ႁူဝ်သိူဝ် လဵပ်ႈဝဵင်းလၢႆးၶႃႈႁႃသဵင် တႃႇဢွင်ႇပေႉပၢင်လိူၵ်ႈတင်ႈသွမ်ႈ

ပႃႇတီႇႁူဝ်သိူဝ် ၸႄႈဝဵင်းလၢႆးၶႃႈ လဵပ်ႈဝဵင်း ႁႃသဵင်ၵမ်ႉထႅမ် တႃႇဢွင်ႇပေႉ ပၢင်လိူၵ်ႈတင်ႈသွမ်ႈ ဢၼ်တေၸတ်း ႁဵတ်းၼႂ်းဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊၼႆႉ။

ဝၼ်းတီႈ 31/10/2018 ယၢမ်းၵၢင်ၼႂ် 10 မူင်း ထိုင် မွၵ်ႈ 5 မူင်းႁူဝ်ၶမ်ႈ ပႃႇတီႇႁူဝ်သိူဝ် SNLD ၸႄႈဝဵင်းလၢႆးၶႃႈ ဢဵၼ်ႁႅင်းၵူၼ်း 400 ပၢႆ ဢွၼ်ၵၼ်ႁႃသဵင်ပၼ်ႇလဵပ်ႈဝဵင်း ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း။

ၸၢႆးလၢဝ် ၵူၼ်းၼုမ်ႇ ၼႂ်းၸုမ်းပႃႇတီႇႁူဝ်သိူဝ် ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ တႄႇဢွၵ်ႇတီႈ လုမ်းႁူဝ်သိူဝ်ၵႂႃႇ မွၵ်ႈ 10 မူင်းၶိုင်ႈ ၵႂႃႇပၼ်ႇတၢင်းဝၢၼ်ႈၸၼ်ႇမႃးဢွၼ်တၢင်း ရူတ်ႉၵႃးဢၼ်ၵႂႃႇ ပၼ်ႇလဵပ်ႈဝဵင်းမိူဝ်ႈ ဝႃးတႄႉ တင်းမူတ်းတေမီး 80 ထိုင် 100 လမ်း၊ ဢဵၼ်ႁႅင်း ၵူၼ်းတေမီးမွၵ်ႈ 400 ပၢႆ တေမီးလုၵ်ႈၸုမ်းပႃႇတီႇႁူဝ် သိူဝ် ၵူႈတီႈတီႈမႃးၸွႆႈႁႃသဵင်။ မၢင်ဝဵင်းၵေႃႈ မႃးၵႃး 3-4 လမ်း။ ၵူၺ်းၵႃႈ မိူဝ်ႈဝႃးသမ်ႉ ၾူၼ်တူၵ်းၼႃႇ ” ဝႃႈၼႆ။

ၵဵဝ်ႇလူၺ်ႈလွင်ႈပႃႇတီႇႁူဝ်သိူဝ် လူင်းႁႃသဵင်ၵမ်ႉထႅမ် တႃႇပၢင်လိူၵ်ႈတင်ႈသွမ်ႈ မိူဝ်ႈဝၼ်းတီႈ 31 (မိူဝ်ႈဝႃး) ၼၼ်ႉ တႄႇလူင်းပၼ်ႇလဵပ်ႈႁႃသဵင် တၢင်းဝၢၼ်ႈၸၼ်ႇ ပၼ်ႇမႃးတၢင်း ပွၵ်ႉ 4 ႁိမ်းႁွမ်းၵၢတ်ႇဝဵင်းလၢႆးၶႃႈ။ ယဝ်ႉၵေႃႈ ၵိုတ်း ယင်ႉ ၵိၼ်ၶဝ်ႈဝၼ်း တီႈႁူဝ်ဝဵင်း။ ယၢမ်းဝၢႆးဝၼ်း 1 မူင်းပၢႆ ပၼ်ႇၵႂႃႇတၢင်းဝၢၼ်ႈမႂ်ႇသုင် ၾၢႆႇႁွင်ႇဝဵင်း၊ ဝၢၼ်ႈႁူဝ်ၽၢႆ၊ မိူင်းႁၢႆး၊ မၢၵ်ႇလၢင်း၊ ဝၢၼ်ႈသၢင်း၊ ၸလၢႆးၶုမ်ႇ ၸိူဝ်းၼၼ်ႉ။

လုၵ်ႈၸုမ်းပႃႇတီႇႁူဝ်သိူဝ် တၢင်ႇၸႄႈဝဵင်းဢၼ်မႃးၶဝ်ႈႁူမ်ႈၸွႆႈႁႃသဵင်သမ်ႉ မိူင်းသူႈ၊ ၵေးသီး၊ မိူင်းၼွင်၊ လွႆလႅမ်၊ မိူင်းၵိုင်၊ ပၢင်လူင်၊ ၼမ်ႉၸၢင် ဢိၵ်ႇထႅင်ႈလၢႆလၢႆၸႄႈဝဵင်း ၸဵမ်ၸိူဝ်းၼႆႉ။

ၼေႃႇၽူႈတႅၼ်းသၽႃးဢၼ်တေၶဝ်ႈၶႅင်ႇၵၼ် ၼႂ်းၸႄႈဝဵင်းလၢႆးၶႃႈ ၼႂ်းဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊ 2018 ၼႂ်း ဝၼ်းပၢင်လိူၵ်ႈတင်ႈသွမ်ႈၼၼ်ႉ ၸၢႆးဢူၵ်ႉၵႃႇ(ႁွင်ႉ) ၸၢႆးၵွင်ၶမ်း ႁူဝ်သိူဝ်၊ ၸၢႆးသူၺ်ႇသႅင်း သိူဝ်ၽိူၵ်ႇလႄႈ ၸၢႆး ဢွင်ႇထုၼ်းလေး ၼူၵ်ႉယုင်း တႃႇႁႃသဵင်တႄႉ ၶိုၼ်းၼႆႉ ဝၼ်းတီႈ 01/11/2018 ၵၢင်ၶိုၼ်း 12 မူင်း တေလႆႈပဵၼ် ၶၢဝ်းယၢမ်းႁႃသဵင်လိုၼ်းသုတ်း ပၢႆႉၸိူဝ်းၼႆႉၵေႃႈတေလႆႈပူတ်းလူင်းသဵင်ႈသဵင်ႈ သင်ဢမ်ႇပူတ်းလူင်း တေလႆႈၸၢႆႇပၼ် ၵႃႈပူတ်း ၼႂ်းႁွင်ႈၵၢၼ်ၾၢႆႇလိူမ်ႈလႆႇမူတ်းသႂ် ဝႃႈၼႆ။