ဢိင်ၼိူဝ်သိုၵ်းၸၢဝ်းၶိူဝ်း ၼႂ်းမိူင်းတႆးၼင်ႇၵၼ် ပဵၼ်ပၢင်တိုၵ်းၵၼ်ႁၢဝ်ႈႁႅင်း တၢင်းပွတ်းဢိူင်ႇဢီႇၼၢႆးသေ ၵူၼ်းမိူင်း 1,131 ၵေႃႉ လႆႈဢွၼ်ၵၼ်ပၢႆႈယၢၼ်ႁိူၼ်းယေး။
ဝၼ်းတီႈ 29/10/2018 ယၢမ်းၵၢင်ၼႂ် မွၵ်ႈ 8 မူင်းပၢႆ ထိုင် ၵၢင်ၶိုၼ်းမွၵ်ႈ 10 မူင်း သိုၵ်းဢူၺ်းလီပွတ်းႁွင်ႇ တင်း RCSS ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းထုင်ႉဢီႇၼၢႆး ပွတ်းလႃႈသဵဝ်ႈလႄႈ ၵူၼ်းဝၢၼ်ႈပၢင်ႁုင်း၊ ဝၢၼ်ႈပဵင်း၊ ဝၢၼ်ႈ ၼႃးႁႃႈ၊ ဝၢၼ်ႈ 13 လၵ်းလႄႈ ဝၢၼ်ႈ 15 လၵ်း ၼႂ်းဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ။ ၵူၼ်းဝၢၼ်ႈမိူင်းတွင် ဢိူင်ႇ ၼႃးသၢႆး ၸႄႈဝဵင်းၼမ်ႉတူႈ၊ ႁူဝ်ၵူၼ်း 1,131 ၵေႃႉ ဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉတီႈ ဝတ်ႉဝိႁၢရ်မၢၼ်ႈသူႈ ၸႄႈဝဵင်းလႃႈ သဵဝ်ႈ ၸိုင်ႈတႆးပွတ်းႁွင်ႇ။
ၼၢႆးယွတ်ႈ ၵူၼ်းပၢႆႈၽေး ႁွတ်ႈၽႅဝ် တီႈဝတ်ႉဝိႁၢရ်မၢၼ်ႈသူႈ ဝဵင်းလႃႈသဵဝ်ႈလၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈလႆႈ ငိၼ်းသဵင်ၵွင်ႈ သဵင်မၢၵ်ႇ မေႃးမႃးလႄႈ ႁဝ်းၶႃႈၸႂ်ဢမ်ႇလီသေ ၼႅတ်ႈဢွၼ်ၵၼ်ပၢႆႈၶႃႈဢေႃႈ။ ၶဝ်ႈၶမ်ႈႁဝ်းၶႃႈဢမ်ႇ တၼ်းလႆႈၵိၼ်။ လႆႈယႃႈယႃမႃးၵူၺ်း။ ယႃႁူဝ်ၸႂ်ၵေႃႈလူဝ်ႇၵိၼ်၊ သုတ်ႇၵေႃႈလူဝ်ႇသုတ်ႇ၊ ယႃၵႄႈလႅတ်း ၵေႃႈ လူဝ်ႇၵိၼ် ပေႃးဢမ်ႇၵိၼ် ဢမ်ႇၸၢင်ႈမႃးလႆႈၶႃႈၼႃႇ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉမၢၼ်ႈသူႈသမ်ႉ ၵူၼ်းဝၢၼ်ႈၼႃးႁႃႈ လင်ႁိူၼ်း 39 လင် 179 ၵေႃႉ။ ဝၢၼ်ႈပၢင်ႁုင်း 124 ၵေႃႉ။ ဝၢၼ်ႈဢီႇၼၢႆး/ ၼွင်ၵေႃႇ လင်ႁိူၼ်း 80 လင် ႁူမ်ႈ 318 ၵေႃႉ။ ဝၢၼ်ႈဢီႇၼၢႆး လင်ႁိူၼ်း 38 လင် ႁူမ်ႈ 152 ၵေႃႉ။ ဝၢၼ်ႈပဵင်း လင်ႁိူၼ်း 50 လင် ႁူမ်ႈ 207 ၵေႃႉ။ ၵူၼ်းဝၢၼ်ႈမိူင်းတွင် ဢိူင်ႇ ၼႃးသၢႆး လင်ႁိူၼ်း 46 လင် ႁူမ်ႈ 151 ၵေႃႉ။ ၵွပ်ႈၼၼ်လႄႈ ၵူၼ်းပၢႆႈၽေးပွၵ်ႈၼႆႉ လင်ႁိူၼ်းတင်းမူတ်း ႁူမ်ႈၵၼ် 280 လင်၊ ၽူႈၸၢႆး တင်းမူတ်း 514 ၵေႃႉ။ ၽူႈယိင်း တင်းမူတ်း 617 ၵေႃႉ ႁူမ်ႈႁူဝ် ၵူၼ်းတင်းမူတ်း 1,131 ၵေႃႉ ဝႃႈၼႆ။
တႄႇဢဝ်ႁၢင်လိူၼ်ဢွၵ်ႊထူဝ်ႊၿိူဝ်ႊ 2018 ၼႆႉမႃး သိုၵ်းဢူၺ်းလီပွတ်းႁွင်ႇ တင်း သိုၵ်း RCSS လႆႈပဵၼ်ပၢင်တိုၵ်း ၵၼ် တၢင်းထုင်ႉမိူင်းယဵၼ် ၸႄႈဝဵင်းၼမ်ႉတူႈသေ မိူဝ်ႈဝၼ်းဢွၵ်ႇဝႃႇသႃၼၼ်ႉ ၵူၼ်းဝၢၼ်ႈထုင်ႉမိူင်းယဵၼ် ႁိမ်းႁဵင် ဢွၼ်ၵၼ်ပၢႆႈမႃးသွၼ်ႈဝႆႉတီႈဝတ်ႉမုင်ႈသႃႇ ၼမ်ႉတူႈ။ ထိုင်မႃး ဝၼ်းတီႈ 26 ၸင်ႇဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ် မၼ်း။ ထိုင်မႃး ဝၼ်းတီႈ 26 ၼၼ်ႉသမ်ႉ ၵူၼ်းမိူင်း တင်းဢိူင်ႇဢီႇၼၢႆး ဢွၼ်ၵၼ်ပၢႆႈ ၼပ်ႉႁူဝ်ပၢၵ်ႇ။ ထိုင်မႃး ဝၼ်းတီႈ 29 ၵေႃႉ ဢွၼ်ၵၼ်ပၢႆႈမႃးသွၼ်ႈတီႈဝတ်ႉမၢၼ်ႈသူႈ လႃႈသဵဝ်ႈ ႁူဝ်ၵူၼ်း 1,131 ၵေႃႉ ဝႃႈၼႆ။
