ၵူၼ်းမိူင်း ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ ယဵပ်ႇၺႃးမၢၵ်ႇတႅၵ်ႇ ၼႂ်းလိူၼ်ဢွၵ်ႊထူဝ်ႊၿိူဝ်ႊၼႆႉ မီး 4 ပွၵ်ႈယဝ်ႉ ဝႃႈၼႆ။
ဝၼ်းတီႈ 27/10/2018 ယၢမ်းၵၢင်ၶမ်ႈ ၵူၼ်းထဝ်ႈ(ၽူႈၸၢႆး) ဢႃယု 65 ပီ ပဵၼ်ၵူၼ်းဝၢၼ်ႈၵယၢၼ်းၵျီး ၸႄႈဝဵင်း ၼမ်ႉသၼ်ႇ ယဵပ်ႇၺႃးမၢၵ်ႇတႅၵ်ႇ တိူဝ်ႉသႂ်ႇ လႆႈမၢတ်ႇၸဵပ်းႁၢဝ်ႈႁႅင်း ၸွမ်းၶႃၾၢႆႇၶႂႃလႄႈ မိုဝ်း တေႃႈလဵဝ် လႆႈသူင်ႇယူတ်း ယႃတူဝ်ဝႆႉတီႈ ႁူင်းယႃၼမ်ႉသၼ်ႇ ဝႃႈၼႆ။
တႃႉလႃႉၽေႇ ပႃႇတီႇတဢၢင်း လၢတ်ႈတီႈသိုဝ်ႇၶၢဝ်ႇ 7Day ဝႃႈ “ ၵူၼ်းမိူင်းဢၼ်လႆႈယဵပ်ႇၺႃးမၢၵ်ႇၼၼ်ႉ ပဵၼ်ၵူၼ်း သူၼ် ဢၼ်ၵႂႃႇပိတ်းၼဵင်ႈၵမ်ႈၼမ်။ ၶဝ်ဢမ်ႇၸႂ်ႈပဵၼ်ၸုမ်းယိပ်းၵွင်ႈၵၢင်ႇၸုမ်းလႂ်။ တေလႆႈဝႃႈ ဢၼ်လႆႈမၢတ်ႇ ၸဵပ်းတႄႉ ပဵၼ်ၵူၼ်းမိူင်းၼၼ်ႉယဝ်ႉ။ ၼႂ်းလိူၼ်ၼႆႉၵူၺ်း ၵူၼ်းမိူင်းယဵပ်ႇၺႃးမၢၵ်ႇ 4 ပွၵ်ႈယဝ်ႉ” ဝႃႈၼႆ။
ၼႂ်းၸႄႈဝဵင်းၼမ်ႉသၼ်ႇၼႆႉ ၵူၼ်းမိူင်းၵႆႉလႆႈယဵပ်ႇမၢၵ်ႇႁၢင်ႈၵၢင်ဝႆႉတႃႇသေႇ။ မိူဝ်ႈပူၼ်ႉမႃးၼၼ်ႉ ၼႂ်းၸႄႈဝဵင်း ၼမ်ႉသၼ်ႇၵႆႉပဵၼ်ပၢင်တိုၵ်း မိူၼ်ၼင်ႇ သိုၵ်းလူင်ပွင်ၸိုင်ႈမၢၼ်ႈ တင်း TNLA၊ သိုၵ်း TNLA တင်း RCSS ၸိူဝ်းၼႆႉ။
လိူဝ်ၼၼ်ႉ ၼႂ်းလိူၼ်ဢွၵ်ႊထူဝ်ႊၿိူဝ်ႊၼႆႉၵူၺ်း ၵူၼ်းဝၢၼ်ႈၵမ်ႈၽွင်ႈ ၼႂ်းဝဵင်းၼမ်ႉသၼ်ႇ၊ ၼမ်ႉၶမ်း၊ ၵျွၵ်ႉမႄး ယဵပ်ႇ ၺႃးမၢၵ်ႇ ဢမ်ႇယွမ်း 5 ပွၵ်ႈယဝ်ႉ။
မိူဝ်းၼႂ်းလိူၼ်သႅပ်ႊထႅမ်ႊၿိူဝ်ႊၼၼ်ႉၵေႃႈ ၵူၼ်းမိူင်းၼမ်ႉသၼ်ႇ ယဵပ်ႇၺႃးမၢၵ်ႇ လႆႈလူႉတၢႆ 2 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ