီးမိူၼ်ၼင်ႇ ယႃႈယႃ၊ တၢင်းၵိၼ်တၢင်းယႅမ်ႉ၊ ၶိူင်ႈႁဵတ်းႁၢင်ႈ (မုၼ်ႈ) လႄႈၶိူင်ႈၸႂ်ႉၼႂ်းၵၢၼ်ၽုၵ်ႇသွမ်ႈၸိူဝ်းၼႆႉ။ ၶူဝ်းၶွင်ဢၼ်လုၵ်ႉတၢင်းမိူင်း ႁူမ်ႈတုမ် မၢၼ်ႈၶဝ်ႈမိူင်းထႆးသမ်ႉမိူၼ်ၼင်ႇ တၢင်းၵိၼ်ဢၼ်ဢွၵ်ႇၼႂ်းၼမ်ႉပၢင်ႇလၢႆႇလႄႈ ၶူဝ်းဢွၵ်ႇၼႂ်းသူၼ်ၼႂ်းႁႆႈ ၸိူဝ်းၼႆႉ။
